1 Amesiyaasi lame tommenna onde wogga geye moye, isinna Iyyerusaalemi'i ofo'leexxi lame tommenna sallane wogga galche. Ama isixxinna Yihoodini hiyyendaaxxe Iyyerusaalemii ilendeexxe manjichchomman 2 Ammaasiyaasi Duuchchi Woddike Gootti edo gammachchisaaxxa eloxxa qajeelumma assaamman; kaddo malee mitte godobinnitemmaba'a. 3 Isinna mootumma isixxi ti'ni hite uuriseeshshann moyanjoke kade'eemmaka isika anna shiyeemmaka ja'laabuwwa shiyye. 4 Kaddo malee oose insa'nexxa shiyeba'a; oose insa'nexxa shiya waaleechchinna Duuchchi Woddik Gootti Muuseke seerike maxaafa'n, «Hadi hujeexxe balleesaxxee oose, oose hujjeexxe balleesaxxee hadi shiyema hasissabaan; mitti mabnji shiyema hasissaak ifi'a hujeexxe balleesaxxe callinniten» hiyyeexxi haaso'emaka hiyyichcho ulfeesatiten.✝

5 Moyanji Amesiyaasi Yihudiinka arda mitteba bukki asseexxi, mini mini hadishshanni kuma ajajaakaranna dhibba ajajaakaara dhaabati Yihuda duuchcha'ninna Biiniyamike boga'n insa'nee qoode. Ookkonechchi uduma wogga insa'nexxi lame tommennaa ookkoneechchi iima hexxeexxa wogga afeekaara bukki asseexxi lola dande'aka, wontenna bagedo abixxa dande'akaara sase dhibba kuma filemeka manna afeemman. 6 Ammaasiyaasi lebeexxi sase kumanna shoole dhibba kiilo sibiljo birrenni Isira'eeli giddii'n dhibba kuma rundik hujaaka lolaaka manna ugge.

7 Yaane kinn Mageniink manji Ammaasiyaasibaa dageexxi iso'n hiyyee qici, «Koo moyanjo Duuchchi Woddik Gootti Isira'eelinninna kaddo hoone Efireemike ardinn welti hedha gophaammaxxee kunni Isira'eelik loliink manni atinn welti duuloqqe'e. 8 Martetexxi lola mitte godobinni loldotolenna midde injifachchonna inijifatema Magenokenaa'nite kaddeemmaxxee Mageni naaphi atik atee injifataasha assaan.»

9 Amesiyaasinna Mageniinka manjo, «Yoona konne Isira'eelike loliinke manni'a uwweennexxi shoole dhibba kiilo sibiljo birre hitta kaddaata?» hiyyee isoo qore.

Iikki Mageniink manjinna, «Duuchchi Woddik Gootti konne maallaqinaa'n calaaka ati'a uwwa dande'aan» hiyye hiise haaso'e.

10 Tennexxee Amesiyaasinna Efireemi'ni isibaa dageeka loliinka manna ifi ifike minibaa me'inaashsha asse. Insa'nenna Yihuda'ni lumoshsha mufanteexxi jabaxxe aarenni ifi ifike minibaa ille iima hinge.

11 Amesiyaasinna hunna hasissaa qico'n jabeessedheexxi ifika sannachcha Maxinetixxe Dhooqabaa me'e; ookkoonna tomme kuma Seyiirika loliinka manna shiye. 12 Yihudak sannachchi wele tomme kuma mannanna booji'e; mitte bowwa'ixxe xungo hananna insa'nee sa'ise butti'a darbe'naa duuchching cancaqemme reye.

13 Ookkone wodda Amesiyaasi insa'nenni welti loliinbaa me'abaahsha hoyyeemmak loliink manni Semaariyanaa'n Beetihoroni qico'n hedheeka Yihudiinka qachchuwwa dedhange'n loleexxi kuma manna shiye; hara lumooshsha bira saxxeexxa booji'onna adhdhe.

14 Amesiyaasinna Eedoomito bireexxi ille iima higeechchi uduma Seeyirike mannika magenuwwa aadhe dage; ifike magenuwwanna assedhe uurrilsati konneeri'a sagade; tolchakanna konneeri'a shiqise. 15 Duuchchi Woddik Gootti Amesiyaasi'n yo'oshsha aareexxi wabeeka isibaa erge; iikkki wabeekinna, «Ifika arda anga atixenaa'ni woda dande'ebaaka gosa gosaka magenuwwa mayee gargaarsa laqexxette?» hiyye.

16 Isinna haaso'a'nde'n hedhee'naan moyanji isoo, «Ate moyanjiinke gorsallo assi'nee no'o atee baallonse'neenne? Sammi hitabexxo! Rertotaa hassaate?» hiyye.

Iikki wabeekinna sammi hiyye ka'eexxi, «Tennee assiteetexxeenna gorsa anka a'dhdha gophphetaxxee Mageni atee balleesso'a mureexxa ege'neennen» hiyye.

17 Ookkoneechchi uduma Yihudak moyanji Amesiyaasi gorsalluwwa ifika mari'achchiiseechchi uduma; Isira'eelik moyanji Iyyuuke beltik belto Iyyu'akaazik belto kadeeke Iyyo'aasibaa, «Amo mee lola welti inbo» hiyye isibaa erge.

18 Isira'eelik moyanji Iyyo'aasi kinn Yihudiink moyanjo Amesiyaasi'n hiyye hiissee haaso'ee qici, «Libaanoosik tullichcha'n hana hexxeexxe qu'muudo Libaanoosike Birbirsibaa'a erga ergiteexxi ‹Anke belti'a belto atixxa uwwi› hite laqqe. Yaane kinn mitti biniinchi Libanoosinaa'n dageexxi qu'muudo eettenee hadhe. 19 Koo Ammaasiyaasi yoona ati Eedoomito lolde injifateetaxxee ifi dukkee holliteeten; kinni atinge mine'n sammi hite ofo'li! Ate'ninna Yihudiink arda'n rakko geessisaxxa yaane mayee'e halsitaate?»

20 Insa'nenna Eedoomitotika magenuwwa mageneefata hanseemmaxxee Mageni insa'ne naaphiinxe anga'ni sa'isse uwwo'a muremmaxxe Amesiyaasi insa'nexxa laqeba'a. 21 Tennexxee Isira'eelik moyanji Iyyo'aasi bagedo bane; Isinna Yihudiink moyanji Amesiyaasi Yihuda giddo Betishemeshi hiyyemaaba lola inbe. 22 Yihudiink sannachchi lolake'n injifateme; mitti mitting ifi ifike minba'a baaje. 23 Isira'eelik moyanji Iyyo'aasinna Akaziyaasik beltika belto Iyyo'asika belto Amesiyaasii'i Beetishemeshi'ni booji'e Iyyerusaalemi'a aadhe dage. Isinna Efireemike dalla'ixxe hulabaa'ni kasiinke dalla'ike hulake kasi qico'n mitte dhibbanna saddeeta tomme meetire* qico qeerrinne geyeeka Iyyerussaalemika dallaa diige. 24 Isinna galmi giddo hexxeexxa worqenna birreti sibiljo, Obeedi Edoomixxe horte heqqitaammaka galmi giddika miyuwwanna galmi giddixxa karra duuchcha booji'e abidlishatee abixxemmake manninni welti aadhdheexxi Semaariyaa hige.

25 Yihudiink moyanji Iyyo'asik belti Amesiyaasi Isira'eelik moyanji Iyyo'akaazik belti Iyyo'aasi reyeechi uduma tommenna onde wogga ture. 26 Amesiyaasi moye galchemmake baro'ni ke'itokenaa'ni muuxami qico'ni hujeendeexxi wele yaane duuchcha Yihudakenna Isira'eelixee moyanjuwwike maxaafa'n borreessende hexxeen. 27 Amesiyaasi Duuchchi Woddika Gootta hordofa waaleechchi uduma Iyyerusaalemi'i giddo iso'ni fuggoxxinn ke'nemmaxxee Lekkishi'a ke'e baaje. Yaane kinni naaphi isik Lekkishi qico'n manna ergine isoo shilshiinse. 28 Renshakanna fadhachchoke'n feenne dageechchi uduma isike ediki annuwwishshann Yihudake qachcha'n moogeme.