1 Duuchchi Woddik Gootti isik Mageni isinni welt hedhemmaxxee, saademaashshanna assemmaxxe Daawwitik belti Solomooni mootummate'n jabaate ofo'le.

2 Ookkoneechchi uduma Solomoon Isira'eelito duuchchi'a kuma ajajamakeri'a, dhibba ajajammakeri'a, hayyoolle ittanni moottummate'ni galchammake akeekisanjuwwa, shiqike firuwwik akeekisanjuwwa duuchchi'a, 3 Duuchchi Woddik Goottik erganji Muuse qiilla gammoojje'ni hujeemmak Mageno magenoofachchoti duunkaan ookko hedhemmaxxee, Solomooninna ardi duuchchi Geba'ooni hedheek tullichibaa me'ine. 4 Ookkone wodda moyanji Daawwiti Magenika taaboota Qiriyatiyi'aarimii'n Iyyerusaalemi giddo isi'a giissememmake duunkaanbaa iyyedageemman✝ 5 Kaddo malee'e Huurika akka'o, Uurika belto Baatsili'eel Duuchchi Woddike Goottike sageettotik tolchimalcho ookko Geba'ooni duunkaani albi edo hedhemman; tennexxe moyanji Solomooninna ardi duuchchi isoo ookko soodata'emman.✝

6 Moyanji Solomooninna Duuchchi Woddika Gootta edo mageneefachchotike duunkaan giddo hedheeke sageettoti tolchimalchiba dageexxi isi hana mitte kuma ciincatika tolcha shiqise.

7 Eettene hashsha'n Mageni Solomooni'n lelleexxi isoo, «Ati'a maachcho uwwona'a hassaate?» hiyye laqe.

8 Solomoonina Magenoke'n hiyye hissee haaso'e qici, «Ati anna anke'e Daawwiti'a lumoxxa atixxa eeya kutabelo isi'a leellishsheten; ta'anna ani anke annixxe bakka'ni tukkeeseme moyanoshsha assitetten. 9 Ta'anna Duuchchi Woddike Gootta Magenoo! Anke anni'a haasotettek haaso'i muuxemaashsha assi. Atinna laakkoonne dhaqqanbabaaxxe bukushsha hedheeke arda'n ane'e baallonsitetten.✝ 10 Tennexxee konne arda seerik akeekatee dande'annoshsha beekkumakanna ege'na ani'a uwwi; iita kada gophphoole kinni lumoka arda atika hitta akeeka dande'ano?»

11 Magenikinna Solomoon hiyyee qici, «Atixxe qalbeke yaadi konnete kadeemmaxxe, karra, durumma yookaani eloka summa yookaan naaphi atiki reyaashsha, yookaani qeerraaxxa wogga laqedha gophphetaxxee mootattoshsha assenneka anka arda seerik galchitattoshsha beekkumanna ege'na laqqeettaxxee, 12 tennexxee ati laqqqeeteka beekkumakanna ege'na uwwannon. Higgeenni konneechchi edo huuni moyanjinna alfebaaxxa edi'aanna ayyinna alfabaaxxa karra, durummanna ulfinna ati'a uwwannon.»

13 Solomooninna anfenshatik duunkaan hedhemmake Gaba'oonike tullichchibaa'n ke'eexxi Iyyerusaalemi'a ille iima hige. Isinna Isira'eeli moye.

14 Solomooni mitte kumanna shoole dhibba fsarageelluwwanna tommenna lame kuma loliinka fadhado bukki asse; isinna mitte kummanna shoole dhibba sarageelluwwanna tommenna lame kuma fadhado afe'eemman; Konneera duuchcha sarageelluwwiinke qachchuwwa'ninna isi hedheeke Iyyerusaalemi qachchi giddo ugge.✝ 15 Moyanji Solomooni worqetanna birret sibiljo Iyyerusaalemi giddo kinotishsha bira sa'aashsha, birbirsakanna tullichchi tullichchuwwii hunda hedhammake odi'iinke haqichchishsha birasaashsha asse. 16 Solomoonik fadhaduwwinna daga'nemmaki Gibtse'ninna Qewwee'nitemmani. Moyanjiinxi daddaltonna konnee fadhaduwwa maallaqik Qewwe'a hirte aaxxe daggaamman. 17 Gibtsee'n iyyedangaammaka mitte sarageella jaane dhibba birreti sibiljinni, mitti fadhachcho mitte dhibbanna onde tomme sibiljo birrenni hirreemman. Insa'nenna konneera wirri assineexxi Hittiitoteenna Sooritotike moyanjuwwi'a gurgura'emmani.✝