1 Iyyosafixxi ifike edike annuwwishshanni lummedhe; isinna Daawwitike qachchi giddo hedheeke moyanjuwwiinke hirreesa'n moogeme; belti isik Iyyoraami isixxe bakka moye.

2 Iyyoraamiki dayyuwwa kadde'eemmaxxi Iyyosaafixi oose, Azariyaasi, Yihi'eeli, Zekaaryaasi, Ezariyaasi, Mika'eelinna Safaxxiyyaasi hiyyemmaani. Tinni duuchchiinxi Isira'eelika moyanjo Iyyosafixxixxe oosemmani. 3 Anni insa'neki heddo birretika sibiljonna worqe, fixeeka miyuwwanna iittanni Yihudi giddo kinjiinke dalla'inni ijaaremeeka qachchuwwa insa'ne'a uwwe; yaane kinni ifixxa mootumma ifike angafa belto kadeemmaxxee Iyyoraami'a uwwe.

4 Iyyoraami mootumma ifike annixxa jabeessedheechchi uduma dayyuwwa ifika duuchcha iittanni heenooka Isira'eelike sooreessuwwa wolaantichchik bire. 5 Iyyoraami moyee wodda wogga isixxi sase tommenna lame woggamman; Iyyerusaalemi ofo'leexxi saddeeta wogga moye galche. 6 Iyyoribi'aminna Aki'aabixxa belto aadhemmaxxe Aki'abiki mini hadi assammashshanni Isira'eeliki moyanjuwwi me'emmaka elobaaka ora hordofe; Duuchchi Woddike Gootti edonna elobaxxa huje huje. 7 Kaddo malee Duuchchi Woddiki Gootti Daawwiti'a aageexxe kakonaa'n kexxeexxa Daawwitika mine balleeso'a yorebaan; tinni iitta kaddeechchi Duuchchi Woddik Gootti edi wodda Daawwiti'anna isixxe sanne'a duuchchi woddi'a, kuta belo ifaak ifi hedhaashsha assatee addachchiisatika hiyyichcho isi'a uwweemmaxxeetemman.✝

8 Iyyoraami moyemmake baro'ni Eedoomi Yihudake'n fuggoxxinni ke'exxi ifika moyanjo fi'le moyisiise.✝ 9 Tennexxe Iyyoraami loliinke mannika ajajalluwwanna loliinxa sarageela duuchcha adhdheexxi ookko'a mare. Eedoomiki manninna isoonna loliinka sarageela ajajammaka duuchcha erqe kayyi'n bunqe; isinna kinni hashsha ke'exxi isoo buqemmaka loliinka manna lole injifate. 10 Eedoomi techchi qico'n Yihudakee ajajema gibeeshshanni gate.

Iyyoraami annuwwi insa'nekika Duuchchi Woddika Gootta Mageno waalemmaxxee; Libinake qachchiki mann eettene yanna'n iso'n fuggoxxinni ke'e. 11 Ookkoneechchi uduma isinna Yihudiinke tullichchuwwa'n magenoonfantaba giisseexxi Iyyerusaalemiki ardi ookko'o yabaabulaashsha assatii Yihudiinka arda dedhise.

12 Ookkoneechchi uduma wabeek Eliyaasi Iyyoraami'a borro hiyye borreese qici: «Atike annki Daawwitiki Duuchchi Woddiki Gootti Mageni hiyya'nee qici: ‹Atike annika Iyyosafixxike yookaani Akka'iinka moyanjo Aasak eloka ora ati me'iteboxxon. 13 Yaane kinn Isira'eelike moyanjuwwike ora'n me'itetten; Aki'aabik mini Isira'eeliki ardi Duuchchi Woddike Gootta'n addatabaashsha assemmashshanni; atinna Yihudinikanna Iyyerusaalemiki ardi wele magenuwwa yabaabulaashsha assitetten; iittanni ati erra nageeliichchake kadeeka dayyuwwanna atike annika mini hado shiltetten. 14 Tennexxee ta'a Duuchchi Woddiki Gootti arda atika, oose atixxa, aruwwa atixxana karra atixxa duuchcha jabaxxe balanni ganaan. 15 Atinna umo atige'n barra barrani jabake madhuma lo'o assaake fayyabaake dhukkubinni dhibendatton.› »

16 Duuchchi Woddiki Goottina Filisixeemitotinna Tophiyitoti bira hedha'neeka Arabiinki manni Iyyoraami'ni naaphake kade ke'aashsha asse. 17 Insa'nenna Yihudake arda'n duulleexxi lolle. Moyanjiinke mootummatike mine'n hedheeka miya duuchcha, labbaxxa oose isixxanna aruwwa isixxinni welti boojine adhdhine me'ine; maa'nichcho belto Akaziyaasi malee mitti beltinna isi'a gatebaan.

18 Ookkoneechchi uduma Duuchchi Woddiki Gootti fayya dande'abaake ma'lumatik dhukkubi Iyyoraami qooma shiye. 19 Ela gonphe iso'n lame wogga'a jabaatta'n me'itemmaxxee ma'luma lo'o hite'naa jaba qico wixixxi hiyye reye. Ardiknna edike ifike annuwwike ulfini'aa giira giirammani; isi'a kinn giirebaan.

20 Iyyoraami moye wodda wogga isixxi sase tommenna lametemmaan; Iyyerusaalemi ofo'leexxi saddeeta wogga moye galche. Isi reye wodda ayyinna isi'a yaadeeki hedhemmabaan; Daawwitike qachchi giddo moongeeni malee moyanjuwwiinke hirreessa'n isoo moongebaan.