Aasaxxa Udumixxa Wogguwwa
(1 Moy. 15:17-22)
1 Aasa moyemmaxxe sase tommenna jaane wogga’n Isira’eeliki moyanji Ba’isha Yihudake’n duleexxi Yihudiinka moyanjo Asaxxe galchanaa’n ayyinna fulabaashsha, ayyinna ookko’a marabaashsha hoyyo’a Raamma’n kollifachcho giise.
2 Aasanna Duuchchi Woddike Goottike galmanaa’ninna ifike moyatomatike mi’yuwwa massatikenaa’n birretika sibiljonna worqe adhdheexxi Demasiqo ofo’le galchammake Sooriyake moyanji’a Beenihadadaa’a erge. 3 Ookkoneechchi uduma «Bire anke annixxenna atike annixxe oddo’n hexxemmaxxi duuchcha telchonna anxenna atixxe oddo’n weli aggotika seera uggudhdhino; tennexxee Isira’eelik moyanji kunse birretika sibiljonna worqe ati’a ergeennen; anenaa’n udumi’a hige me’aashsha Ba’ishanni anixxe galcha giddii’ni fulchaasha anee gargaartatoshsha hiyye insa’nenni welti weli aaggetaxxa kako diigi» hiyye.
4 Beenihadaadi moyanjo Aasaka yaada adhdhe; isika loliinke mannika ajajalluwwa Isira’eelike qachchuwwa’n duulchise. Insa’nenna Iyyonii’i, Daanii’i, Abeeli Beeti Ma’iikanna Nefitaalemika miya masseccatika qachchuwwa duuchcha lolle injifante ifike asse’ne. 5 Ba’isha tenne laqeexxa yanna Raama’n kollo ijaadhdhammaxxa waale; hujetanna oddonde’n uurrise. 6 Moyanji Aasanna Yihudiinka manna duuchcha bukki asse iyyedage; insa’nenna Baa’oosi ijaarammaxxa kinona haqqe adhdhine; Aasana Geba’oonikinna Mitsiphaka qachcha ijaare.
7 Eettene yanna wabeeki Hanani Yihudiinke moyanjo Aasaba dageexxi hiyyee qici: «Duuchchi Woddika Gootta atika Mageno addata gibee Soriyake moyanjo’n addattettaxxee Sooriyake moyanjiki loliinki manni anga atixxenaa’n fuleen. 8 Tophiyiinkinna Libiyaki ardi heddo laakkossika loliinka sarageelluwwanna fadhiki welti jajjabi loliinki mann hedhemmabaata? Kaddo malee Duuchchi Woddike Gootta’n addattettaxxee insa’nee anga atixxe’n sa’ise uwween. 9 Mitte godobinni iso’n addataakaara jabeessatee Duuchchi Woddike Goottixxi ille butta duuchcha uuddaaxxen. Ati gowwummatixxa huje hujjettaxxee konneechchinni edi’a loli atenaa’n ke’abaan.»
10 Tennenaa’n kexxeexxa Aasa wabeekake’n mufate; yo’oshsha aaremmaxxee isoo usursise. Eettene yanna’ninna Aasa mitte mitte manna miice.
Aasaxxe Moottumaxxa Muuxensha
(1 Moy. 15:23-24)
11 Aasa moyemmake baro’n ke’itokenaa’n muuxamii qico’n hujendeexxi huje Yihudiinkenna Isira’eelike moyanjuwwike jirtetike maxaafa’n borreessendeen. 12 Aasa moyexxe sase tommenna sallanixxe wogga’n jaba qicini lekka ela gophe; ela gonphe iso’n jabatoolenna midde tenne ela gonphe giddo ci’leeyye malee Duuchchi Woddike Goottika gargaarsa halsebaan. 13 Aasanna shoole tommenna mitte wogga moye reye; isike edike annuwwishshanni reye. 14 Rensha isika gargari hexxeexxa qimamuwwanninna yo’osha fishshitaaxxa shittoki fooli hedheexxe rare’n uggine; isi ifi’anni Daawwitike qachchi giddo kino bocise ifi’a giissedheeke hirreessa’n isoo masine. Isike ulfini’a haqqe tuulle giira ha’inshe.