1 Roobi'aami Iyyerusaalemi geye wodda Isira'eeli loleexxi mootumma isi'a hiisino'a Yihudiinxe gosanaa'ninna Biiniyaamixxe sannenaa'n mitte dhibbanna saddeeta tomme kuma loliinka manna bukki asse.

2 Yaane kinn Duuchchi Woddike Goottiki hiyyichchi Mageniinke manjo'n Shamaya'n hiyyee qici, 3 «Yihudiinke moyanjo'n Solomoonike belti'a Roobi'aami'anna Yihudinxenna Biniyamixxe gosa giddo hexxeexxe Isira'eel duuchchi'a hitatto qici; 4 ‹Duuchchi Woddiki Gootti insa'nee hiyya'nee qici; tinn yaane anibaa'n kaddeexxe kaddeemmaxxee dayyuwwa ha'nooka loldino'a ookko'a martinoqqe'e; ha'no mitti mittingi ifi ifike minibaa me'e› » hiyye. Tennexxee Duuchchi Woddike Goottike hiyyichcho'n ajajemati Iyyorbi'aamii lollo'a duula waalleexxi ille iima hinge.

5 Roobi'aami galduma ifika Iyyerusaalemi giddo assedheexxi ifi iimi'n faachchefatatee kadaaka qachchuwwa Yihudiinke bogi giddo ijaadhdhe; kunni qachchuwwinna, 6 Beetelihemi, Exaami, Tequhe, 7 Betitsuuri, Sokko, Adulaami, 8 Gaati, Meeriisa, Ziifi, 9 Adoorayiimi, Lakishi, Azeeqa, 10 Tsori'a, Ayyalooni, Kebirooniratemman. Yihudiinkenna Biiniyamike bogi giddo kolfatatiki qachchuwwi konneeratemman. 11 Isinna konnee qachchuwwa'n kollo jabaxxa giisseexxi loliinke mannika ajajalluwwa mitte mittinge qachchi giddo ugge; konne qachchuwwi giddonna ita, Ejerisiinxa zayitenna woyinetixxa booka tuule. 12 Isinna konnee qachchuwwa duuchcha'n wontetanna bagedo gureexxi qachchuwwi sodatemaashsha asse. Konne qicinni Yihudiinkanna Biiniyamika boga ifike assedhe.

13 Isira'eelike boga duuchcha'n hexxexxi qeesenna Leewwoti ifi ifike boga duuchchinaa'n isibaa dagge. 14 Isira'eelik moyanji Iyyorbi'aamina oose isixxi; Leewwito Duuchchi Woddike Goottixxe qeesummatixxa huje hujjabaashsha hoyyinemmaxxee Leewwito hore alla'litaamma boonchonna karra ifixxa duuchcha waaldeexxi Yihudaa Iyyerusaalemi'a dagge. 15 Iyyoribi'aminna tullichchuwwake'n magenoofachchotixxe boonchuwwa'ninna iittanni isi giissemaxxe re'etixxenna jabbetixxe fakkuwwaa ergatendaaxxa qeese ifi'aanni fi'leemman.✝ 16 Mitte mittende Isira'eelike gosatike mininaa'n mitte godobinni Duuchchi Woddika Gootta Isira'eelika Mageno halseek duuchchi ifike edike annuuwwike Duuchchi Woddike Gootta Mageni'a tolcha shiqqishsho Leewwito hordonfeexxe Iyyerusaalemi'a me'e. 17 Konne qicini Daawwitikanna Solomoonika ora hordofati sase wogaa Yihudiinxa mootumma jabeessine; Solomoonika belto Roobi'aaminna gargaarre.

18 Roobi'aami Mahalati aadhe; anni isekinna Daawwitike belto Yaarimuutite. Ama isexxinna Abihayil hiyyendaaxxe kaddaa wodda Isseyike beltika belto Eli'aabixxe beltomman. 19 Mahaala'itinna Ye'ushi, Shemariyanna Zahami hinaaxxa labbaxxa oose isi'a ilde. 20 Ookkoneechchi uduma Robi'aami Abeseloomixxa belto Me'aka aadhe. Isenna Abiya, Ataayii, Ziizanna Sheloomiti isi'a ilde. 21 Roobi'aami ifixxe aruwwanaa'ninna shiixxaramma ifixxe aruwwanaa'n caala Abeseloomixxa belto Me'aaka'a eeyye. Roobi'aaminna mittenba tommennaa saddeeta aruwwanna jaane tomme shiixaramma aruwwa, lame tommenna saddeeta labbalonna jaane tomme dubara afe'eemman.

22 Roobi'aaminna Ma'ikaka belto Abiyaa moyanjo asso'a haseemmaxxe dayyuwwiinke umo akeekisanjo asse file. 23 Isi beekkumi ifikinni labbaxxe oosenaa'n heenooxxa Yihudiinkena Biiniyaamike qachchuwwa'n iittanni kinjiinke dalla'inni buqemeeke qachchuwwa galchinashsha file. Insa'ne'a hasisaachcho bira sa'ise uwwe; heddo melaallena insa'ne'a aadhise.