1 Eettene yanna'n Sina'oorik* moyanji Amrafeeli, Elasaarik moyanji Ariyooki, Elaamiki moyanji Kalodogomirinnaa, Goyiki moyanji Tidi'aal, 2 Soodoomika moyanjo Beera'i, Gomorika moyanjo Biirishaa'i, Adaamaka moyanjo Shini'aabi, Tseboyika moyanjo Seembeerinna Zo'aarite hiyyendaaxxe Beele'ixxe moottitteman. 3 Kunni ondiingi moyanjuwwi ififika loliinke manna abixxe welt guddiyyot edi wodda Sidiinixxe Dhooqa ta'axxe yanna'n Maxinetixe Abbaayya hiyyendaaxxe dhooqa'ni bukkiyye. 4 Kunni ondiingi moyanjuwwi tommenna lame wogga duuchcha Kolodogormeer hunda galleemman. Yaane kinni Tommenna sakkaxxe wogga'ni iso'n jalline.

5 Tommenna sholgaxxe wogga'n Kolodogomeerinna isinni welt guddemmak moyanjuwwi ifi fike loliinke manni duuleexxi Raafayito Asitaaroti Qarnayiim giddo, Zuuzito Haami giddo, Eemito Seewi Qiriyaatayim giddo, 6 Hooritotanna koobatika boga Seeyir giddo Elifaaraan hiyyendaaxxe qiila gammoojje qico'n shorrine injifante. 7 Ookkoneechchi uduma insa'nenna Qaadesi'a illee iima hinge dange. Qaadesiki summi edi wodda Eyimishiphatemman. Insa'nenna Amaaleqitotika boga duuchchanna Hazoorin Taamar giddo hexxeexxa Amoorito lolle injifante.

8 Ookkoneechchi uduma Sedoomik moyanji, Gomorak moyanji, Adaamaki moyanji, Seboyik moyanjinna, Zo'aar hiyyendeexxe Beela'ik moyanji, ifi ifika loliinka manna Sidimixxe dhooqa'n bukki assine lolle. 9 Kunni ondi moyanjuwwi Kolodogomeeri'i Elasarik moyanjo'n, Tidaali'i Go'imike moyanjo'n, Amirafeeli'i Sina'oorke moyanjo'ninna Ariyooki'i Ilasaarike moyanjo'n konne shoole moyanjuwwa'n duuleexxi lole. 10 Sidimixxe dhooqa'ni heddo faariinxi baluwwa wo'mitemmaxxee Sedoomikinna Gomorak moyanjuwi bagedokenaa'n baajaa wodda konne moyanjuwwinaa'n eettene baluwwa giddo ibe; gateekiir kinni koobuwatiba'a baaje. 11 Shoolinge moyanjuwwi Sedoomikenna Gomorake qachchi giddo itti futti hineexxa karranna ita duuchcha booji'e me'e. 12 Abiraamike dayyik belt Looxi Sedoomike qachchi giddo hedha'nemmaxxee isoonna afeechcho duuchchinni welt boojine me'ine.

13 Yaane kinni eettene booji'emebaak gateek mitti manjichchi dageexxi kaddeexxa yaane duuchcha Ibirichcho Abiraami'n kule; eettene yanna Abiraami Amoorichcho Maamirexxe songo'ni hexxemmnaxxe lumolla haqqe bira hedhaammani; Maamirenna lami isik dayyuww Eshikoolinna Awunna Abiraamike bagedii woddike jaajuwwamman. 14 Abiraami ifike dayyika belti Looxii boojimeexxa laqeechchi uduma baxxe isixxe'n ileme nophphe bagediinxa adhe barateeka 318 manna'n loliinka miya ka'lisheexxi ookkone shoole moyanjuwwika hasito Daani qico'ni hordofe mare. 15 Abiraaminna hashsha ifika loliinka manna qorbi qorbinni fulcheexxi hashsha naapha adhe injifate; Demasiqonaa'n middi darre'n hexxeexxe Hoba hiyyendaaxxe bakka qico'ninna hordofa'n shorre. 16 Abiraami naaphi booji'emmaxxa booji'o duuchchanna ifike dayyika belto Looxi'i isixxe karranninni hiissiise. Iittanni melaalletanna wele booji'ememmaka manna duuchcha wirri asse hiissise. 17 Abiraami Kolodogomorinna isinni welti hedhemmake moyanjuwwa injifate ille iima hingee wodda Sedoomik moyanji «Moyanjiinxe Dhooqa» hiyyendeexxe Seewixxe dhooqa'n iso'o qophedho'a fule mare. 18 Lumoke Magenike qeesichcho kadeemmak Saaleemiki* moyanji Melketsedeqinna Abiraami'a waasakanna woyinetixxa booka aadhe dage.✝ 19 Isinna Abiraaminna hiyye eebbisee qic,

«Iima butta dadeek Lumoki

Magen Abiraami'i eebbiso'o.

20 Naapha atika sa'isse anga atixxe'n uwweek,

Lumok Mageni saademowwaali» hiyye.

Abiraaminna iyyedageexxe booji'o duuchchinaa'n tommekenaa'n mitte anga Melketsedeqi'a uwwe.

21 Sedoomik moyanjinna Abiraami'i «Booji'ot alfitettexxa karra duuchcha ifi'anni adhdhi; manjo anka calla ani'a uwwi» hiyye.

22 Abiraaminna Sedoomike moyanjo'n hiyyee qic: «Iimatannaa butta dadeeki Lumok Mageni anga anxa ke'isse kakata'n 23 ‹Abiraamii duroonsennek anten› hitabexxoshsha filiinxe shimala yookaan kophetika uusuranjo midde atichchinaa'n adhdhabonon. 24 Tennexxee ani ifi'a mittelchonna adhdhabo'no; anki loliinki manni itteechchonna aninni welti hedhemmak Awunaan Eshikoolinnaa Maamire ifi ifika qoobbo adhdhinowwaal» hiyye.