1 Ookkoneechchi uduma Yihudiink ardi duuchchi tommenna jaane woggaka Ooziyaanii'i isika anna Amesiyaasixxe bakka'ni moyashsha assine. 2 Ammasiyaasi ifike edike annuwwishshanni reyeechi uduma, Ooziya, Eelaatika qachcha haaroba qammachcheexxi Yihudiinbaa hiisse.

3 Ooziyaani tommenna jaane wogga'n moye; isinna Iyyerusaalemike qachcha'n onde tommenna lame wogga moye galche. Ama isixxi Yikooliyate hinaaxxe Iyyerusaalemii ilendeexxe manjichomman. 4 Ooziyaninna anni isik Amesiyaasi assimmashshanni Duuchchi Woddik Gootti edo eloxxa yaane asse. 5 Isinna Mageno sodaata barachchsiiseeke Zakaaryaasike baro'ni Mageno halse; Duuchchi Woddika Gootta halseexxe qixxe'n Mageni yaane isixxa qajeelche.

6 Ooziya Filisixeemitote'n lola ke'iseexxi Gaatika, Yaabinenikanna Ashidoodika qachchuwwiinka dalla'a diige. Ookkoneechchi uduma Ashedoodi biranna gateeki Filitsixeemik bogi giddo qachchuwwa haaroba ijaare. 7 Magenikinna, isi Filisixeemito, Guuriba'aali hedhaammaka Arabakanna Me'unatito injifataashsha asse. 8 Amoonito Ooziyaani'a irbo uute; isinna yo'oshsha jajemeemmaxxee gurri isik Gibtse qico'n laqeme.

9 Ooziyaaninna Iyyerusaalemi giddo kasiink dalla'iinxe hula'ni, dhooqatik dalla'iinxe hula'ninna dalla'iinxe wirfamiinxe hula'n xelleephphuwwa giissedheexxi tennee xelleephphuwwa kollifachchotixxe asse. 10 Iittanni tullichchuwwiinke kasa'ninna diidake'ni heddo lalo afeemmaxxee qiilla gammoojje kinjiinxa xellephphuwwa giisse; heddo wede'iinxa baluwwanna ume. Isinna buttina hucca eeyyammaxxee tullichchuwwake'ninna shamoke boga'ni huccakanna woyinetika hiddichcho kaalsaaka hujalluwwa afeemman.

11 Ooziyaaninna, lolakee qophpho'eeka heddo sannachcha afeemman; ookkone sannachchiike mannika summinna moyanjiink borreessanjuwwa kande'eemmake Yi'i'eelinna iikki sooreessi Ma'iseeya borreessinaamman; insa'nek akeekisajinna mootummatike minike hujalluwwinaa'n Hanaaniyatemman. 12 Ookkonee sannachuwwa akeeka'emmake mannik laakkossi lame kumnna jaane dhibba mini mini hadike akeekisanjuwwamman. 13 Insa'nexxe akeette hunda moyanjiinka naapha lolatee muxxe fuleeka sase dhibba torbaane kumanna onde dhibba gooti loliink manni hedhemman. 14 Ooziyaaninna loliinke ifike sannachchi duuchchi'a wonte, bagedo, loliinxa gulle, loliinxa seemma, mogidonna gabe, looyyanna looyati kinjo isi'a qophpheessemman. 15 Moyanji Ooziya Iyyerusaalemi giddo angatixxe ogenni muxxe fuleek manni hujeexxi kinjiixe xellephpho'ninna qachchiink dalla'ike kasa'ni mogiduwwakann lumollamma kino darbatendaaka miyuwwa hujise. Tinninna isoo jaba qico jabeeseemmaxxee gurri isik bayyanna ba'la qico'n laqeme.

16 Moyanji Ooziya mootumma ifixxa jabeessee wodda hollate'n ke'e; tinni isixxi holla fuggoxxe'n geessise; Duuchchi Woddik Gotta isike Mage'noninna xuurameessake kada gophe; hixaanike tolchimalcho'n hana hixaana guphphatee Duuchchi Woddike Gootike galmi giddi'n hunnati e'yat. 17 Ookkone wodda qeesichchi Azaariyaasi godoba jabake kaddeexxe saddeeta tomme qeese welti isoo hordonfe galmi giddi'a e'yine. 18 Insa'nenna isoo moromeexxi, «Koo Ooziya! Ati Duuchchi Woddik Gootti'a hixaana guba hasisabaan; tenne'e assinaashsha uwwendeekiir Duuchchi Woddik Gootti'a gargar foyendeexxe Aaroonixxe horetexxa qeese malee'e ati'a hasissabaan; atinna Duuchchi Woddika Gootta balleesitetten galmi giddi'n fuli; tinni Duuchchi Woddike Gootta Mageni darree'ni ulfina ati'a uwwisaaxxebaan» hine.✝

19 Hixaana gubo'a qophpheefatemak Ooziya mufate; Duuchchi Woddik Goottik galmi giddo hixaana tolchinammak tolchimalchi edo hedhee qeesolete'n hifata'nege'ni albi soomo'e. 20 Iikki umi qeesichchi Azaariyasinna wele qeese duuchchi isoo uuddee wodda, alba soomo'eexxa anfe. Tennexxee isoo muddansite gadhi'a fulchite; isi umo ifingeninni Duuchchi Woddik Gootti isoo ganeemmaxxee ookkonn fulo'a muddame.

21 Moyanji Ooziyaani reyaaxxe barra qico'n soommakeman. Isinna soomo'emmaxxee galmi giddii'n shorrinemmaxxee qofinni mitte mine'ni ofo'le. Ookkoneechchi uduma belti isik Iyyo'ataami mootummatika minnixxa galcha annoomik adhdheexxi ookkone bogika arda akeeke.

22 Ooziyani moyeeke baro'ni ke'itokenaa'n muuxamii qico'n hujendeexxi yaane duuchcha Amootsik belti wabeek Issayaasi borreesse'een. 23 Ooziyaninna ifike edike annuwwihshanni lummedhe. Ardikinna «Isi soomake afeedheen» hiyye moyanjuwwiinke hirreesi bira hedheeke booncho'n isoo moonge. Isixxe bakka'ninna belti isik Iyyo'ataami moye.✝