1 Qeesichchi Yodaahe Torbaaxxe wogga'n hunnaammeessake kade; dhibbiinke ajajalluwwa kandeeke Yirohomike belti Azariyaasi, Yihohananik belti Isima'eli, Obediki belti Azariyaasi, Adayaaki belti Ma'iseyanna Zikiriki belti Elishafixxinni welti kako aagge. 2 Insa'nenna Yihudiinke bogibaa me'ineexxi Leewwitonna Isira'eelike mini hadika akeekisanjuwwa qachcha duuchchanaa'n bukki assine. Iyyerusaalemi'a iyyedange wodda 3 Ya'i duuchchi Mageniinke galmi giddo moyanjiki welti kako aage.

Qeesichchi Yodaahe insa'ne'n hiyyee qici, «Duuchchi Woddiki Gootti Daawwitixxe horte'a addachiisemmashshanni kunse moyanjiinki belti Iyyo'aasi moyaan.✝ 4 Ta'a no'o assitinnaa qici konneechchinni butti'a hexxeen: qeesetinna Leewwito Edi Sanbatiinxa barra ergematee dangaa wodda insa'ne giddii'n sasekenaa'ni mitti galmiinxe dalla'ixxa huluwwa heqqowwaal. 5 Sasekenaa'ni mitti mootummatika mine sasekena'ni mitti oddottixxe hula hiyyendaaxxa heqqe; gateeki manni duuchchi Duuchchi Woddike Goottike galmike loola'ni bukki hinowwaal. 6 Ergemate'ni hana hexxeexxe qeesenna Leewwito malee huuni manjinna galmi giddi'a e'ya hasissabaan; qeesetinna Leewwito kinni Duuchchi Woddike Gootti'a gargar foyemeemmaxxee e'ya dandeenaan. Gateek ardi Duuchchi Woddike Goottika ajaja muuxatee galmi gadhi darre he'nowwaal. 7 Leewwito loliinka miya ifika anga abixxine moyanji qarqara uurtowwaal; galmi giddi'a e'yaaki huuni manji shiyemowwaal. Moyanji me'a'neeke booncho duuchcha'n isixxa duuka me'inowwaal.»

8 Leewwitotinna Yihudiink ardi duuchchi qeesichchi Yodaahe ajaajemmashshanni asseen. Qeesichchi Yodaahe heqqanjummatixxa huje hujammakeeranaa'ni ayyeena geegesemmabaan. Mitti mitting Edi Sanbatiinxa barra hujete'n bobba'akaaranna huje muuxee fulammakaara ifika manna adhdhe. 9 Yodaahenna Galmi giddo hedhemmaka moyanjo Daawwitika bageduwwa, lumollanna shiixxaramma wontuwwa dhibba loliinka manna ajajammakeeri'a uwwe. 10 Manni duuchchi mitti mitting loliinka miya anga abixxeeshshanni galmiinke bita'anaa'ni middii qico'ni tolchimalchonna galmi bira moyanji qarqara uurrinaashsha asse. 11 Qeesichchi Yodaahenna isixxi labbaxxi oose moyanjiinka belto aaxxe daggeexxi kallachcha iso'ni uggine; kakotika maxaafa iso'n uunexxi isoo moyanjokee assine. Insa'nenna iso'o hariirreexxi hafuurakanna gikki assine, «Moyanji duuchchi woddi'a hedhowwaal!» hine. 12 Gotooliyanna qeexala'ni moyanjo gammado leelisha'neek ardika hoga laqqeexxi ardi hedhemmabaa Duuchchi Woddik Goottike galmibaa me'ite. 13 Moyanji e'yinammaxxe hulaba hedheek utuphi bira uurree'naa isenna affe; loliinki ajajalluwwinna malagata ufuufamakiirinna moyanji bira hedhemman; ookkone bogik manni duuchchi gammada'n malagata ufuufaamman. Faarsaleeyyetinna meelliinke miyinna qoqqobende ayyaaniinxa faaro akeenka'nemman. Gotooliyanna seemma ifixxa darteexxi tinni seeribeloteni! Tinni seeribeloteni! Hita'n cancite. 14 Qeesichchi Yodaahenna dhibba loliink manna ajajamakaara hiyyee qici, «Gootoliyaa daleeke manni giddi'n fulchitine iyyedagge; iseexxa duuka dagaaki hedhoole shiwwe» hiyye insa'nebaa erge. Qeesichchikinna, «Duuchchi Woddik Goottiki galmi giddo isee shiltinoqqee» hiyyeemman. 15 Isenna mootummatike minik dalla'i giddo fadhadi e'yaaxxe hula hineeke booncho'ni gelteeshshanni isee abinde; iseenna ookko shinne.

16 Qeesichchi Yodaahe umi ifikinni, ardinna isik moyanji Duuchchi Woddik Goottik arda kanda'neexxa kako aage. 17 Ookkoneechchi uduma ardi duuchchi me'eexxi Ba'aalika magenoofachchotixxa fakkuwwa diige; tolchimalchonna fakkuwwa enqe bire; Ba'aalika qeesichcho Maataninna insa'nek tolchimalchi edo shinne. 18 Qeesichchi Yodaahe Muuseke seera'ni borreessendemmashshanna Daawwitinna ajajemmashshanni gammadikinna faaroti ciincesemaaka Duuchchi Woddik Goottika tolcha shiqinshaashsha Daawwiti uggemmaxxe qeesenna Leewwito Duuchchi Woddik Goottika galma insa'ne heqqinaashsha baalloonse. 19 Iittanni fedheeki batto'eek manji Duuchchi Woddike Goottike galmiinke dalla'ixxe huluwwa'ni e'yabaashsha heqqanjuwwa ugge. 20 Dhibba loliinka manna ajajamakaara, ja'laabuwwa, arda akeekamakaaranna ookkone bogika arda duuchcha aadheexxi mayanjo alee'ni galmake'na'n adade aadhe dage. Alee'ni E'yinammaxxe hula darree'n mootummatike minibaa e'yineexxi moyanjo mootummatixxe moote hana ofo'linshe. 21 Ookkone bogik ardi duuchchi gammade; Gotooliya shiyendeemmaxxee iikki qachchi nage'a alfe.