1 Moyanji Solomoon soodachcho muxxeexxa yanna giira iimi'n ibee ciincatika tolchanna wele tolcha itte; Duuchchi Woddike Goottiki ulfinni galmi giddo wo'me✝ 2 Galmi Duuchchi Woddike Goottike gaachchanni wo'meemmaxxe qeese galmi giddi'a e'ya dandetebaan. 3 Isira'eelito duuchchi giira iimi'n ibba'naa, Duuchchi Woddike Goottika gaachchanna galmi iima uuddeexxi ba'linnake'n gulufantteexxi, albiki butti'a gonbisemmeexxi sagande; hina'nina Duuchchi Woddike Gootti'a galata shiqinsee qici,

«Isi elokeni

jaalala isixxinna duuchchi woddi'a hexxaani»

hina'n Duuchchi Woddika Gootta galateefante.✝

4 Ookkoneechchi uduma moyanji Solomooninna ardi duuchchi Duuchchi Woddike Gootti edo tolcha shiqinse. 5 Moyanji Solomooninna lame tommenna lame kuma jiboota, mitte dhibbanna lame tomme kuma re'enna gedhebo tolche; moyanjikinna ardi duuchchi konne qicini Mageniinka galma woyyoonsine. 6 Qeesetinna uwwendeexxe bakka'ni uurrite; insa'ne edii'ni Leewwito uurriteexxi edi gama moyanji Daawwiti Duuchchi Woddiki Gootti saadatee la'onfatammaxxe faarotike miyinni «Jaalala isixxi duuchchi woddi'aten» Duuchchi Woddika Gootta saadde hina'ni faaroti isoo saandaamman. Qeeseetinna malagata ufuuffaa wodda Isira'eelito duuchcha uurriteemman.

7 Solomoon giissemmaki sageettotiki tolchimalcho ciincatika tolcha, midhatika tolchanna ha'yo abida dande'a gopheemmaxxe Duuchchi Woddike Goottike galm edi darre oddote'n hedheeke ba'liniinxa kuta garigariti asseexxi ciincatika tolchanna mitoomiinke tolchika ha'yo ookkoo ciinceesse.

8 Eettene yanna Solomoon Isira'eelike ardi duuchchinni welti torbaane barra ayyaana ulfeesse; ardikinna Hamaati'a me'inammake oribaa'n Gibtseke galaani qico'n hedheeke boganaa'n dageeke yo'oshsha bira sa'eeke tuutamman. 9 Tolchimalcho Duuchchi Woddike Gootti'a foyatike seera'n torbaane barra sa'isine; wele torbaane barra ayyaana ulfeesina'n tureechchi uduma saddeetixxa barra'n ayyana muuxatika seera assine muunxe. 10 Solomooninna torbake agenjixxe lame tommenna sakkaxxe barra'n ardi ifi ifinge minbaa me'ashsha asse; ardikinna Duuchchi Woddiki Gootti Daawwiti'ana Solomooni'a ittann Isira'eelike ardi'a assemmaxxe eloxxe yaane duuchchi'a qalbeti gamanda'n ililnsa'ni me'ine.

11 Solomoon Duuchchi Woddike Goottika galmanna mootemmatike minixxa huje bire; Duuchchi woddike Goottike galmi'anna ifike mootumatike mini'a hujo'a godobi giddo hedemmaxxa duuchhca muuxeechchi uduma. 12 Duuchchi Woddiki Gootti iso'ni hashsha leelleexxi hiyyee qici:

«Soodachcho atixxa laqeennen; konne galma ani'a tolcha shiqqaaxxe bakka kaddaashsha fi'leennen.

13 «Xeeni ganabaashsha iimuwwa cufeennele yookaan midha ito'a awwaanneessa ergannele yookaan dhukkuba anke arda'ni ibesanno wodda duuchcha, 14 anke summini ye'emeeki ardi ifi salphisee soodatoole, aneenna harse hunjaammaxxe fuggoxxa huja waalloole ani iimanni hedhee laqannon; cubbo insa'nexxanna gattowwaali hiyyannoni; boga insa'neke'ninna midha missaashsha assannon. 15 Ta'anna konne booncho'n soodanta'neexxa soodachchabaa ille anxi uuddaan; mansha anxininna laqannon. 16 Summi ank duuchchi woddi'a kaba ye'emaashsha konne galma fi'leennen woyyoonseennen. Godobi ankinna ille anxi duuchchi wodda ookko hexxaan.

17 «Anni atik Daawwiti assemmashsha atinna addatenshati ani'a ergatendottole, seeruwwa ankanna aada anxa heqqexxe ajajuwwa duuchcha muuxxottole, 18 anna tike Daawwiti'ni, ‹Atixxe horte giddii'ni Isira'eeli moye galchaaka gophabexxon› hiyyee isi'a kakatennashshanni moote atixxa jabeessannon.✝

19 «Yaane kinni ha'no ane hordofatenaa'n uduma uwweenneka seeranna ajajuwwa heqqedha gophphinoole, wele magenuwwanna ergatendinoolenna magenooffatonoole, 20 eettene yanna ani ha'no'a uwweneke boganaa'ni ha'no goshannon; anke Saumma woyyeense konne galma waalannon; arda duuchcha edo mammaakendinaakenna oso'lichiinke assannon. 21 Kunni galmi ta'a yo'oshsha ulfateeke kadoolenna isi birii'n sa'aaki duuchchi majani hiyyati, ‹Duuchchi Woddiki Gootti konne boga'ninna konne Galma'n mayee iitta hexxeexxa yaane asse?› hiyyaan. 22 Ardikinna, ‹Duuchchi Woddik Gootti tenne ba'ne duuchcha insa'nenni geessiseechchi Gibtseke boganaa'n insa'nee fulchemmaka edika annuwwi insa'nekika Mageno waalleexxi wele magenuwwa hordonfemmaxxe magenoonfantemmaxxeenna ergatememmaxxeten› hine hiissinaan.»