1 Qiriyatiyi’aarimik manninna dageexxi Duuchchi Woddike Goottika Taabota adhdheexxi alale me’ine; ookko’n tullichchi hana hedhaa’neeke Abinadaabike mine’n iyyemarreexxi Duuchchi Woddike Goottika Taabotanna heqqaashshanna belto isika Ali’aazaarii’i woyyonsine.✝7:1 2 Sam. 6:2-4; 1 Odo. 13:5-7.

2 Duuchchi Woddike Goottik Taabotinna Qiriyatiyi’aarimi’n qeeraxxe yanna lame tomme wogga offo’le; Eettene yanna’n Isira’eelik ardi duuchchinna oodhe Duuchchi Woddika Gootta halse.

3 Tennexxee Saamu’eeli Isira’eelika arda duuchcha hiyyee qici, «Mitti godobinni Duuchchi Woddike Goottibaa higgina’neexxe kaddoole wele alaga magenuwwanna Asitaarootixxa fakke ha’noxxe oddoo’ne bayyisse; Duuchchi Woddike Gootti’anna ifi hiremme; Isoo callanna magenofatte; Duuchchi Woddik Goottinna ha’no Filisixeemitotixxe anga’naa’n gatisaan» hiyye. 4 Tennexxee Isira’eelito Ba’aalixxanna Asitaarootixxa fakkuwwa fugusineexxi Duuchchi Woddika Gootta calla magenofante.

5 Ookkoneechchi uduma Saamu’eeli, «Isira’eelika arda duuchcha Mitsipha bukki asse; aninna ha’noxxee Duuchchi Woddika Gootta soodatannon» hiyye. 6 Isira’eelito Mitsipha bukki hitee wodda wode’e ikileexxi Duuchchi Woddike Gootti edo dunne. Eettene barra agabo goddo honseeexxi «No’o Duuchchi Woddika Gootta’n cubbo hunjeennen» hina’ni faacine. Saamu’eelinna Mitsipha hayyichchake kadeexxi Isira’eeli’i galcha’emman.

7 Isira’eeli Mitsipha bukki hiteexxa Filisixeemito laqee wodda Filisixxeemik galchalluwwi insa’ne loldo’a alalle dagge. Isira’eelitotinna tenne laqeexxi Filisixxeemii’i sodaatte. 8 Insa’ne Saamu’eeli’i hinee qici: «Duuchchi Woddik Gootti no’ok Filsixeemitotixxe anganaa’n no’oo anjiro’a Duuchchi Woddika Gootta no’oka Mageno no’o’xxee soodaata uurrisoxxe’e» hine. 9 Tennexxee Saamu’eeli unu’na’neeka mitte gedhebiinka beltanjo aadheexxi isonna hedheeshanni ciincesse Duuchchi Woddike Gootti’a tolche. Isira’eelike ardixxeenna Duuchchi Woddike Gootta soodate; Duuchchi Woddik Goottinna soodachcho isixxa laqe. 10 Saamu’eelinna ciincatika tolcha tolchande’n hedhee’nanni, Filisixeemito Isira’eelika arda lolatee dagge shiqqe, yaane kinni eettene barra Duuchchi Woddik Gootti Filisixxeemitote’n jabaxxe dindinso dindimemmaxxee insa’ene yo’oshsha weekkemme; Duuchchi Woddik Gootti Filisixxeemito Isra’eelitoti edo baajaashsha asse. 11 Isira’eelitotinna Mitsiphanaa’n fuldeexxi Filisixeemito ora ora’n shilta’n Beetikaare’n adadde hedheeke boonchi qico’n shorshe.

12 Ookkoneechchi uduma Saamu’eeli mitte kinjo aadheexxi Mitsiphaxxenna Shenixxe oddo’n uurrise. «Duuchchi Woddik Gootti techchi qico’n no’o’o gargaare’en» hiyyaan ookkone kinjo «Abeenezer» hiyye summa fulche. 13 Konne qicinni Filsixeemito injifatendemmaxxee Isira’eelitotika boga langaxxa lollebaan. Saamu’eeli lubbot hedhemmake baro duuchcha’n Duuchchi Woddiki Gootti Filisixeemito ifixxe hunnanni lola’emman. 14 Filisixeemito Isira’eelitotenaa’n adhdhiteek Aqarooninaa’n Gaati qico’n hedhemmak qachchuwwi Isira’eeiltotee hige; Isira’eelitotike bogixxi gabalanna Filisixxeemitotenaa’n qullo fulde. Isra’eelitotixxe’ninna Amooritotixxe odd’n nage’i afeme.

15 Saamu’eeli Lubboti hedhemmak ifike baro duuchcha’n Isira’eelito hayyichchummati galcha’emman. 16 Wogga wogga’in Beeti’eelii, Geligeelinna Mitsipha mammarema’n konne booncho duuchcha’n Isira’eelitote’n hayyichchake kadee mura’emman. 17 Yaane kinni duuchchii wodda Raama hedheeke ifike miniba’anna higa’emman; ookkonna Isira’eelitote’n hayyummati mura’emman. Ookkonna Duuchchi Woddike Gootti’a tolchimalcho giisse.