1 Akaazi moye wodda wogga isixxi lame tommemman. Isinna Iyyerusaalemii giddo tommenna jaane wogga moye galche. Anna ifike moyanjo Daawwitishsha Duuchchi Woddike Gootti edo eloxxa yaane assebaan. 2 Isinna Isira'eelike moyanjuwwika elobaaka adaba hordofe; Ba'aali hinaake magenuwwika megenoofate bonce giissineexxa fakkuwwa giissedhe. 3 Duuchchi Woddik Gootti Isira'eelik ardi edii'n fugusseemmaka gosa gosake ardika galduma hordofati Been Heenoonnixxe Dhooqqa'ni hixaanna gube; labbaxxa ifixxa oosenna ciincatike tolcha asseexxi shiqise. 4 Tullichchuwwake'n magenoonfantammaba koobatixxe xungo'ni hana haqichchuwwiink gaadisuwwi hunda tolcha shiqiseexxi hixaanakanna gube.

5 Tennexxe Duuchchi Woddiki Gootti isik Mageni Sooritotik moyanjixxe anga'n iso'o sa'isse uwwe: Sooritotinna isoo injifate; insa'nenna isike ardanaa'ni heddo manna boojineexxi Demasiqo'a aadhe me'ine. Higgeenni Isira'eelike moyanjixxe anga'ni isoo sa'isse uwwe: isinna jaba qicini insa'nee lole miidhdhe. 6 Yihudanna edike annuwwika Duuchchi Woddika Gootta Mageno waaleemmaxxee Roomeliyuk belti Faaguhe mitte barra'ni dhibbanna lame tomme kuma loliinka Yihudiinka manna shiye.✝ 7 Efireemixxe gosa kadeeki Zikirite hiyyemaak mitti Isira'eelik loliink manji moyanjo Akaazika belto Ma'iseyaanii, mooteummatik minika sooreesa kadeeka Azaariqaaminenna baalleti moyanjiinke langaba hedheeka Hilqaanaa shiye. 8 Ayihuudi fira insa'nekenna kandoole midde Isira'eelik loliink manni insa'nenaa'n lame dhibba kuma aro'o affeexxa melaalluwwanna miyyaxxanna labbaxxa oose boojine; iittanni heddo booji'o adhdhine Semaariya hinge.

9 Oodeedi hinaak Duuchchi Woddik Goottik wabeek ookkoo hedhemmaxxee sannachchuwwi Semaariyaa higee wodda qophedhatee fuleexxi insa'nee hiyyee qici, «Annuwwi ha'nookik Duuchchi Woddik Gootti Mageni Yihudiink arda'ni mufateemmaxxe'e insa'ne anga ha'nooxxen sa'isse uwween ha'noo kinni jabaxxe aarenne insa'nee shiltine birtine. 10 Ta'anna Yihudiinka ardanna Iyyerusaalemika labballonna melaalle garba ha'nooke assitino'a heddina'neen. Yaane kinn ha'nooka Duuchchi Woddika Gootta Mageno balleesitineexxi balleessa ha'noo giddo hexxebaata? 11 Yoona hiyyaannexxa laqqe Duuchchi Woddike Gootti aare ha'noo'ni bubbeeenaaxxe'e boojitine dagineemmaka fira ha'nooka ifi ifike boonchibaa hiisse.»

12 Ookkoneechchi uduma Efireemike akeekisanjuwwanaa'ni heenooki Yihohanaanik belti Azaariyasi, Shilemootik belti Bereekiya, Seeloommik belti Yihiziqiyya, Hadilayik belti Ameessayi lolakenaa'ni higeekaara ginbeexxi, 13 insa'nee hinee qici: «Konnee boojitineeka manna kabaa aaxxine dagginaammabaan! Konneechchi edo cubbo hunje Duuchchi Woddika Gootta yaadinsennaxxee mufe isixxi no'o'ni gelteen; ta'atenna kaddoole balleesande'n hana balleessa hunjonnaa hassina'nee?»

14 Tennexxe loliink manni usuremeemmaka mannanna boojinemmaka manna ardi edonna akeekisano edo hiisine. 15 Ookkoneechchi uduma konnee shoole manna usuremeeke manni'a boojinemachchonaa'ni duwwi hedhemmake hasisaachcho duuchcha uunaashsha assine; insa'neenna seemmatanna kophe, indaachchonna ha'winaachcho uune; ejersiinxa zayite issine, dande'e me'a gopheeka duuchcha harrete'ni gulufinseexxi meexxetike qachcha hiyyemmaak Iyyaarikoke qachchiba insa'nee wirri assine hiisine. Ookkoneechchi uduma Isira'eelito edo he'naamake ifike qachchak Semaariyaa higge.

16 Eettenne yanna moyanji Akaazi Asoorike moyanjibaa erga ergeexxi gargaarsa laqedhe. 17 Eedoomito higge daggeexxi Yihuda lolide miite heddo manna boojite adhdhite me'itemman. 18 Eettene yanna Filisixeemito tullichchuwwiinke kasa'ninna Yihuda'n bita'i darre'ni hedheeka qachchuwwa abixxiyyot Beetishemeshii, Ayyaaloonii, Gederootii, Sooko, Timinaan, Gimizaanna konne qachchuwwike loolake'ni hedhemmaka shiixxarra qachchuwwa duuchcha abixxine, ofolle. 19 Yihudak moyanji Akaazi boga isike'n elobaaxxa yaane huja'ni turemmaxxee Duuchchi Woddik Gootti'a xuurameessumma xe'insheemmaxxee Duuchchi Woddik Gootti Yihudaa salphise. 20 Asoorik moyanji Teeligeliti Peliseerem Akaazi'ni rakko geessisse malee gargaareban. 21 Tennexxe Akaazi Duuchchi Woddike Goottik galmanaa'ni, mootummatik minena'ninna hayyooletenaa'ni heenooka miyuwwa adhdheexxi Asoorike moyanji'a uwweemman; kaddo malee tinni isi'a la'ote'ni hosseexxebaan.

22 Moyanji Akaazi rakko iso'ni itti bira saxxemma wodda Duuchchi Woddik Gootti'a afeexxa addatensha edi erra saxxeexxa cubbo huje. 23 Akaazinna, «Sooriyake moyanjuwwik magenuwwi insa'nee gargaaremmaxxee aneenna gargaraashsha tolcha shiqisannon» hiyya'ni isoo injifatee ke'e Demasiqok magenuwwi'a tolcha shiqise; yaane kinni kunni magenuwwi isi'anna Isira'eeliike ardi duuchchi'a goofoke kade.

24 Akaazi Mageniika galmika miya duuchcha mitteba bukki asseexxi aadhe; Duuchch Woddike Goottike galmixxa huluwwanna cufe; Iyyerusaalemike orike wirfama duuchcha'n tolchimalcho uurrise. 25 Yihudiinke qachchuwwa duuchcha'ni wele magenuwwi'a ciinca tolcha tullichchuwwake'n magenoonfantaaka booncho giisse; tenne buutonni Akaazi edike annuwwika Duuchchi Woddika Gootta Mageno mufachchiise.

26 Akaazi moye galchammake baro'ni ke'itokenaa'ni muuxami qico'n hujende muuxendeexxi wele yaane duuchcha Yihudakenna Isira'eelik moyanjuwwike jirtetike maxaafa'ni borreessendeen. 27 Moyanji Akaazinna edike isike annuwwishshanni lummedhe. Isinna moogemiyyo hasissaaba moyanjuwiinke hirreesa'nite kaddaa wodda isi Iyyerusaalemike qachcha'n moogeme. Isixxe bakka'ninna belti isik Hiziqiyaasi moye.✝