1 Iyyo'aasi moye wodda wogga isixxi torbaane tommeman. Isinna Iyyerusaalemi ofo'lee shoole tomme wogga galche. Isixxi amanna Saabiya hiyyendaaxxe Bersaabehike qachcha'n ilendeexxemman. 2 Qeesichchi Yodaahe lubbot hedhemmake baro duuchcha'n Iyyo'aasi Duuchchi Woddik Gootti gammadaaxxa yaane asse. 3 Qeesichchi Yodaahe lame are moyanjo Iyyosiyaasi'a aadhise; labbaxxanna meyyaxxa oose afe'eemman.

4 Heenoxxe yanna uduma Iyyo'aasi Duuchchi Woddike Goottika galma qammachchatee mudhdhe. 5 Isinna qeesetinna Leewwito bukki asseexxi insa'nee, «Ha'noonna Yihudiinke qachchuwwibaa martineexxi Duuchchi Woddike Goottika galma wogga wogga'ninni qammachchatee Isira'eelika arda duuchchanaa'n maallaqa bukki asse; tenneenna ta'anni hujje» hiyye. Leewwito kinni ga'ma'mi hite.

6 Tennexxee moyanji umo qeesichcho Yodaahe e'yeexxi isoo «Duuchchi Woddik Goottik erganji Muusenna Isira'eelik ya'i afenshatike duunkaani'a uunaashsha murendeexxa irbo Yihudii'ninna Iyyerusaalemii'n Leewwito iyyedangaashsha mayee assa gophphete?» hiyye.✝

7 Eettene yanna eettene fuggitte Gotooliyaxxi oose Mageniinka galma enqite e'yiteexxi woyyomeeke miyuwwi midde gatebaangi Be'aalixxe fakkuwwaa la'oonfanteemman.

8 Moyanjiink ajajinni maallaqa bukki assemaaxxa saaxine hunje Duuchchi Woddik Goottik galmibaa e'yinammaxxe hula bira gadhi darree'ni uggine. 9 Ookkoneechchi uduma Isira'eeli qiilla gammoojje'ni hexxe'naa Mageniink erganji Muuse ajajemmaxxa irbo Duuchchi Woddike Gootti'a aa'ne dangaashsha Yihuda'ninna Iyyerusaalemi'n lassine. 10 Ja'laabuwwi duuchchi, ardi duuchchinna irbo gammanda'n aa'ne dange, maallaqakanna aa'ne danga'n wo'mitaa qico'n saaxinete'n uggine. 11 Leewwitotinna saaxine aaxxeexxi sooresuwwake kadeekeri'a mootummatike minike galchalluwwi'a barra barra'ni uunaamman. Saaxinete'n maallaqi wo'meexxe qixxe'n mootummatike miniki borreessanjinna umi qeesichchi ja'laabuwwi maallaqa saaxineti giddii'ni fulchene adhdhineechchi uduma saaxine bakkande'n hiisinaamman; konne qicinn heddo maallaqa bukki assine.

12 Moyanjikinna Yodaahe Duuchchi Woddike Goottika galma hujisaake maanni'a maallaqa uune; insa'nenna Duuchchi Woddik Gootti galma qammachchatee kino bocaakaranna mine ijaarammake iittanni galma qammachchatee sibilokanna sageettuwwa hujammake manni'a uune.

13 Hujetee bobba'eek manni jabaate hujemmaxxe hujetinna hujende; Mageniinka galma edi wodda hedhemmashshanni jabeessine haaronsine. 14 Insa'nenna hunje birreechchi uduma gateeka maallaqa manjibaanna Yodaahebaa aa'ne dange. Ookkone maallaqinni Duuchchi Woddk Goottik galmika miyuwwa la'o uwwateenna ciincatik tolchi'a lo'o uwwaaka miyuwwa ittanni mooqquwwatanna wele worqetikanna birretik sibiljika miyuwwa hirre.

Qeesichchi Yodaahe lubboti hedhemake baro duuchcha'ni Duuchchi Woddik Goottik galma'ni ciincatika tolcha duuchchi wodda shiqisa'nemman.

15 Yodaahenna cime bo'lo'leechchi uduma dhibbanna sase tome wogga'n lummedhe. 16 Isinna Isira'eeli giddo Mageniinke galmi giddo elo qico hujeemmaxxee Daawwitike qachcha'n moyanjuwiinke hirreesi giddo moogeme.

17 Yodaahexxe reyo uduma Yihudake bogik sooresuwwi dageexxi moyanjoke'n xuurameessumma ifixxa ege'nishe; moyanjikinna insa'ne hineexxa laqe. 18 Insa'nenna ifike edike annuwwika Mageno Duuchchi Woddika Goottika galma waalleexxi Asherate hiyyende ye'na'neexxe meyyaxx fakkuwwanna sooddo'ni magenoonfante. Insa'nexxe cubboxxe buutonn Mageniinxi Duuchchi mufe Yihuda'ninna Iyyerusaalemi'n gelte. 19 Duuchchi Woddik Gootti ifibaa hissitaashsha wabeeko ardi giddi'a erge; wabeeko insa'ne gorsite insa'nenna gorsa lanqebaan. 20 Ookkoneechchi uduma Mageniink hafuur qeesichcho Yodaaheeke belto'ni Zekkariyasi'n dage; isinna ardi edo uurreexxi, «Mageni hiyya'nee qici, ‹Duuchchi Woddike Goottika ajaja mayee saxxina'ne?› Ha'no'a qabbabaan ha'no Duuchchi Woddika Gootta waaldinemmaxxee isinna ha'noo waaleen.» 21 Insa'ne kinni isoo fuggoxxinni ke'ne; moyanjiinke ajajinni Duuchchi Woddik Gootike galmiinke ba'linna'ni isoo kinjik cancanqe shinne.✝

22 Moyanji Iyyo'aasi Zakkariyaasik anni qeesichchi Yodaahe isi'a asseemmaxxa eloxxa hedebaan; isi'a eloxxa assaammaxxa bakka belto isika sheye. Isinna reye wodda, «Duuchchi Woddik Gootti tenne hujeexxe fuggoxxe huje'a iso'n halo fulowwaal» hiyye.

23 Eettene woggake mayetik agenjo'n Sooriyak sannachchi moyanjo Iyyo'aasi'n duule; isinna Yihudanna Iyyerusaalemii buqe abide ardiinka akeekisanjuwwa duuchcha bire; booji'eechcho duuchcha Demasiqoka moyanjibaa erge. 24 Sooriyak sannachchuwwiki laakkossi heenookemman. Yaane kinni Duuchchi Woddik Gootti lumoshsha calaala sannacha anga insa'nexxe'n sa'ise uwwe, tinni kaddeechchi insa'ne ifike edik annuwwika Mageno Duuchchi Woddika Gootta waallemmaxxeeten. Konne qicinn Iyyo'aasi'ni dhugaatixxi murte murende. 25 Sooriyito fulde me'iteechchi uduma Iyyu'aasii fuggo madeesineemman; Iyyu'asinna qeesichcho Yodaaheka belto shiyeemmaxxee isik ja'laabuwwi iso'ni fuggoxxenni ke'eexxi taqete'ni diipheenba shiye. Isinna moyanjo Daawwitik qachcha'n moogeme malee moyanjuwwiinke hirreesa'n moogemebaan.

26 Iso'ni fuggoxxenni ke'eekiir Amoonichcho Sema'aatixxi belto Zabadinna Mo'aabitotixxi Seemarixxi belto Yoozabaditemman. 27 Isixxe labbaxxe oosexxi jirte, isixxee kulemeemmak heddo raaguwwanna Mageniinke galmi qammachchema moyanjuwwinn jirtetike maxaafa'ni borreessenedeen. Belti isik Amesiyaasi isixxe bakka'ni moye.