1 Mootoleeyye lolakee me'itammaxxe woggatixxe jijjiirenshaxxa yanna Iyo'abi loliinka sannachcha akeeka'n mareexxi Amoonitotika boga balleese Raabaatika boga mareexxi buqe; Daawwiti kinn Iyyerusaaleminni gateemman. Iyyo'aabinna Raabaatii lole diige bire.✝ 2 Daawwitinna moyanjumatika kallachcha umokenaa'n aadhe; a'urikinna sase tommenna shoole kiilo kadaaxxe worqemman; tenneenna Daawwitike umi hana uggine; ittanni qachchi giddi'ni heddo laakkoonne dhaqanbabaachcho booji'e aadhdhe. 3 Okko'o hedheeka arda aadhe gadeexxi magaaze, qottonna maxiraba aa'ne hunjaasha asse. Daawwit wele Amoonike qachcha duuchcha'n tennee assine. Okko'n Daawwitinna sannachchi duuchchi Iyyerusaalemi'a hinge.

4 Ookkoneechchi uduma Filisixeemike manninni welti Geezere'i lola inbe: okkone wodda Huushichi Sebokay Rafayemixxe sannenaa'ni Sefayi'i shiye. Filisixeemik manninna injifateme.

5 Filisixemike manninn welti loleme'ek weli haarok loli kade; Ya'irik belti Elihanani, bagedo isikixxe somilchik furdinni gannammaxxe seemmaka mirisanjoxxa qixxe kadaaka Gaatike bogika manjo, Goliyaadika dayyo Laahimi'i shiye.✝

6 Higgeenni Gaati'ni assemeeke wele lola'ni, angate'ninna lekkate'n jaane jaane qubba madadi mitteba lame tommenna shoole qubba afe'eke heenobaake manjoman; kunninna ittanni Rayifayimixxe sannena'niteman. 7 Isinna Isira'eelito qacifatte wodda Daawwitika dayyo Shemayak belt Yoonataani'i shiye.

8 Gaati'i hexxemmaxxi Rafayimixxi horte tenne labbaan; Insa'nenna Daawwitixxenna isike loliinke mannixe anga'ni inbe.