1 Yihudiinki ardi Iyyosiyaasika belto Iyyohaazii aadheexxi aniinxe bakka'ni Iyyerusaalemii moyanjoke assine.

2 Iyyo'ahaazi moyexxa yanna wogga isixxi lame tommenna sasetemman. Isinna Iyyerusaalemii hedhe'e sase wogga moye galche. 3 Ookkoo'ni Gibtseke moyanji Niika'u Iyyerusaalemi hexxeexxe mootenaa'n isoo dirrise. Yihudiinki ardinna sase kumanna shoole dhibba kiilo birretika sibiljonna sase tommenna shoole kiilo worqe irbo uwwaashsha asse. 4 Gibtseki moyanji Nika'u Iyyo'ahaazika dayyo Eliyaqemii Yihuda'ninna Iyyerusaalemi'ni moyaashsha asse. Isinna summa jijjiireexxi Iyyo'aaqemite hiyye. Moyanji Nika'unna Eelaqiyemika dayyo Iyyo'ahaziin aadhexxi Gibtse'a adhdhe me'e.✝

5 Iyyo'aaqemi woyeexxa yanna wogga isixxi lame tommenna ondetemman. Isinna Iyyerusaalemii hedhee tommenna mitte wogga moye galche. Isinna Duuchchi Woddika Gootta ifike Mageni edo elobaaxxa yaane huje.✝ 6 Baabiloonik moyanji Naabikedenetsoori Yihudiinke arda'ni duule. Moyanjo Iyyo'aqemi booji'eexxi sageettotike sibiljinni usureexxi Baabilooni'a adhdhe me'e.✝ 7 Iittanni Naabukedenetsoori Duuchchi Woddike Goottike galmika miyuwwa adhdheexxi Baabilooni hedheeke ifike fakke magenoofachchotike mine'ni ugge.

8 Moyanjo Iyyo'aaqemi moyemmake baro'ni hujende muuxendeexxi wele diqachchissaaxxinna elobaaxxi hujeexxi juje duuchchi, Isira'eelikenna Yihudake moyanjuwwike maxaafa'ni barreessendeen. Isixxe bakka'ninna belti isik Ikkoniyaani moye.

9 Ikkoniyaani moyee wodda wogga isixxi tommenna saddeetakemman; isinna Iyyerusaalemi hedhe sase agenjonna tomme barraa moye galche. Isinna Duuchchi Woddike Goottik edo elobaaxxa yaane huje. 10 Midha facansaaxxa yanna moyanji Naabukedenetsoor Duuchchi Woddike Goottike galmi giddo hiri fiixeek miyuwwinni welti Ikkoniyaanii'i Baabilooni'a adhdhe me'e. Ikkoniyaanike annika dayyo* Sedeqiyaasi Yihudiinkenna Iyyerusaalemike moyaashsha asse.

11 Sedeqiyaasi moyee wodda wogga isixxi lame tommenna mittetemman. Isinna Iyyerusaalemi hedhe tommenna mitte wogga moye galche.✝ 12 Isinna Duuchchi Woddike Gootti ifike Mageni edo elobaaxxa yaane huje. Duuchchi Woddike Goottika hiyyichcho haaso'eke wabeeka Ermiyaasi edonna ifi heeshi assebaan.

13 Iittanni Mageniink summinni kakachchiisemmake moyanjo Naabukedenetsoori'ni fuggoxxinni ke'e. Isinna ajajema gibee godoba jabeessedhe malee Duuchchi Woddika Gootta Isira'eelike Magenibaa higebaan.✝ 14 Higgeenni qeesetixxinna ardiinxi akeekisano duuchcha xuurameeyye kada gophati, diqachiisaaka gosa gosake ardika galduma hordofa bira sa'na'n me'ine; Iyyerusaalemi giddo woyyoonsemeeka Duuchchi Woddike Goottika galma battoossine.

15 Duuchchi Woddik Gootti edike insa'neke annuwwik Mageni arda ifikeenna ifike woyyichchi galmi'a mararemmaxxee erganjuwwa ergaamman. 16 Isira'eelito kinni Mageniinke erganjuwwa'n gacifatte; wabeekotanna coorati, Duuchchi Woddike Goottika hiyyichcho shollise. Tennenaa'ni kexxeexxa Duuchchi Woddeke Goottixxi mufe ardake'ni gelte. Insa'nenna jabaxxe isixxe mufenaa'ni miliqa dandeennebaan. 17 Tennexxee Baabilooniki moyanji insa'nee lole miidhaashsha Mageni eettii uwwe; Isinna insa'nexxa dargageeyye galmi giddo wolaantichchik bire; dargageessa yookaan, labbaka geercho, yookaan cimeeka yookaan meyyaxxa, foyebaangi duuchchiinga mararte belo bire.✝ 18 Isinna lumoke yookaan shiixxooka, Mageniinke galmika miya duuchcha, iittanni Duuchchi Woddike Goottik galmixxa karra, moyanjiinkanna ja'laabuwwiinxa karra duuchcha Baabiloonibaa fe'edhe. 19 Insa'nenna Duuchchi Woddike Goottika galma gunbe; Iyyerusaalemika kinjiinka dalla'uwwa diinge; mootummatika minuwwa duuchcha gunbe; ookko hedheeka hiri fiixeeka miyuwwa duuchcha balleessine.

20 Isinna wolaantichchiki shinnaa'naa gatemmaka booji'e Baabilooni'a adhdhe me'e. Faarsixxi mootumma kexxaa qico'ni isikenna isixxe oosexxe erganjuwwa kande. 21 Iikki boginna sanbatiinxa hafuura adhdha, hafuura adhdhe; Duuchchi Woddik Gootti wabeeka Ermiyaasi darree'n haaso'emmaxxi muuxendo'a torbaane tomme wogga muuxendaa qico'n urmake kademake boro duuchcha'n hafuura adhdhe.✝

22 Duuchchi Woddik Gootti wabeeki Ermiyaasi darree'ni edise haaso'eek raagiink hiyyichchi, Faarsike moyanjo Qiroosi moye galchemmake baro'ni siretixxe wogga'ni isi galchammake boga duuchcha'ni lassa lassisaashshanna tinni duuchchi borreessendaashsha Duuchchi Woddik Gootti Faarisika moyanjo Qiiroosii'i ke'isse.

23 Faarsik moyanji Qiroosi hiyya'nee qici:

« ‹Duuchchi Woddiki Gootti iimik Mageni buttattixxa mootumma duuchcha ani'a uwwe'een; Yihudiinke bogi giddo Iyyerusaalemik qachcha'ni isi'a woyyichcha galma ijaaronnaa anee ajaje'een. Ardi giddo hedheeki huuni isik manjinna Duuchchi Woddik Gootti isik Mageni isinni welti hedhowwaal; isinna alaalle Iyyerussaalemi'a marowwaal.› »✝