1 Okko'ninna moyanji Daawwiti ya'a duuchcha'n hiyyeeqic; «Mageni fi'leek anki belti Solomoon midda bita'a ege'nebaak oosichchanni hunjaa qico barateekebaan. Kunni jabak kinji mini ijarema'neek manjokete kaddebaang Duuchchi Woddike Gootti Mageni'ate kaddemmaxxee jabaxxe hujen. 2 Aninna horatennexxa karra anke Magenik galmi'a worqet hunjaba worqe, sibiljo birrenni hunjaaba'a sibljo birre, sageettoti hunjaba'a sageetto, sibiljik hunjaaxxe huje'a sibiljo, haqqeti hunjaaxxe huje'a haqqe, ittanni seesinxe huje'a meregidite hiyyemaaka fiixe kinjo, gargarti hexxeexxa kino, elola bifa affeexxa kinonna golalamma kino duuchcha heddoke asse qophpheessedheennen.✝ 3 Konne qophpheessennaxxe yaanuwwa gadho anke Magenike galmi'a afeenexxe lumoxxe jaalalanaa'ni kexxeexxa konne qullo'eke galmi'a konneechchi edo uwweenenge'n itti lebe konne Mageni galmi'a ifi'a horatennake sibiljo birrenna worqe uwwannon. 4 Tinninna dhibba kuma kiilo Ofiirixxa worqenna lame dhibbanna shoole tomme kuma kiilo kaddaaxxi sibiljo birre galmiinka kinjinka dalla'a qammachchateenna, 5 Iittan worqetixxe huje'a, sibiljo birrexxe baqisa'a, ogeti mannixe huje duuchchi'a kaddaaxxen. Eega telcho ifi Duuchchi Woddike Gooti'a tolcha asse uwwaak ayyete?» hiyye.

6 Okko'ni mini hadik sooresuwwi, mini minike hadik Isira'eelike mannik jalqaabuwwi, kuma manjo akeekammakinna dhibba manjo akeekammakiir ittanni moyanjiinxe huje'ni dhaabendeexxi hayyoole ifixxe eeyyanni uune; 7 Mageniinke galmixxe huje'a uunexxi dhibbanna torbaane tomme kuma kiilo iima hexxeexxa worqe, sase dhibbanna shoole tomme kuma kiilo iima kadaaka sibiljo birre, jaane dhibbanna lame tomme kiilo iima geltaaxxa sageettonna sase miliyoonenna shoole dhibba kuma kiilo iima kadaaka sibiljo ifixxe fedhiini uwwate'e mu'line: 8 Fiixxeexxa kino afeeki duuchchi Gershoonichcho Yihi'eeli darre'n Duuchchi Woddike Gootike galmike misechcho massinammake miniba'a e'yishe. 9 Uwwatanna ifixxe eeyaninna mitte godobinni Magenokee shiqeexxe kaddeemmaxxee akeekisanjuwwi isiki hunjeexxe eloxxe hujexxe uwwa'a ardi gammade: moyanji Daawwitinna ittanni gammade.

10 Daawwitinna ya'i duuchchi edo Duuchchi Woddika Gootta hiyye saadee qic,

«Ee, anni no'okike Isira'eelike Duuchchi Woddike Gootta Mageno,

borokenaa'ni bari qico'ni ati saadenda'ni hedhi.

11 Koo Duuchchi Woddike Gootta; iimate'ninna buttate'n hedheechchi duuchchi atingen;

Lumminni, hunna, ulfinninna gaachchanni atingen.

Koo Duuchchi Woddike Gootta mootummatinna atinxen;

Atinna umiinsha duuchchinge iimi darre lummexxeetteken.✝

12 Durummatinna ulfinni uwwema'neek atii'nite;

Atinna duuchchingike galchallon;

Lummisatee, duuchchiinge jabeenna uwwatee;

jabuntenna hunna atixxe anga'ni hexxeen.

13 Mageno no'oke; ta'anna atee saandaannen;

ulfateke atike summi'a ilillisaannen.

14 «Yaane kinni Duuchchiinxi atenaa'ni afendeen; ati'anna uunennek atixxe anganaa'ni a'linenageechchon. Iita hexxeexxa arjunte assatee ani ayyete? Ardi ankinna isi honte kade? 15 No'onna edike annuwwishshann ati edo dhoddotishshanna keessummaten; bari no'okinna buttate'ni gaadiddotishshaten; addachchiisa belonna he'naanna. 16 Koo Duuchchi Woddike Gootta Mageno woyyichcha atike summi'a galma ati'a ajaarona'a kunni heddo assine qophpheessinennek duuchchi, atixxe angana'ni afemeekenna madadiing atiken. 17 Anke Mageno; ati qalbe manjiinxa hega uuddattexxanna qajeelumma eettatexxa ege'nennen; aninna tenne duuchcha uwwennek fedhii anxenninna mitte godobinniten. Ta'anna konno'o hedheek ardi atik ifixxe eeyanni hitta uwweexxa uudennen. 18 Koo edike annuwwa no'okike Abirihaamike Yisihaqike, Isira'eelike Duuchchi Woddike Gootta Mageno konne yaada atike ardike godobi giddo baro barokee uggi; qalbe insa'nexxi duuchchi wodda atee addattaashsha assi. 19 Ajajuwwa atika, aadatanna seera heqqedhaashsha, ani isi'a qophpheessenaxxe yaanuwwa'ni lumoka kinjiinka mine ijaaro'a dande'asha anke belto Solomooni'a shenendinni eeti'i isi'a uwween.»

20 Okkoo'ni Daawwiti ya'a duuchcha, «Duuchchi Woddika Gootta ha'nooka Mageno saadde!» hiyye. Tennexxee annuwwa insa'nekika Duuchchi Woddika Gootta Mageno saande. Duuchchi Woddike Goottanna moyanji edo kumbu hine sagande.

21 Langa barixxa gorsa Duuchchi Woddike Gootti'a tolcha tolche; ciincatika tolchanna shiqinshe; kunninna mitte kuma jibootta, mitte kuma gedhebiinxa korbeeyyenna mitte kuma buruusa ittanni ha'winamachchonaa'ninna wele tolchuwwinn welti Isira'eeli duuchchi'a heddo assine shiqinse. 22 Eetene barra'ni Duuchchi Woddike Gootti edo lumoke gammadinni inde; ha'wine.

Okko'ni Daawwitik belti Solomoon moyanjo kadeexxa langaxxe yanna'a ba'lifante egenne; moyanjo kadaasha Duuchchi Woddike Gootti edo hariire; Saadooqinna qeesichcho insa'neke kadaashsha hariire. 23 Konneqicinni Solomooninna mowe anniinxe bakka'ni Duuchchi Woddike Goottixxe moote'n ofo'le; isi'anna qabbe; Isira'eel duuchcha isi'a ajajende.✝ 24 Loliink akeekisanjuwwinna hunnameeyye duuchcha ittanni moyanjo Daawwitixxi labbaxxi oose duuchcha addatensha insa'nexxa moyanjo Solomooni'a kokeesine.

25 Duuchchi Woddik Goottinna Solomoon'i Isira'eelike arda duuchcha'ni hara yo'osha lummise; isi edo hexxeexxi Isira'eelixxi mootoleeyye'a uwwendebaaxxa moyanjummatika ulfinna duuchcha isi'a uwwe.

26 Isseyik belti Daawwit Isira'eeli duuchcha'ni mowemman. 27 Isinna Kebirooni torbaane wogga, Iyyerusaalemii sase tommenna sase wogga; mitteba shoole tomme wogga mowe.✝ 28 Durummatinna ulfinni isonaa'ni mishik hiyyebang heddo wogga ture lummedhe; belti Solomooninna bakka isixxe'ni mowe.

29 Moyanji Daawwiti galchaamma baro'ni ke'itokenaa'ni miixami qico'ni hujendeexxi huje wabeeka Saamu'eelike jirtetike maxaafa'ni wabeeka Naataanike jirtetik maxaafa'ni, wabeeka Gaadike jirtetike maxaafa'ni borreessemeen; 30 borreessemeekinna mootummate'ni hedhema wodda taakka langa hiyye hujeexxe hujuwa'ninna qarqarake'n buqeeke, Isira'eelikenna wele bogike mootoleeyyetixxe jirtenni weltiten.