1 Solomooninna Iyyerusaalemi giddo Duuchchi Woddik Gootti anna isikee moyanjo Daawwiti'ni leelemaba Moriyaxxe kooba hana Iyyaabusichcho Oriinaxxe aldu'me'ni Daawwiti qophpheeseke booncho'ni Duuchchi Woddik Goottika Woyyichcha galma ijaarsa safe.✝ 2 Isinna Solomoon moyeexxe shoolgaxxe wogga'ni langake agenjo'ninna langaxxe barra'n galma ijaara safe.

3 Moyanji Solomoon ijaarisiseeke galmixxi booso, qeerinni jaane tomme ciqile kadaa wodda godobikinna lame tomme ciqilemman. 4 Galminba'a e'yinammaxxe hulaxxi soroxxi hojja lame tomme ciqile onde kadaa wodda, lame tomme ciqilemman, giddonna ca'itte werqenni buqe. 5 Galmiinxa lumoxxa kuta hi'neesinke haqichchinni buqeexxi hanna ca'itte worqe buyye, itti hanna meexxet haqichchixxanna haachchabiinxa fakke hana giisse. 6 Moyanji Solomoon galma fiixeeke kinjininna Faaruwwayike boganaa'ni daggeexxe woriqenni danchoossemman. 7 Galmiinxe heellichcho hana uggemaaka dagalisanjo, gubanuwwa, gimuwwanna cufanuwwa worqeti buqe; gimuwwate'ninna Kirubeelixxa fakke hana giisse.

8 Isinna hara Woyyite baka hinaaxxa giddixxa kuta giisse; ba'linnikinna lame tomme ciqile, godobikinna lame tomme. Hara Woyyite heellichchuwwa lame tommenna kuma kiilo gelteexxe ca'itte worqe hana bunqe giissineemman.✝ 9 Woriqetixxi misimaaruwwa onde dhibbanna torbaane tomme giraama birteen. Hara woyyitexxa iimi darrexxa kutuwwa iittanni worqeti buqe.

10 Hara woyyitte kuta giddo lame kirubeelexxa fakke siblik* giisise hana worqeti buqe. 11 Kasakenaa'n kasii qico'n weli abidee farri hiyyek kirubeeliki keeli lame tomme ciqile. Siretike kirubeelichchi mitti keeli onde ciqile kadeexxi galmiinxa gimo tuqa wodda, weli onde ciqile kadeeki keeli kinn langake kirubeelika keela tuqaammani. 12 Itanni langake kirubeelki mitte keelik qeerrinn onde ciqile kade kallachchake'ni hedheek galmiinxa gimo tuqa wodda, onde ciqile kadaa wodda weli keeli kinn siretika kirubeelika keela tuqaammani. 13 Farri hiyyeeke tenne kirubeeliki keeluwwi lame tomme ciqile kadaa wodda; alba insa'nek galmixxe umoke kadexxe kutaba'a wirri assine lekkati uurinemmani.✝

14 Higgeenni hanjaaxxe boorajiteti, baddeessitte, fuutta suunqe ganneeke diimmooke shimalininna layinoti golo giissexxi kirubeelixxa fakke hana seese giissemmani.✝

15 Galmi edi dare mitteba qeerrinni sase tommenna onde ciqilenna gamisa lame utuphuwwa hujeexxi, galmiinke albi edo uurrise. Mitti mittinge utuphi hana qeerrinne onde ciqile kaddeexxa lame bokkuwwa afeemman. 16 Weli'anni weli sagaremeeka haachchabuwwa giissexxi utuphpiinxe qacce'n welti afensise. Ookkoneechchi uduma dhibba roomanetixxa gumma giissexxi haachchabuwwiki welti abidise. 17 Utuphuwwa mitte bita'ake'n wele middaka'n uggeexxi Galmiinke albi edo uurrise; bita'i darree'n hedhemmaka Yaakin* middi darree'n hedhemmaka Boo'ezi* hiyye summa fulche.