1 Ookkoneechchi uduma Daawwiti Filisixeemika manna injifate isi hunda gallaasha asse; Gaatinna qarqara iseke'n hedheka olla'a Filisixeemike mannixxe anganaa'ni ibise.

2 Ittanni Daawwit Mo'aabika manna lole injifate; insa'nenna irbo isi'a uwwate'ni ke'ne.

3 Irraa caala Daawwiti Efiraaxisike galaani bira hedhemmaka boga galcha ifixxa ba'lissatee me'e wodda, Suubaanik moyanji Hadaadi'ezari ali darree'ni Hasemati qico'n mare lole. 4 Daawwitinna mitte kuma fadhadiinxa gaare, torbaane kuma fadhadiinxe gaareka oofalluwwa, lame tomme kumma lakkatika loli manna, mitte dhibba fadhadiinxe gaaretika fadhadiinxa calla gatise waalexxi gateeka mogole woxe.

5 Demaasiqo hexxeexxi Sooriyito Suubaka moyanjo Hadaadi'ezeri'i gargarate'e sannachcha erigee wodda Daawwiti insa'ne'ni giddii'n lame tommenna lame kuma manjo shiye. 6 Ookkoneechchi Sooriyaxxe galcha giddo hexxeexxe Demaasiqo'n heqqatixxa xelleephpho giisse; Sooriyitotinna irbo isi'a aaxxe dagge. Duuchchi Woddik Gootti Daawwiti'i mare booncho duuchcha'n injifataashsha middite uwwe.

7 Daawwitinna Hadaadi'ezerika loliink sooreessuwwi aggaamme abindeexxa worqet giissendeexxa wonte aadhe; Iyyerusaalemi'anna aadhe dage. 8 Daawwitinna Hadaadi'ezerixxe galcha hunda hexxeexxe Xibihatinna Kekun'ni heddo sageettuwwa aadhe; Solomooninna sagettoti galmi giddika miyuwa, wode'e cammammaka gonga, utuphuwwakanna gargarti hedheeka imaanuwwa konneechchuwwinni huje.✝

9 Hamaatik moyanji To'u Daawwiti Suubaneka moyanjo Hadaadi'ezerika sannachuwwa duuchcha lole injifatexxa laqeexxi, 10 To'i Hadaadi'ezerinni welti heddole adhete'ni sa'isseemaxxe'e, moyanji Daawwiti anga uwwaashanna Hadadi'eezeri'ni lole injifateexxe'e injifachcho kulaashsha belto iifka Yori'aami'i Daawwitbaa'a erga. Yoraaminna woriqe, birretixxe sageettonn hujenmeeka miyuwwa gicaa Daawwiti'a iyyedage.

11 Moyanji Daawwiti Eedoomi'ni, Mo'aabi'ni, Amoonitotenaa'n, Filisixeemike manninaa'ninna Amaaleqitotenaa'n konnechuwwi duuchchinaa'n mootelleeyuwwa booji'utemaxxa worqenna sibiljo birre konneechchi edo assinemmashshann konne miyuwwa duuchcha Duuchchi Woddike Gootti'a woyyonse.

12 Tsiruyak belti Abisa Maxinetixxe Dhooqa'ni tommenna saddeeta kuma Eedoomika manna shiye.✝ 13 Isinna Edomi'i heqatixxa xellephphuwwa giise; Eedoomito duuchcha moyanjo Daawwiti'a irbo uutaxe kadde. Duuchchi Woddik Goottinna Daawwiti'i mareboonno duuchcha'n injifataashsha middete uwwe.

14 Daawwiti Isira'eelike boga duuchcha'n mowe; ardi duuchchi dhugatixxa murtenna qullumma alfaashsha asse. 15 Tsiruyak belti Iyyo'aabi sannachchi duuchchik ajajallomman; Ahiluudik belti Iyyoosafiixxi kinn borreessanjokemman. 16 Ahixoobik belti Saadooqinna Abemelekik belti Abiyataar qeesetemman; Suusa kinn borreessanjokemman. 17 Yodahek belti Bennayaasi Kelitawwitotikenna Felitawwitotik ajajallomman. Daawwitixxi labbaxxi oose kinn moyanjoke'ni itti aandaaxxe galchaluwwamman.