1 Mageniki haafuri Odeedike belto'n Azaariyasini'ni dirre. 2 Azaariyasinna moyanjo Aasanni afemo'a mareexxi hiyyee qici, «Koo moyanjo Aasaa! Ani hiyyaannexxa! Ha'no Yihudiinkenna Biiniyaamiki mann duuchchi ani hiyyanexxa laqqe; ha'no Duuchchi Woddike Goottinni welti hexxinaa wodda isinna ha'nonni welti hedhaai; isoo halsitinaa wodda isinna ha'no'a afemaan; waldinoole kinn isinna ha'noo waalaan. 3 Isira'eeliki ardi dhugaatike Mageni belo, barachchiisaake qeesichchi belonna seeri belo lumoka baro hedhaamman. 4 Rakko insa'ne'n gelte wodda kinn Duuchchi Woddike Gootta Isira'eelike Magenbaa hingeexxi isoo halsineen; isinna afeme. 5 Ookkone baro'n bogake'n hedhemmake duuchcha'n jabaxxi waakensha hexxemmaxxee nage'iki fulee nage'iki aagaaki hedhemmabaan. 6 Mageni gargari hexxeexxe rakkonni insa'ne rakkisammaxxee mitte mootumma wele mootumma mitti qachchik ardi wele qachchika arda biraamman. 7 Ha'noo kinni ha'nooxxe hujeka hira alfitinaammaxxee jabaatte, hujete'ni gooffinoqqe'e.»

8 Aasa konne hiyyichonna wabeek Odedik belti Azariyaas* haaso'eeka raaga laqee wodda jabaate. Yihudiinke boga duuchchanaa'ninna Biniyamike boganaa'n Efireemike tullichchuwwa'n isi booji'e abixxemmake qachchuwwanaa'n diqachchiissaxxa fakkuwwa fugusse. Duuchchi Woddike Goottike galmi edo hedheeka Duuchchi Woddike Goottika tolchimalcho qammachche.

9 Duuchchi Woddik Gootti isik Mageni Aasanni welti hedheexxa uundeemmaxxee, Efireemixxe, Minaasexxenna Siimi'oonixxe gosanaa'ni heddi manni Aasaba dageexxi isike bogi giddo he'naamman. Aasanna kunni manni duuchchi iittanni Yihudiinkanna Biiniyaamika arda bukki asse.

10 Insa'nenna Aasa moyeexxe tommenna ondixxe wogga'n sakkake agenjo'n Iyyerusaalemi bukki hine. 11 Eettene yanna'n boojine iyyedangeemmake hori giddii'n torbaane dhibba jiboota, torbaane kuma gedhebiinxanna re'etixxa korbeeyye Duuchchi Woddike Gootti'a tolchine. 12 Insa'nenna Duuchchi woddika Gootta ifike edike annuwwika Mageno ifixxe mitte godobinninna shenitte hedho isoo halsino'a kako aange. 13 Duuchchi Woddika Gootta Isira'eelika Mageno halsabaak duuchcha kinn shiixxokenna kado lumok, labbakenna kado meyyaxxa shiyyendaashsha kakante. 14 Insa'nenna tennee lumoke haafuurinni ililinsa'n inbiltakanna malagata ufuunfa'n Duuchchi Woddike Goottike summinni kakante. 15 Yihudiinki ardi duuchchi mitte godobinni kakateemaxxee gammande. Insa'nenna Mageno mitte godobinni halsine; isinna insa'ne'a leelle; tennexxee Duuchchi Woddiki Gootti insa'ne duuchchinn darrenaa'n nage'iki he'naashsha asse.

16 Iittanni moyanji Aasa akka'o ifixxa Ma'aka battondeexxe Asheera hiyyendaaxxe fakkeexxa sooddo uurrisseemmaxxee ballomiinxe bakkanaa'n isee hoyye. Aasanna sooddo eettene butuchche; buttuttemmaxxanna Qedironixxe dhooqa'n gube. 17 Fedhexxinninna midde tullichchuwwake'n magenoofachchotike boonchuwwa duuchcha Isira'eeli giddii'n bayyiseba'a; kaddo malee Aasaxxi qalbe baro isike duuchcha'n hara Duuchchi Woddike Gootti'a hirendeexxemman. 18 Isinna anni isik Magenokee woyyonsinemaka birreti sibljo, worqenna gargar gargar hedheeka miyuwwa duuchcha galmi giddo ugge.

19 Aasa moyexxe sase tommenna onde wogga qico'n bogake'n loli hedhemmabaan.