1 Solomoon Duuchchi Woddike Goottika galmanna ifi'a mootommatika mine ijaarate'n lame tomme wogga bireechchi uduma, 2 Iittanni moyanji Kiraami uwweemmaka qachchuwwa qammachcheexxi Isira'eelito giddo qubattaashsha asse. 3 Ookkoneechchi uduma Solomoon Hamati Tsobak hiyyemaake boga'n duulexxi ifibaa hiissedhe. 4 Qiilla gammoojje giddo hedhemmaka Tedimorika qachcha qammachche, edi wodda Hamati Sobati'n miyuwwa massecatika qachchuwwa duuchchanna ijaare. 5 Iittanni Solomoon ali darrexxa Betihoroninna aadi darrexxa Beti Horoni kolifantaake qachchuwwa kadaashsha dalla'uwwa, huluwwatinna cufanuwwa afaashsha asse ijaare. 6 Higgeenni Ba'ilati qachchanna miyuwiinke minika qachchuwwa duuchcha, sarageelluwwinna fadhadi hedha'neeka qachchuwwa duuchcha Iyyerusaalemi giddo, Liibanoosi gidonna isi galchammake boga duuchcha'n ijaare.

7 Isira'eelito kadebaaki kinn Hiititotenaa'n, Amooritotenaa'n, Feeriizitotenaa'n, Hiwaatotinaa'ninna Iyyaabusitotenaa'n gateeki ardi duuchchi, 8 Isira'eelito shilte birtebaang bogake'n gateexxa ookkone mannixxa horte hunnatixxa huje hujaashsha Solomoon melee insa'nenna telchi qico'ni hujende'ni he'neen. 9 Kaddo malee Solomoon huuni Isira'eelik manji garbake kade hunnatixxa huje hujaashsha assebaa; insa'ne loliinka manna, loliinke mannike ja'laabuwwika ajajalluwwa, sarageelluwwakanna sarageelluwwa oofammake mannika ajajalluwwamman. 10 Konneeri giddii'n lame dhibbanna onde tomme manni moyanjo Solomoonike manna towatammake ja'laabuwwamman.

11 Solomooninna «Duuchchi Woddike Goottiki taabooti e'yeeki boonchi duuchchi woyyichchake kademmaxxee, are anxi Isira'eelike moyanjike Daawwitike mootommatike mine'n hedha hasissabaan» hiyyexxi Feri'onixxa belto Daawwitike qachchanaa'n ise'a ijaarisisemmake mootommatike minbaa alalle isee iyyedage.

12 Solomooninna galmiinxe baxxe edi darre giissisemmake Duuchchi Woddike Goottike tolchimalcho'n ciincatika tolcha Duuchchi Woddike Gootti'a shiqise. 13 Muuse tolchi shiqaa qico ajajemma qicinni mitte mittende ayyaanuwwiinxe barra'n tinninna, Edike Sanbata Sanbata'n, haaroxxi baateke fulatike ayyaana'ninna sase woggatike ayyaana'n kunninna gamami e'yebaaxxe kebboka ayyaana'n, mayetike ayyaana'ninna fooqiinke ayyaanixxe yanna'n ciiccesemmaka tolcha Duuchchi Woddike Gootti'a shiqise.✝ 14 Ifike Annika Daawwitika seera hordofati qeeseteenna huje qoqqodeexxi Leewwitotinna faaro akeekkaashshanna barra barratixxe huje'n qeese gargaraashsha ugge. Higgeenni Magenik manji Daawwiti ajajemmashshanni galmiinxa hula heqqammakiira gargariti hexxeexxa huluwwa heqqinaashsha kuta kuta'n ugge. 15 Insa'nenna moyanjiinke miyuwwinke mininni welti hasissaaxxa yaanexxa qeesoleteenna Leewwitotee uwwemaaka ajaja gagami hineba'a.

16 Duuchchi Woddike Goottike galmixxi booso safendeexxe barranaa'n muuxendaa qico'ni Solomoonixxi huje duuchcha qajeelde; konne qicinni Duuchchi Woddike Goottike galmixxe huje muuxamii qico'n gelte.

17 Ookkoneechchi uduma Solomooni Eedoomike boga'n abbaayyatixxe gabala kaddeexxe Etiyooni Gabiri'anna Eelaati'a me'e. 18 Moyanji Kiraaminna abbaayyatixxa me'a ege'neeka markaba oofaaka manna ajajaake ifike jalqabuwwinni welti markabuwwa isi'a erge; insa'nenna Solomoonike manninni welti mitteba hingee Ofiiri'a me'ine; ookko'ninna tommenna onde kuma kiilo saxxaaxxa worqe Solomooni'a aa'ne dange.