1 Moyanji Solomoon Duuchchi Woddike Goottike summi'a galmakanna ifi'anna mootummatika mine ijaaremo'a ajaja sa'isse. 2 Tennexxe miya ba'edhaaka torbaane tomme kuma, tullichchakenaa'ni kino bocaaka saddeeta tomme kuma manna hujetee bobbaase. Huje towataaka sase kumanna jaane dhibba manna ugge.

3 Ookkoneechchi uduma Solomoon Xeerosike moyanji'a Kiraami konneechchi butti'a hexxeexxa ergeexxi, «Anki anna moyanji Daawwiti hedhammaka mootummatika mine ijaadhdhema wodda birbirsiinxa haqqe ergitetteshshanni; ani'aanna birbirsiinxa haqqe ergi. 4 Eloka foole afeeka hixaana isi edo gubatee, qullitte kebbo kutabelo shiqinshatee, ciincatika tolcha duuchchi wodda hashshanna barra tolchatee, ittanni sanbata sanbata'n, haarooxxi baate fuldaaxxe yanna'ninna Duuchchi Woddik Gootti'a muremeeke woyyichcha ayyaanuwwa duuchcha'n ciincatik tolchi tolchemaaka galma Duuchchi Woddike Gootta no'oke Magenike summi'a hujennexxi woyyonsona'a hedheennen; tenne aada Isira'eelike ardi'a duuchchi woddi'a assaashsha ajajendeexxen.

5 «No'oki Mageni wele magenuwwa duuchchanaa'ni erra lumoke kadeemmaxxee ani isi'a ijaaranneki galminna lumoken. 6 Yaane kinn iimatinna iimuwati iima hexxeexxi iima midde iso'o abida dandetammabaaxxe; galma isi'a ijaara dande'aki ayyete? Isi edo hixaana gunbaake male'e galma isi'a ijaarannoki ani ayyete?✝

7 «Yoona ati anni anki Daawwiti qophpheseexxe anibaa'ninna Yihuda'ninna Iyyerusaalemi'ni hexxeexxe oge afe'ke manninni welti hedhaaka worqe, birreti sibiljo, sageettot hiri fiixeeka sibiljo, baddeesitte, boorajite, diimoke shimalinni seemma gana dande'aaka ogeti manjo ani'a erg.

8 «Atik erganjuwwi birbirsiinxe haqqenaa'ni kunte aa'na qico baranteexxa ege'neennaxxee libaanosike haqichonaa'n, birbirsiinkenaa'ninna sandaaletike haqichchonaa'n ani'a erg. 9 Kunni ani ijaaratee hedeeneki galmi ba'lakenna hara yo'oshsha biifa'neeke kada hasissammaxxee ani heddo haqqe karee qophpheessat atika manna gargaaro'a anka manna atiba'a ergatee giisedheennen. 10 Haqqe woxa'neek atik hujalluwwi itaaxxa shoole kumanna shoole dhibba kiilo leetiro dinne, shole kumanna shoole dhibba kiilo leetiro so'a, shoole dhibbanna shoole tome leetiro woyinetixxa booka shoole dhibbanna shoole neetiro ejersiinxa zayite ati'a ergannon.»

11 Moyanji Kiraaminna moyanjo Solomooni'a borro hiise borreesse hiyyee qic, «Duuchchi Woddiki Gootti arda ifika eeyyammaxxee atee insa'nee moote galchitota'a asseen» hiyye.

12 Moyanji Kiraaminna hiise hiyyee qici, «Duuchchi Woddike Gootti'a galmakanna ifi'a mootummatika mine ijaraaka beekkumiki, galcheccatinna qarummati wo'meeka belto ifika moyanjo Daawwiti'a uwweeki, iimanna butta dadeki Isira'eeliki Duuchchi Woddiki Gootti Mageni saademowwaal!» hiyye. 13 «Yoona beekkumikinna angatixxa oge barateeka Huurami Aabite hinaaka qaro manjo atiba'a erganene. 14 Isixxi amanna Daanixxe gosan, anni kinna Xiroosike bogike manjoni, Huraami Aabi worqeti, birreti sibiljonaa'ni, sageetotena'ni, sibljokena'ni, hiri fiixeeke kinjonaa'ninna haqqetenaa'n gargar hexxeexxa yaane hujatixxa dande'a afeedheen. Ittanni boorajitetenaa'n, baddeessittetenaa'ni, diimmoxxa seemmanaa'ninna layinotixxa seemma huja dande'aan. Konneechchuwwi gadhonna gargarit hedheeka seesuwwa fulchanna kulle qicinni huja duuchchingecehcho giissa dande'aan. Isinna angatixxa oge atike manninna anna atike Daawwiti anke goottinni welti hujaan.

15 «Yoona ergitotta'a ane'ni kuldetteke haaso'ishshanni dinne, so'a, woyineti bulbulonna ejerisiinxa zayite ani'a ergi. 16 No'ona ati hassaattexxa haqqe duuchcha Libaanoosi'ni karre'e mura murati usure'e abbaayyati hana sheleelli asina'n Iyyophe qico'n adaadde gogo'minshannoni: atinna ookko'n Iyyerusaalemi'a adhdhitattoni» hiyye.

17 Moyanji Solomoon konneechchi edo anni iski Daawwiti assemmashshanni Isira'eelike boga'n hedha'neeka wele bogika manna duuchcha laakko'e; laakkossi insa'nekinna mitte dhibbanna onde tommenna sase kumanna jaane dhibbamman. 18 Insa'ne giddi'n toribaani tommi kumi miya ba'edhaake; saddeeti tommi kumi tullichchuwakenaa'ni kino bocaashsha asse. Higgeen huje towataaka sase kumanna jaane dhibba manna file.