1 Iyyosiyaasi Duuchchi Woddike Gootti'a Iyyerusaalemi'n sa'atika ayyaana ulfeesse; siretike agenjo'ni tommenna sholgaxxe barra'ni sa'atike ayyaanik gedhechchi duleme. 2 Isi qeese hujjaaxxa huje'n qoode; Duuchchi Woddike Goottike galmi giddo jabaante ergatemmaashsha jajjabeesse. 3 Isira'eelito duuchcha barachchiissaammaxxanna Duuchchi woddik Gootti'a ifi footeexxe Leewwito'n hiyyee qic, «Duuchchi Woddike Goottika taaboota Daawwitike belti Solomoon hujisemmake woyyichcha galmi giddo ugge. Konneechchi uduma Kakotika taaboota dukkinoqqe'e; ta'anna Duuchchi Woddika Gootta ha'nooka Magenonna arda isika Isira'eelii'i ergatemme. 4 Isira'eelike moyanji Daawwitinna belti isiki Solomoon borreessinemmaxxe akkeetteshsha ifi ifike mini hadinn woyyichchi galmi giddo ergatenshatee ifi ifi qopheesse.✝

5 «Leewwito kadebaake ha'nooke dayyuwwi edo, ifi ifike mini hadinni woyyitte bakka'n uurre; mitte mittenge mini hadi'anna Lewwito hexxewwaal. 6 Ookkoneechchi uduma sa'atike ayyaani'a shiqqeexxa gedhebiinxa korbeeyye dulle; ha'noonna ifi woyyoonse; Duuchchi Woddik Gootti Muuse darree'ni ajajemmashshanni dayyuwwa ha'nookee dule qopheese.»

7 Moyanji Iyyosiyaasi ookko hedheeke ardi duuchchi'a sa'atike aayaanike tolchi'a sase tomme kuma gedhebiinxanna re'etixxa korbeeyye iittanni sase kuma jiboota ifike horenaa'ni uwwe.

8 Moyanjuwwinki ja'labuwwinna tolchakee shiqeek ardakee, qeesetenna Leewwitotee ifixxe eeyyanni uune. Mageniinke galmike sooreessuwwa kadeekiir Hiliqiyaasi, Zakaaryaasinna Yihi'eeli sa'atike ayyaani'a shiqqaaka lame kumanna jaane dhibba gedhebo, iittanni sase dhibba jiboota uune. 9 Higgeeni Konaaniya, dayyuwwi isik Shema'iyanna Neetani'eeli iittanni Leewwitotik akeekisanjuwwi Hashabiya, Yi'i'e'eelinna Yozabaadi sa'atike aayaani'a tolchii onde kuma gedhebonna re'e, onde dhibba kormoole Leewwitotee uune.

10 Sa'atike ayyaanixxa qophpheeffachcho muunxeechchi uduma, moyanji ajajeammashshanni qeese ifi ifixxe kuta giddo uwwendemmaxxe bakka'n Leewwitoti welti ifi ifika booncho abixxite uurrite. 11 Sa'atike ayyaani'a gorra'emeeka gedhebiinka buruuse Leewwito dulde. Qeesetinna tolchimalchi hana munde fixxe. 12 Muuseke seera'ni borreessendemmashshanni Duuchchi Woddike Gootti'a shiqinsaashsha mini mini hadi'a uwwemeeke qoobbishshanni ardakee uwwatee ciincatika tolcha foone. Eettene jibootatanna iittanni foone. 13 Leewwitonna seeriinshanni sa'atike ayyaanika tolcha dudhishshe; eettene woyyitte uwwa odolchote'ni, huburake'ninna disitete'ni gaffeexxi malaakanna ardakee rakke qoodde.✝ 14 Ookkoneechchi uduma qeesetinna ifi ifi'a qophpheesite; Tennee assiteechchinna qeese Aaroonixxi oose ookkonee ciincatika tolchanna ha'yo duuchcha hashshi qico'n ciincesitammaxxeten; tenexxe Leewwito ifi'anna qeese Aaroonixxe oose'a qixxeefachcho assite.

15 Konnechi butta summi insa'neki hedheexxi Leewwichcho Asaafixxe hortexxi faarsaleeyye moyanji Daawwiti uwweeke ajajishshanni, insa'ne'a uwwemeeke booncho'ni he'nema; ina'nenna Asaafi, Hemaaninna moyanjo wabeeko Yidutaanitemman; wele Leewwito sa'atike ayyanika tolcha shiqishaammaxxe'e Woyyichcha galma heqqaamak heqqanji insa'nek boocho waalamabaan.✝

16 Konne qicinni sa'atika ayyaana ulfesatinna ciincatika tolcha Duuchchi Woddike Goottike tolchimalcho'ni shiqisat Duuchchi Woddike Gootti'a shiqqaxxa magenooffachchotixxa aada duuchcha, moyanji Iyyosiyaasi ajajemmashshanni eettene barra'ni muuxeme. 17 Eettene yanna ookko hexxeexxi Isira'eelito duuchcha sa'atika ayyaana ulfeesite; iittanni kebbotika ayyaana torbaane barra ulfeesine.✝ 18 Wabeek Saamu'eelike barinni kayyi'a Isira'eelito iitta hedheeka sa'atika ayyaana ulfeesite egendebaan; moyanji Iyyosiyaasi eettene qeese, eettene Leewwito, Yihudiinke boga duuchchanaa'ninna Isira'eeli giddii'ni, ookko hedhammake Iyyerusaalemike manninni welti ulfeessemmeeshsha Isire'eelike moyanjuwwinaa'ni mittikinna ulfeesseek hedhebaan. 19 Kunni sa'atik ayyaani ulfeessemeeki Iyyosiyaasike baro'ni tommenna saddeetixxe wogga'nitemman.

20 Moyanji Iyyosiyaasi woyyichcha galmi'a tenne duuchcha qixxeessee bireechchi uduma, Gibtseke moyanji Nika'u Efiraaxisike galaani bira Karekemishi hinaa booncho'ni lolakee fule; Iyyosiyaasinna lolo'a fule. 21 Niika'u kinni Iyyosiyaasii'n, «Koo Yihudiinke moyanjo atenna anee lolenchiisa'negeechchi maacho? Ani dagenneki naapha anika lolonnaate malee atee lollonnaatebaan; naapha anka rakee lollonaa Mageni anee ajajeen. Tennexxee aninni welti hedheeka Mageno giba waali, waala gophphottole atee balleessaan» hiyyee erga erge.

22 Iyyosiyaasi kinni ifi wele manjo fakkeese isoo lolo'a fule malee udumi'a higebaan; Megidoke diida'ni lolo'a fule malee Nika'u darree'ni Mageni haaso'exxa laqatee hasebaan.

23 Gabeti lolaammaki moyanjo Iyyosiyaasii'i ote; isinna loliinka manna ajajammakaara, «Fuggo mado'eennen kabaa'ni anee fulche» hiyye. 24 Insa'nenna isoo loliinxe gaarenaa'ni dirrinseexxi ifixxe gaare'ni ugginee Iyyerusaalemi'a aa'ne me'ine; isinna ookko reye. Isinna edike isike annuwwike hirreessa'ni moogeme. Yihudiinkinna Iyyerussaalemiki ardi duuchchi isi'a boochise.

25 Wabeeki Ermiyaasi moyanjo Iyyosiyaasi'a yaaddotixxa gince borreesse; labbakinna meyyaki boochchisa fulchammaki manni duuchchi telchi qico'ni tenne genceenni Iyyosiyaasii'i qaabbanta'ne he'neen. Tinninna Isira'eel giddo baratendee kaddeexxi Isira'eeliitotixxa oodhishshatixxe genceke maxaafa'n borreessendeen.

26 Iyyosiyaasi moyemmake baro'ni hujende muuxendeexxi wele hujuwwanna Duuchchi Woddike Goottike Seeriinke maxaafa'ni borreessendemmashshanni, isi hujemmaxxi eloxxi huje, 27 ke'itokenaa'ni muuxamii qico'ni isi assemmaxxi duuchcha Yihudiinkenna Isira'eelike moyanjuwiinke maxaafa'ni borreesende'een.