1 Moyanji Solomoon Duuchchi Woddike Goottika galma ijaare bireechchi uduma Anni isik Daawwiti foyemmaxxa worqenna birretika sibiljo miyyuwa duuchcha iyyedageexxi Mageniinke galmi giddo miya massinammaba ugge.✝

2 Ookkoneechchi uduma Solomooni Duuchchi Woddike Goottika kakotika taabbota Daawwitke qachchanaa'n Tsiyooni'n alallee iyyedango'a; Isra'elixxa gedhuwwa, gosa gosaka akeekisanjuwwa duuchchanna Isira'eelika mini minika akeekisanjuwwa iyyerusaalemi bukki asse.✝ 3 Isira'eeliki manni duuchchi torbake agenjika ayyaana ulfeessemma wodda; moyanji edo bukki hiyye.

4 Isira'eelixxi geedhe bukki hite wodda Leewwito kakotika taabbota iimi'a ke'isite. 5 Taaboota, afenshatika duunkaan giddo hedhemmaka woyyichcha miya duuchcha aa'neexxi alaallee qabante; Leewwitotiinxi qeesolenna isoo ba'exxe. 6 Moyanji Solomooninna isi bira bukki hiyyemmaki Isira'eeliki tuuta duuchchi laakkonne dhaqanbabaaka gedhebonba jiboota Taabooti edo tolchchine.

7 Qeesetinna Duuchchi Woddike Goottika kakkotika taaboota galmiinxe giddi darrexxe woyyite woyyo bakka'n e'yinsheexxi Kirubeelike keeli hunda hexxeexxe bakka'n uggine.✝ 8 Kirubeelinna keeluwwa ifika taabooti iimi darre hedheeke booncho'n farri assee; kakkotika taabootanna taaboota dunkammaka haqichchuwwa buqe.✝ 9 Kakotika taaboota dunkammaki haqichchi yo'oshsha qeerraake kadatenaa'n kexxeexxa; Taabooti hedheeke boonchi qico'n hexxeexxe qaccuwwa woyyitte woyyo edi darree'n leella'nemmani; galm gadho kinn leella'nemmabaani; telchi qico'n ookkone booncho'ninni hedheen. 10 Isira'eel Gibtsee'n fuldechchi uduma Duuchchi Woddiki Gootti insa'nenni welti kako aage wodda, Muuse Korebixxe kooba'n kakotike taabooti giddo lame bocendemmaxxa kino uggeeka male'e taabooti giddo mittichchinna hedhemmabaan.✝

11 Qeesetinna galmakenaa'n fulde; ookko hexxemmaxxi qeesole insa'neke qoobbixxe hujenna kada gophphoole duuchchiinxi ifi woyyoonsiteemman. 12 Faaro faarisammaki Leewwito duuchchi; Asaafi, Amaani, Hemaaninna Edotaami; labaaxxi oose insa'nexxinna firuwwi insa'neki duuchchi eloxxa layino odo'wineexxi; tolchiinke boonchibaa'n boroti darre'n uurrineexxi Tsena tsille qilliqilli assina'n; kiraarakanna masinqo meellinsa'nemman: insa'nenna malagata ufuuffammaxxe mitte dhibbanna lame tomme qeesole erqe kayyi'n buqqeemman. 13 Malagata ufuunfammakiirrinna faarisanjo mitteba hige'e mitte hafuurrinni Duuchchi Woddika Gootta saanda'ninnaa galateefanta'ni: malagatiki, tsenaa tsilletinna wele faarotike miyinni qoqqonbeexxi hafuura gikki assineexxi Duuchchi Woddika Gootta saanda'n;✝✝

«Isi elokeni;

Jaalala isixxi duuchchi woddixxeni hina'n faarsine.»

Ookkoneechchi uduma Duuchchi Woddike Goottike Galma'ni duumanchi wo'me. 14 Duuchchi Woddike Goottiki gaachchanni Magenike galma'n wo'meemmaxxee duumanchakenaa'n kexxeexxa qeese uwwendeexxa huje huja dandeettebaan.