1 Yihudiink moyanji Iyyosafixxi Iyyerusaalemi hedheeke ifike moyatike mine'n nage'iki higeexxa yanna, 2 wabeeki Hananiki belti Iyyu, moyanjiki afemo'a dageexxi Iyyosafixxi'i hiyyee qici: «Ati fuggaaleesa gargaara, Duuchchi Woddiki Gootti gibakaara eeya eloxxeta? Tennenaa'n kexxeexxa Duuchchi Woddike Goottixxi mufe ate'n hexxeen. 3 Kaddo malee ashsheera hiyyemmake magenixxe fakkexxa sooddo bogakenaa'n hoyyite birtetaxxeenna Mageno halsatee qalbe atixxa qopheefatetaxxee eloxxe assiteeten.»

4 Iyyosafixxi Iyyerusaalemi ofo'le; Bersaabehinaa'n tullichchuwwiinke Efireemike bogi qico'n ardiinxe oddo'n mammaremeexxi edike insa'neke annuwwika Mageno Duuchchi Woddike Goottibaa ille iima hingaashsha asse. 5 Bogake'n kinjiinke dalla'i giddo ijaaremeeke Yihudiinke qachchuwwa duuchcha'n hayyoole baallonse. 6 Isinna insa'ne'n hiyyee qici, «Ha'no murtina'neek manjokeete kaddebaak, murte murtinaaxxa yanna duuchcha ha'noon welt hedheeke Duuchchi Woddike Gootti'aate kaddemmaxxee, uutinaaxxe murte duuchcha'n jabbaxxa xexe'achcho asse. 7 Ta'anna Duuchchi Woddika Gootta sodaata ha'noo'n hexxowwaal; no'oka Mageno Duuchchi Woddike Goottiba murte dassa, gamisanna matta adhdha hedhagophpheemmaxxee xexxe'atina'n murre.»

8 Iyyosafixxinna Iyyerussaalemi giddo Duuchchi Woddike Goottika seera muxxinsaashshanna kexxaaxxe wele gonphe'n murte unaashsha Leewwitotenaa'n, qeesetenaa'ninna Isira'eelike mini minike akeekisanjuwwinaa'n heenooka manna baalloonse; insa'nenna Iyyerusaalemi he'na'nemman. 9 Insa'neenna hiyye ajajee qici, «Duuchchi Woddika Gootta sodaattinna'n xuurameessummatinnaa mitte godobinni ergatemme, 10 Qachcha qachcha'ni hedha'neeki firi ha'nooki mado'exxi, yookaani seera, ajajuwwa, aadanna galduma sa'ati ha'noobaa shiqaaxxee fedheexxe yaanenni, Duuchchi Woddika Gootta balleessinabaashsha isixxi mufe kinni ha'noo'ninna dayyuwwa ha'nooke'n geltabaashsha insa'nee xexxe'achchiisse; tenne assitinoole balleessa affinebaan.

11 «Duuchchi Woddike Goottike kadeechcho duuchcha'n qeesetiki akeekisanji Amaariya; moyajiinke kadeechcho duuchcha'n Yihudiinxe gosake sooreessa Isima'elika belto Zebadiya ha'noo'n balloomeen; Leewwito kinn ha'noo edo akeekisanjuwwake kande ergatemaan; jabaattine hujje; Duuchchi Woddiki Goottinna eloxxa assaakeerinni welti hedhowwaal» hiyye.