1 Ayyaaniinxe muuxema uduma ookkoo hexxemmaxxi Isira'eelito Yihudiinke qachchuwwibaa marteexxi magenoofantammaxxa soodduwwa enqite; Asheeraxxe soodoxxa misiluwwa butuchchite. Ittanni Yihudiinke boga duuchcha'ninna Biniyaamike, Efireemikenna Minaaseke boga'ni hedheeka tullichchuwwake'n magenoofantammaka boonchuwwanna tolchimalchuwwa balleessine; Isira'eelito konneechcho duuchcha balleesiteechchi uduma ifike qachuwwibaanna bogibaa higge.

2 Moyanji Hiziiqiyaasi qeesenna Leewwito ciincatika tolchanna mittomiinka tolcha shiqinsaashsha, ergatendaashshanna galateefattaashsha ittanni Duuchchi Woddike Goottike galmi giddo faarsitaashsha qeesenna kadi leewweto mitti mittinga huje huje insa'nexxishshanni ugge. 3 Duuchchi Woddik Goottik seera'ni borreesendemmashshanni moyanji gorsanna galgala iittanni edike sanbata sanbata'n, haarooxxi baate fuldammake ayyaana'ninna, mureemek ayyaanuwwa'n ciincatee shiqaaka tolcha moyanji Hiziqiyaasi ifixxe karranaa'n uwwe.✝ 4 Qeesolenna Leewwito duuchchi wodda Duuchchi Woddike Goottike seeri'a ergatendaashsha Iyyerusaalemike ardi insa'ne'a hasisaaka qoobbo uwwaashsha ajaje. 5 Isira'eelito konne moyanji ajajeeka ajaja laqeeshshanni midhdha, woyyinetixxa booka, ejersiinxa zayitenna malebo ittanni fichchake'n huccineechchi duuchchanaa'n umo uune; horanetechcho hooneechcho duuchchinaa'n tommekenaa'n mitte anga hara bira saxxeexxa uwwa iyyedange.✝ 6 Yihudike qachchuwwa'ni hedhammaki Isira'eelitonna Yihudiinki manni horuwwa insa'nekenaa'n, re'etenaa'ninna gedhebuwwakenaa'n Duuchchi Woddike Gootta insa'neke Mageni'a foonemmachchika tommekenaa'n mitte anga iyyedange tuulle. 7 Tenne uwwa sakkake agenjonaa'n sanfeexxi torbake agenji qico'n muunxe. 8 Moyanji Hiziqiyaasinna Ja'laabuwwi isiki dageexxi tenne tuullendeexxa uwwa uundeexxi Duuchchi Woddika Gootta galateefante Isira'eelika ardanna eebbinse.

9 Hiziqiyaasi qeesenna Leewwito tenne tuulleexxee insa'ne qore. 10 Saadooqike mini hadiki qeesetiki akeekisanji Azariyaasina «Ardi uwwa Duuchchi Woddike Goottike galmibaa iyyedagexxe yannanaa'n inde goddine'naa gateen; Duuchchi Woddiki Gootti arda ifika eebbisemmaxxee tinni lumoxxi gata dandeteen» hiyye. 11 Hiziqiyaasinna Duuchchi Woddike Goottike galmi giddo doone ugginaashsha ajaje: insa'nenna uggine. 12 Ookkoneechchi uduma insa'nexxa uwwa, tommekenaa'n mitti anganna woyyondeexxa uwwa addatenshati iyyedangeexxi aassine. Leewwichchi Konaaniya konne miyuwwike sooreessa kadda wodda dayyi isiki Shimii baaleti isi'a langabamman. 13 Yihi'eeli, Azaaziya, Nahaati, Asaheeli, Yirimooti, Yozabaadi, Eli'eeli, Samakiya, Mahaatinna Bennayaasi hinaakiiri tomme Leewwito filende. Konne duuchchiing moyanjo Hiziqiyaasinna qeesetike akeekisanjo Azaariyaasi darre'n baallomexxe Koniyanna dayo isike Semi'el hunda ergatema'emman. 14 Boroti darrexxa hula heqqammak Leewwichchi Yiminak belt Qore kinni ifixxe eeyanni Magenoke shiqqexxe uwwa'ni Duuchchi Woddike Goottixxa uwwanna foyeendexxa yaanuwwa qoodatixxa baalle afeemman. 15 Eden, Miniyaamini, Iyyaasu, Shema'iyya, Amaariyanna Sekaaniyate fira ifkixxe qeese lumokenna kadi shiixxarammake qoobbi qoobbishshann qoodati addatenshat insa'ne gargaare.

16 Higgeenni ila ilatike maxaafa'ni summi insa'neki borreessemeekinna barra barra'ninni gargar hexxeexxea insanexxa hujenna uwwemeeke insa'neke qoobbixxe qixxe'ninna uwwendexxa huje hujatee Duuchchi Woddik Goottik galmi giddo e'ya dande'ake sase wogganna ookkoneechchi iimi darre hexxeexxi labbaxxe oose'a ittanni huje uune. 17 Ilatike maxaafa'ni mini mini insa'nekike hadike laakkossa'ni hexxeexxi qeese lame tomme wogganna ookkoneechchi iima hexxeexxe Leewwito'a hujetike qoobbishshanna hujetixxe uwwashshanni insa'ne'aanna qoonde. 18 Konne ilatike maxxafa'n borreessemeek duuchinge ardixxa oose, aruwwa, labbaxxinna meyyaxxi oose mitteba ifi qullonsati xuurameeyyetemman.

19 Insa'nek qachchi qarqara hedheeke fichchiba yookaan wele qachchuwwa duuchcha'ni hexxa'neexxe qeesichcho Aaroonixxe horte'aanna; insa'nexxe oddo'ni hexxeexxe labbaxxenna Leewwitotike ilake maxaafa'ni borreesemeke duuchchi'a iitta qoondaashsha summi summiki borreessineeki manni hedhemman.

20 Moyanji Hiziqiyaasinna Duuchchi Woddike Gootta ifike Mageni edo elokenna qajeela manjo kadati Yihudiinke boga duuchcha'n hujeexxi huje tenneten. 21 Isinna Duuchchi Woddike Goottike galmi giddo ergematinna kaddoo Magenke seeri'anna ajaji'a hiremat asseexxa duuchcha mitte godobinni Mageno ifika halseemmaxxee duuchchiinxi isi'a qajeelde.