1 Iyyosiyaasi moyee wodda wogga isixxi saddeetatemman. Isinna Iyyerusaalemii giddo sase tommenna mitte wogga galche. 2 Iyyosiyaasinna Duuchchi Woddike Gootti'a eloxxa yaane asse. Isinna erqena kayyi'a higebangi edik anni isiki Daawwiti me'emmaka ora me'e.

3 Isinna moye galchemmaxxe saddeetixxe wogga'ni, oosummande'ni edike ifike annika Daawwitika Mageno magenoofate. Tommenna langaxxe wogga'ni wele bogiki manni mageneefatammak tullichchi boonchuwwa, Asheerati hiyyemaake meyyake magenixxa soodduwwanna wele hujendexxa fakkuwwanna baqisendeexxe misiluwwa duuchcha Yihuda'ninna Iyyerusaalemi'ni giddii'ni ballessate'ni ke'e. 4 Isike ajajinni manni Ba'aalika tolchimalchuwwanna bira hedhammaka hixaana guphphinammaka tolchimalchuwwa enqine birre. Iittanni Asheera hiyyemaake meyyake magenixxa soodduwwa, wele fakkuwwanna misiluwwa duuchcha eniqine birreechi uduma cilaatte aa'nexxi eetene fakkuwwaa tolcha shiqisammake mannike hirreessa'ni xeerre.✝ 5 Iyyosiyaasinna insa'nexxe qeesexxa miqe insa'ne magenoofachchotike tolchimalchuwa hana ciinceesse; isinna konne qicinni Yihudanna Iyyerusaalemi luqqi asse.✝ 6 Nefitaalemi qico'ni hedheek Minaasexxe, Efireemixxenna Siimi'oonike bogike qachchuwwa'ni ittanni qarqara insa'neke'ni hedheeke diigeme luggeeke loola'ninna tenneeni fakkaataxxa yaane asse. 7 Isira'eelike boga'ni hedheeka fakkuwwika tolchimalchuwwa, Asheeraxxa soodduwwa duuchcha enqe, misiluwwa duuchchanna bullete asse waale, hixaana guphphinammak tolchimalchuwwa enqe bireexxi Iyyerusaalemi'a hige.

8 Iyyosiyaasi moyexxe tommenna saddeetixxe wogga'ni bogakanna woyyichcha galma luqqi asseechchi uduma Atsaaliyaka belto Saafaanii, Iyyerussaalemii galchammaka Ma'iseyaaniinna borreessanjo Iyyo'ahaazika belto Yo'ahi'i Duuchchi Woddike Gootta ifike Magenika galma qammachchino'a erge.

9 Insa'nenna umo qeesichcho Hiliqiyaasibaa marreexxi Mageniinke galmi'a dageeka maallaqa iso'n uunne; iikki maallaqinna hula heqqitammaxxi leewwito Minaasenaa'n Efireeminaa'ninna Isira'eelitotixxe hafe duuchchinaa'n iittanni Yihudake, Biiniyamike ardi duuchchinaa'ninna Iyyerusaalemi giddo hedha'nekeerinaa'ni bukki assemeekemman. 10 Ookkoneechchi uduma Duuchchi Woddike Goottike galmixxa huje to'anta'ni hunjaashsha baallomemmake konne sase manna'n konne maallaqa uune. Kunni manninna konne maallaqa galma ijaara'neke qammachchammakenna haaronsekeeri'a uune. 11 Iittanni Yihudaki moyanjuwwi diigemaashsha assemmake kinjiinke minuwwike ijaasi'a kadaaxxa bocendeexxa kinonna haqqe hirraashsha, kino bocamakeera'ninna mine ijaaramakeera'n uune. 12 Mine ijaarammakiirinna kino bocammakiir huje xuurameessumati hunje muunxe. Insa'nek sooresuwwinna Meeraarixxe gosana'n Ii'eetinna Abidiyyu, Qe'aatixxe gosanaa'ni Zekkariyasinna Mesulaamitemman; faarotike miyinni faarsatixxa lumoxxa ege'na affeexxi Leewwito duuchcha, 13 dukkamakeera'ninna gargaritti hexxeexxa huje hujaammakeera'n baallonde'eemman. Wele gatteexxi Leewwito iittanni sooresuwwa, borreesanjuwwanna hulatike hiqqanjuwwamman.

14 Duuchchi Woddike Goottike galmibaa e'yeeka maallaqa insa'ne fulchinaa wodda, qeesichchi Hiliqiyaasi Muuse'n uwwemeemmaka Duuchchi Woddike Goottike seerika maxaafa afe. 15 Hiiliqiyaasinna borreessanjo Saafaanii, «Duuchchi Woddike Goottike seeriinka maxaafa konne woyyichchi galmi giddo afeennen» hiyye. Ookkoneechchi uduma isi ookkonee maxaafa Saafaani'n uwwe.

16 Ookkoneechchi uduma Saafaani ookkonee maxaafa aadheexxi moyanjiba mareexxi isoo hiyyee qici, «Ja'laabuwwi atiki ajajjetexxa duuchcha muuxate'ni hedheen; 17 insa'nenna Duuchchi Woddike Goottik galmi giddo hedhemmaka maallaqa aa'neexxi ookkone hujalluwwa'ninna insa'nee to'atammake manna'n uuneen.» 18 Ookkoneechchi uduma borreesanji Saafaani moyanjoke'n, «Qeesichchi Hiiliqiyaasi maxaafa ane'ni uwwe'een» hiyye. Saafaaninna ookkonee maxaafa moyanjokee haaseesse.

19 Moyanjikinna seeriinka hiyyichcho haasesinaa'na'a leqee wodda, yaaddoti seemma ifixxa dare. 20 Isinna moyanjo Hiiliqiyaasi, Saafaanika labba belto Ahiqaami'a, Mikiyaasike labba belto Abidoni'a, ifike mootummatike borreesanjo Saafani'ninna moyanjiinke shiqike erganjo Asaaya'a konneechchi butta hedheeka ajaja uwwe. 21 «Martineexxi anxee ittanni Isira'eelito giddonna Yihuda giddo gateeke ardixxee afemeeke maxaafi giddo borreessendeexxe yaane'a Duuchchi Woddika Gootta laqqe. Ediki no'oki annuwwi Duuchchi Woddike Goottike hiyyichchi'a ajajema gonpheemmaxxenna kunni maxaafi asse hiyya'neexxa duuchcha muuxa gonpheemmaxxee Duuchchi Woddik Gootti jabaxxa mufe ifixxa no'o'ni ibiseen.»

22 Hiliqiyaasinna iikki moyanji isinni welti ergeemmak manni seemmatike heqanjo kade'emmake Hasirake beltika belto Tiquwwaka belto Seelemixxa are kadde'emmaxxe eettene wabeetto Hildaanabaa marreexxi ise'n kulle. Isinna Iyyerusaalemi giddo langake quta qachcha'n hexxa'emman.

23 Wabeekittenna insa'nee, «Ha'noo anibaa ergeeke manjibaa ille iima higgineexxi konneechchi butta hedheeka Duuchchi Woddik Gootta Isira'eelike Magenika hiyyichcho iso'n kulle. 24 ‹Duuchchi Woddiki Gootti hiya'nee qici Yihudake moyanji edo haassesemeeke maxaafi giddo borreessendeexxe badinoshsha sa'atixxee kulendeeshshanni Iyyerussaalemina arda iseke duuchcha'n ba'ne geessisannon. 25 Insa'nenna anee waaleexxi wele magenuwwi'a hixaana gubbeemmaxxeenna hunjeexxe yaane duuchcha'n anee mufachchiinsemmaxxee Iyyerussaalemi'ni aarennexxi aare anxi ha'yitaa malee xoxxabaan.› 26 Duuchchi Woddika Gootta qodhatee ergitinemmake Yihudiinka moyanjo'n hitinee kuldinaa qici, ‹Ati laqqetteke hiyyichchi'a Duuchchi Woddike Gootti Isira'eelik Mageni hiyya'nee qici: 27 ani Iyyerussaaleminna arda isike hitta ganannoxxa ati laqqette wodda; qalbe atixxi yaaddemmaxxee Magenii edo ifi salphisseetaxxee iittanni ani edo ifi heeshi assiteettaxxee seemma atixxa yaaddoti dartee ani edo soodattettaxxee soodachcho atixxa laqeennen hiyya'nee Duuchchi Woddik Gootti. 28 Yoona ati edik atike annuwwishshanni rertaton. Nage'ikinna moogendatton. Iyyerussaalemi'ninna ise giddo hedha'neeke arda'n geltaaxxa rakko duuchcha ille atixxinni uuddabexxon.› »

Iikki mannikinna hiisichcho iseka moyanjo Iyyosiyaasibaa aa'ne hinge.

29 Ookko'ninna moyanji Iyyosiyaasi Yihudikanna Iyyerusaalemixxa geedhe duuchcha mitteba bukki asse. 30 Isinna lumokenaa'ni shiixxoki qico'ni hedheeka Yihudiinke mannanaa'ni, Iyyerusaalemike ardanaa'ni, qeesetinna Leewwitoti welti Duuchchi Woddike goottike galmibaa me'e. Isinna Duuchchi Woddik Goottik galmi giddo afemeemmaka ookkone seerike maxaafika hiyyichcho duuchcha ardakee haasesse. 31 Moyanjikinna sooddoti bira uurreexxi Duuchchi Woddike Gootta hordofatee mitte godobininna shenitte hedhonni ajajuwwa, seeruwwakanna aada isixxa heqqedhatee konne maxaafa'ni borreessemeeke kakotike hiyyichchi'a ajajemo'a Duuchchi Woddike Gootti edo kako haaronse.

32 Ookkoneechchi uduma Biiniyaamika ardinna Iyyerusaalemii afemeeka manna duuchcha tenne yaane'n kako aagaashsha asse; konne qicinni Iyyerusaalemiki ardi ifike edike annuwwik Mageni ajajeemmaxxe Mageniinxe kakooshsha duuchchiinxa muunxe.

33 Moyanji Iyyosiyaasi diqachiisaxxa magenoofachchotixxa fakkuwwa duuchcha Isira'eelike boga duuchchanaa'ni fugusse; Isira'eelike bogi giddo hedhemmaki duuchchi Duuchchi Woddika Gootta insa'neka Mageno magenoofantaashsha asse. Isi moyemmake hedhoti hedhammake baro'ni Duuchchi Woddika Gootta ifike edike anuwwika Mageno hordofatenaa'n udumi'a hingebaan.