1 Hiziqiyaasi moyee wodda wogga isixxi lame tommenna ondetemman. Isinna Iyyerusaalemi giddo lame tommenna sallane wogga moye galche. Ama isixxinna Abiya hinaaxxe Zakaaryaasixxe beltomman. 2 Hiziqiyaasinna anni Daawwiti eloxxa assemmashshanni isinna Duuchchi Woddike Gootti edo eloxxa yaane asse.

3 Hiziqiyaasi moye galcheek siretixxe wogga'ni sirtike agenjo'n Duuchchi Woddike Goottike galmixxa huluwwa bane qammachche. 4 Isinna qeesoletanna Leewwito boroti darre'ni hedheeke galmik ba'linaa'ni bukki asseexxi, 5 Insa'nee hiyyee qic, «Ha'noo Leewwito laqqe! Ta'a tennee ifi woyyoonse; edike ha'nook Duuchchi Woddike Gootti Magenika galma woyyoonse. Battitte yaanenna duuchcha galmakenaa'ni fugusse. 6 Ediki no'ok annuwwi xuurammeesumma xe'inshe'een; insa'nenna Duuchchi Woddik Gootti Mageni edo fuggoxxa assinen; isoonna waalle Duuchchi Woddik Goottike galma'n dudduro wirri assine. 7 Insa'nenna galmiinxa huluwwa cunfe; xassuwakanna xolsine. Isira'eelik Mageni'a hixaana gunbebaan; galmi giddo ciinceessinka tolcha shiqinsebaan. 8 Tenne buutonni Duuchchi Woddik Goottixxi mufe Yihuda'ninna Iyyerusaalemi'ni gelte. Ha'noonna uuddina'neeshshanni isi insa'nee soda'atee, alayyokeenna culphisatee sa'isse uwwe. 9 Tennexxe edik annuwwi no'ok bagedoke'ni renne; labbaxxinna meyyaxxi oose no'oxxi, aruwwa no'oxxinna booji'ende. 10 Ta'inni udumi'a mufe no'onaa'ni higgaashsha ta'a yoona Duuchchi Woddike Gootta Isira'eelike Mageninni welti kako aagonnaa mudhdheennen. 11 Tee anxe oose! Isi edo uurirtino'anna isi'a ergatendino'a; isi edo ergatendinaake kaddinaashshanna isi'a hixaana isi'a gubbino'a Duuchchi Woddik Gootti ha'noo fileemmaxxee ga'ma'mi hitinoqqe'e.» 12 Konneechchinni butti'a hexxeexxi Leewwito hujete'ni bobbaate, Qe'atixxe hortenaa'ni Amaasik belti Mahaatinna Azaariyaasik belti Iyyu'eeli,

Meeraarixxe hortenaa'n Abidik belti Qiishinna Yihaleelik belti Azariyaasi,

Gershoonixxe hortenaa'n Ziimak belti Yo'ahinna Yu'aaki belti Eedeni;

13 Elitsafaanixxe hortenaa'n Shiirina Yi'i'eeli;

Asaafixxe hortena'n Zakaaryaasinna Metaaniya; 14 Hemaanixxe hortenaa'n Yihi'eelinna Seme'i, Edotaamixxe hortenaa'ni Shemayanna Uzu'eeliten.

15 Kunni manni dayyuwwa ifi fika bukki assine'e ifi qullonsineechchi uduma moyanji Duuchchi Woddike Goottika hiyychcho hordofe ajajemmaashshanni Duuchchi Woddike Goottika galma qullonsatee eiyine. 16 Qeesetinna Duuchchi Woddike Gootika galma qullonsatee giddi'a e'yine; Duuchchi Woddike Goottik galmi giddo afendaa'neexxa heene batte yaanenna Duuchchi Woddike Goottik galmi edo aa'ne fulchine. Konne batto'emmachcho Leewwito dukke aaxxe me'iteexxi Qeedironixxe dhooqa giddo hunde.

17 Qulleessatixxi huje siretike agenjo'ni siretixxe barra'ni sanfeexxi ookkone agenjo'ni saddeetixxe barra'ni galmi giddi'a e'yinammaxxe kutaninni madadiinga hunje birre. Galmiinxi huje siretike agenjo'n tommenna jiyaxxe barra'n muuxende.

18 Qeese hujende muuxendeexxe hujexxee moyanjo Hiziqiyaasibaa martee hitee qici, «Duuchchi Woddike Goottika galma duuchcha ciincatik tolchi shiqaak tolchimalcho miyyuwwi duuchininn woyyitte kebbo ugginaake beera miyuwingininn qulleessineennen. 19 Moyanji Akaazi Duuchchi Woddik Gootti'a xuurameessake kadebaaxxa wogguwwa aadhdheexxi hedhemmaka miyuwwa duuchcha qophpheesine woyyoonsine'eennen; kunnise kunni miyuwwi duuchchi Duuchchin Woddike Goottike galmike tolchimalchi edo hedheen.»

20 Langa baro bariisa moyanji Hiziqiyaasi qachchiink jalqaabuwwa mitteba bukki asseexxi Duuchchi Woddik Goottik galmibaa aadhe me'e. 21 Insa'nenna mootummatixxee, galmiinxenna Yihudaxxee torbaane jiboota, torbaane gedhebiinxa korbeeyye, torbane gedhebiinka biruusa torbaane re'etika buruusa cubbo biratik tolchi'a shiqinse; moyanjinna konneera Duuchchi Woddike Goottike tolchimalcho'ni shiqinsaashsha Aaroonixxa horte, qeese ajaje. 22 Qeestinna jiboota gorraateexxi munde aaxxeexxi tolchimalchoke'n hana fixxe; langaba gedhebiinxa korbeeyye gorraateexxi munde tolchimalchoke'n hana fixxe. Iittanni konnee buruusuwwanna gorraneexxi munde tolchimalchoke'n hana fixxe. 23 Cubbotik tolchi'a kaddaaxxa re'e moyanji edonna ya'i edo shiqinse; insa'nenna anga ifixxa tenne re'e hana uggine. 24 Moyanji ciincatika tolchanna cubbotika tolcha Isira'eelito duuchchi'a shiqaasha ajajemmaxxee, qeese re'e gorraateexxi Isira'eelito duuchchixxa cubbo birate kaddaashsha cubbotike tolchi'a munde tolchimalchi hana shiqishshe.

25 Moyanji Hiziqiyaasinna Duuchchi Woddi Gootti leella uudammake Gaadii darree'ninna wabeeka Naatanii darree'n moyanjo Daawwiti'a uwweekanna Daawwiti hujete'n hosiseeka ajajuwwa duuchcha hordofat lumoke kiraara, qilillisanna masinqoti muxxe fuleekaara Leewwito Duuchchi Woddike Goottike galmi giddo ugge. Kunni Duuchchi Woddik Gootti wabeeko ifixxi darree'n sa'iseemmake ajajin. 26 Tennexxee Leewwito Daawwitika faarsatika miyuwwa qeesetinna malagatuwwa abixxitee qophpheefattexxi uurrite.

27 Konneechchi uduma moyanji Hiziqiyaasi ciincesiinaaka tolcha tolchimalchoke'ni shiqinsaashsha ajaje; tolchikinna ciinco'e safee wodda Isira'eelika moyanjo, Daawwitike faarotike miyuwwinninna malagatik qoqqobendeexxi galatiinxi faaro safende. 28 Faarsaleeyye faarsita'naanna malagata ufuufammaakir ufuufaa wodda ya'a duuchchi gonbisemeexxi sagade. Ciincati tolchi ciinco'e luggaa qico'ni tinni duuchchi assende.

29 Tolcha shiqammaxxi huje muuxendeechchi uduma moyanji Hiziqiyaasinna isinni welti hedhemmak duuchchi guluffate Mageno sagande. 30 Moyanji Hiziqiyaasinna ardiinxi akeekisanjo duuchchi, Leewwito, Daawwitikenna leella uudammake Asaafike hiyyichchishsha, Duuchchi Woddik Gootta galateefantaashsha ajaje. Insa'nenna faaro gammadik faarsine; gombiseme sagande.

31 Ookkoneechchi uduma Hiziqiyaasi insa'nee'e, «Ta'a hanoo Duuchchi Woddike Gooti'a ifi woyyensitineen; ta'anna shiqqe; galatakanna tolcha Duuchchi Woddike Gootti'a galmibaa iyyedage» hiyye. Tennexxee ya'i tolchakanna galatiinxa uwwa iyyedange; ifixxe fedheenni uwwo'a haseek duuchchiing ciincatika tolcha iyyedagge.

32 Konne qicinni ardi ciincatike tolchi'a shiqiseemmak hori torbaane tomme jiboota, dhibba gedhebiinxa korbeeyyenna lame dhibba gedhebiinka buruusuwamman; kunnichchuwwi duuchchi Duuchchi Woddike Gootti'a ciincatike tolcha kade'e shiqa'emmakemman. 33 Tolchakee woyyoonsemeammak hori jaane dhibba jibootanna sase kuma gedhebiinxe korbeeyyemman. 34 Kaddo malee'e qeese konne hore duuchcha gorraate duldaaxxi heenooxxe kaddeemmaxxee, tennexxee insa'neka fira kaddeexxi Leewwito huje muddaa qico'ninna wele qeese ifi luqqi assexxaa qico'ni insa'nee gargaarte. Leewwitonna ifi luqqi assedhatee qeeseti irra yo'oshsha ifi xonxoommattaamman. 35 Ciincesinaake tolchi welti shiqaaka mittoomiinka tolcha ha'yonna ha'watika tolchinn mitteba ciincesemaak tolchi yo'osha bira sa'eekemman.

Konne qicinni Duuchchi Woddik Goottik galmiinxi ergatensha haarooba safendeemman. 36 Moyanji Hiziqiyasinna ardi yaane duuchcha ariifatte muuxendaasha Mageni insa'nee gargaaremaxxee yo'oshsha gammande.