1 Ookkoneechchi uduma Solomoon hiyyee qici, «Duuchchi Woddiki Gootti dimma duumanchi giddo hedhaaxxa haaso'eeni; 2 Aninna duuchchi wodda hexxattoka konne mambe'iinka lumoka galma ati'a ijaarenneni.»

3 Isira'eeliki tuuta duuchchi ookkoo uurite hexxe'na'a moyanji Solomoon insa'nebaa wirri hiyyeexxi insa'ne eebbise. 4 Ookkoneechchi uduma hiyyee qici: «Anna anke Daawwiti'a hiyye addachchiisemmaka hiyyichcho anga ifixxinni muuxeeki Isira'eeliki Duuchchi Woddiki Gootti Mageni galateefatemmowaal; isinna hiyyeema qici, 5 ‹Anka arda Gibtsee'n fulchennexxe barranaa'n ke'isse summi anki ye'emaaka galma ijaaremmaxxa bakka fedheeke Isira'eelixxe gosake qachchuwwanaa'n mittekanna filebe'noni; yookaani anke ardike Isira'eelike akeekisanjo kado'a ayyeenna filebe'non. 6 Ta'a kinn summi anki ookkoo ye'emo'a Iyyerusaalemii fi'leenneni; anka arda Isira'eeli moye galcho'a Daawwitii fi'leennen.›

7 «Anki Anni Daawwiti Isira'eelike Duuchchi Woddike Gootta Mageniinke summinni galma ijaaro'a godobik hedeemani. 8 Duuchchi Woddiki Gootti kinn anna anke Daawwiti'a hiyyee qici: ‹Anna anke Daawwiti'a summa anke galma ijarittota'a godobiki heddettan; tennee godobi atiki giddo heda eloxxe asitetten. 9 Kaddo malee galma ijaaritattoki atetebaan: summa anke galma ani'a ijaaraaki gudeeda atikenaa'ni fulaake belto atiken.›✝

10 «Duuchchi Woddiki Gootti hiyyemmaka hiyyichcho muxeen; aninna Duuchchi Woddiki Gootti hiyye addachiisemmashshanni anke annixxe Daawwitixxe bakka'n Isira'eelike moyanjo kadennen; Isra'eelike Duuchchi Woddike Gootta Magenike summi'a galma ijaarennen. 11 Duuchchi Woddiki Gootti Isira'eelike ardi'a aagemmaxxi kako hexxeeka taaboota ookko giddo uggennen.»

12 Ookkoneechchi uduma Solomoon Isira'eeliki ya'i duuchchi hedheeba Duuchchi Woddike Goottike tolchimalchi edo anga farri asseexxi uurre. 13 Solomooninna qeerrin onde ciqile ba'linni onde ciqile ejjuma sase ciqile kaddeexxa sageetotike qehphpinni gadhi darrexxe baxxexxe oddo'n giissiseemman; ookkone qephphpinni hana sa'exxinna Isira'eelike ya'i duuchchi edo gulufateexxi angatanna iimi'a farri asseexxi 14 Isi hiyyee qici: «Ee Duuchchi Woddike Gootta Isira'eelike Magenoo mitte godobinni ora atike'n me'aake erganjuwwi atikinni welti jaalalatixxa atixxa kako heqqexxatoke iimate'ninna kadi buttate'n atishsha hedheeki Mageni hedhebaan. 15 Erganjo atike anna anke Daawwiti'a hitetteka addachchiisatika hiyyichcho heqqiteetten: afo'i atikinni haasottettexxa telchonna anga atixxinni muxxetten.

16 «Ta'anna Isira'eelike Duuchchi Woddike Gootta Mageno eriganjo atikee anna anke Daawwiti'a, ‹Ati seera anka xexxe'achchoti heqqexxeteshshanni oose atixxinna seera anka heqqexxoole; atixxe sanne giddi'n Isira'eelixxe moote'n ani edo moyaka manjo hara gophphabexxoni hitee aaggetaxxa kako ta'a isi'a heqqi.›✝ 17 Yooni ee Duuchchi Woddike Gootta Isira'eelike Magenoo, erganjo atike Daawwiti'a addachchiiseteka hiyyichcho atiki muuxemowwaal.

18 «Yaane kinn dhugaandinni Mageni manjiki welti buttate'n hedhaata? Kunn iimatinna iimatixxi iimuwwa midde atee abida dandeettabaani hittata ani ijaareneki kunni galm hara hittata shiixxedhata?✝ 19 Kaddo malee ee Duuchchi Woddike Gootta anke Magenoo erganji atikixxa soodachchonna marartetee atiba shiqiseexxa kadha caqasi; garbichchi atiki ani ati edo oodha'ni soodatannexxa soodachchonna laqi. 20 Summi atiki ye'emashsha haasotteteke konne galmibaa barranna hashsha ille atixxi uuddowwaali; erganji atik ani konne boncho'n soodatannexxa soodachcho laqi.✝ 21 Atiki erganji aninna atiki ardi Isira'eeli konne boncho'n soodantaa wodda soodachcho no'oxxa laqi; galduma atike'n iimanni hexxe laqi; laqqenna gattowwaali hiyyi.

22 «Mitti manji jaalo ifika ballesseexxi kakataashsha laqemoole isinna dageexxi galm giddo hedheeke tolchimalchi edo kakatoole, 23 Iimanni hexxe laqqe muri. Balleesanjiinxa balleessa umo isinge'n isixxa hiissite huje isixxishshanni isi'a uwwi; erganjuwwi atikixxe oddo'n iso'n muri. Qulichchi balleessa afebaake kadeexx ege'nishi; balleessa afebaakinna qullo fulaashsha assi.

24 «Ardi atiki Isira'eeli ate balleesatenaa'n kexxeexxa naaphi insa'ne injifatoolenna atibaa hingeexxi konne galm giddo ati edo soodachcho atibaa kadha shiqinsa'n summa atika ye'noole, 25 Iimanni hexxetexxi laqi; atike ardixxa Isira'eelixxa cubbo gattowwaali hiyyi; insa'ne'anna annuwwa insa'neke uutettake bogibaa insa'ne hiissi.

26 «Ardi atiki ate balleessatenaa'n kexxeexxa; iimuwwa cufende'naa xeeni gana gophoole, ati insa'ne'n rakko geessissetaxxee konne boonchibaa wirri hine soodantoole; summa atika ye'noolenna cubbo hujatenaa'n ille iima hingoole, 27 Iimanni hexxee laqi; erganjuwwa atike kadeekixxa atike ardixxa Isira'eelixxa cubbo gattowwaali hiyyi; he'naaka eloka ora insa'nee barachchiisi; arda atike geegoke kadaashsha uutettake boga'n xeena gansiisi.

28 «Bogake'n solo'i, yookini dhukubi, yookaani waagge, midha gubaaki dhukubi, yookaan awwaaneessi yookaan koro'miisi dagaa wodda, yookaan higgeenni hoone qachcha'ninna he'ne'naa naaphi insa'nee buqaa wodda, yookaan fedheexxi rakko yookaan dhibemma wodda, 29 arda atike Isira'eelinaa'n fedheeki manji yaaddonna elagonphe gelte'naa anga konne galmbaa farri asse soodata'n kadhatoole, 30 iimate'n galduma atinge'n hexxe laqi; gattowwaalinna hiyyi; manjiinxa qalbe egendeteki atee calla kaddetaxxee mitte mittengee huje huje isixxishshanni uwwi; 31 tinninna annuwwa no'oke uuttetake boga'n he'naa wodda duuchcha atee soodanto'anna oruwwa atike'n me'inaashshaten.

32 «Arda atike Isira'eelixxe sanne kadebaaki alagake kadeeki manji atike lumoke summi'a hunnameette atixxe angaxxeenna jabaaxxe atixxe hirrexxa laqeexxi bayyike boganaa'n dageexxi konne galmbaa soodata wodda, 33 iima atinge galduma'n hexxe laqi; bogi duuchchiki ardi Isira'eeli atike ardishsha summa atika ege'ne atee soodantaashsha ijaarenneki konne mini summi atiki ye'emaake kadeexxa egenaashsha alagi manji atee laqedhachcho duuchcha assi.

34 «Ardi atiki ati ergtattoke booncho duuchcha'n naapha insa'neka lolo'a fullaa wodda ati fi'liteteke konne qachchibaa aninna summa atike ijaarenneke konne galmbaa atiba atiba'a soodantoole, 35 soodachcho insa'nexxanna kadha insa'nexxa iimanni hexxe laqi; atee laqe'naaxxa insa'ne'a assi.

36 «Balleesabaaki mitti manjinna hedhebaani ate balleessinaa wodda mufattettexxi bayya yookaan shiqa hedheeke bogibaa booji'e adhdhe me'aake naaphinxe anga'n sa'isite insa'ne uutottole, 37 booji'eme me'inemange ookkone boga'n he'ne qalbe insa'nexxe'n yaaddo laqende'naa aade angoolenna booji'emeeba he'ne, ‹Cubbo hunjeenneni, balleesineenneni, elobaxxa hujenna hunjeenneni› hinoole, 38 booji'emme me'inemange boga'n he'ne mitte godobinni mitte yaadinni hingoolenna annuwwa insa'neke uutettake bogibaa ati fi'litettake qachchibaanna ani summa atike ijaarenneke galmbaa soodantoole, 39 soodachcho insa'nexxanna kadha insa'nexxa iima galduma atinge'n hexxe laqi; ate laqe'neexxa insa'ne'a assi. Ate balleessemmakixxa ardi atikixxa cubbo gattowwaal hiyyi.

40 «Ta'aanna anke Magenoo konne booncho'n shiqqeexxe soodachchobaa ille atixxi uuddaaxxe mansha atixxinna laqqaaxxe kaddowwaal.

41 «Ta'anna ee Duuchchi Woddike Gootta Mageno ke'i; atixxe hunnake taabootinni welti hafuura adhdhitattake boonchibaa e'yi. Ee Duuchchi Woddike Gootta Magenoo, qeese atixxi anjira odo'witowwaali; woyyoole atixxinna atixxe elle'n gammaddowwaal.

42 Ee Duuchchi Woddike Gootta Magenoo hariirtetteka waaldoxxe; erganjo atike Daawwiti'a addachiissetexxa jabaxxa atixxa jaalala hedi.»✝