1 Hiziqiyaasi Duuchchi Woddika Gootta Isira'eelike Magenika sa'atika ayyaana ulfeesatee Iyyerusaalemii hedheek Duuchchi Woddike Goottika galmibaa daggaasha Isira'eelito duuchchi'anna Yihudaa erga erge. Iittanni Efireemi'anna Minaase'a borro borreese. 2 Moyanji, ja'laabuwwinna Iyyerusaalemik ya'i duuchchi sa'atika ayyaana langake agenjo'n ulfeesatee weli aange. 3 Ifi luqqi assexxemmaxxe qeesek lakkossi geyaake kada gopheemmaxxeenna ardikinna Iyyerusaalemi bukki hiyya gophemmaxee ayyana yannate'n ulfeessa dandeenneemmaba'a.✝ 4 Moyanjikinna ardi duuchchi yaadi toggichchake kadeexxa anfe. 5 Tennexxee Duuchchi Woddika Gootta Isira'eelike Magenika sa'atika ayyaana ulfeessatee ardi dagaashsha Bersaabehi'ni Daani qico'ni lassinaashsha murre. Borreessendema qicnni ookkone ayyaana heddi manni ulfeesse ege'nemmabaan.

6 Moyanjiinke ajajinn erganjuwwi kinni moyanjiinkanna ja'laabiinxa borro aadhdhine Isira'eelikenna Yihudake bogibaa me'ine; iitti borrotinna hitaamma qici, «Koo Isira'eelike arda! Isi ha'noo booji'otenaa'ni gattineeka Asoorike moyanjuwwixxe angana'ni fuldineekibaa higaashsha ha'noonna Abirihaamik, Yisihaqikenna Isira'eelike Duuchchi Woddika Gootta Magenibaa higge. 7 Ha'no uuddina'neeshshanni osolemmaake assaa qico'n Duuchchi Woddika Gootta ifike edike annuwwike Mageni'a xuurameeyyete kada gonpheemmake edike ha'nooke annuwwishshanna ha'nooke dayyuwwishsha kaddinoqqe'e. 8 Edike ha'nooke annuwwishshanni gooba micciirtinoqqe'e Duuchchi Woddik Gootti'a ajajemme; isi duuchchi woddi'a woyyoonseeke woyyichchi galmibaanna amme. Ta'inni udumi'a Duuchchi Woddike Gootta ha'nooke Magenixxi sodaachchissaaxxi mufe ha'nonaa'n higgaashsha isoo calla ergatemme. 9 Ha'noo Duuchchi Woddike Goottibaa higginoole isi ba'lakenna shaqqake kademmaxxee dayyuwwa ha'nookanna oose ha'nooxxa booji'emmake manninaa'n insa'ne mararte alfinaan; konne bogiba'aanna illeema hingaan. Ha'noonna Duuchchi Woddika Gootta ha'nooke Magenibaa higginoole isinna dudduro ha'noo'ni wirri hiyyabaan.»

10 Erganjuwwikinna Efireemikenna Minaaseke boga'ni hedheeke mitte qachchanaa'n mitte qachchibaa mareexxi middi darre'n Zabilonike bogi qico'n me'e. Ardi kinni insa'ne'e tuffatee gacifate. 11 Kaddo malee Aseeri'ni, Minaase'ninna Zabiloni'ni heenooki manni ifi heeshsh asse Iyyerusaalemi'a dage. 12 Ittanni moyanjikinna ja'labuwwi Magenke hiyyichchishsha ajajemmaxxa muuxaashsha, insa'ne mitte godoba kandaaashsha Duuchchi Woddike Goottiixxi anga Yihuda'ni hexxemman.

13 Langake agenjo'ni kebbootika ayyaana ulfeessatee hara bira sa'eek manni Iyyerusaalemii bukki hiyye. 14 Insa'nenna Iyyerusaalemi giddo magenoofantammaxxa fakkuwwanna tolchimalchwwa gonsheexxi iittanni hixaana gunbamachchuwwa boonchokenaa'n goggonshexxi Qeediroonixxe dhooqa'ni hunne.

15 Langake agenjixxe tommenna sholgaxxe barra'ni sa'atike ayyanika korbeessa dulle. Ookkone wodda qeesenna Leewwito ifi ca'a assedha gophat shookemmaxxee ifi qullonsexxe; ookkoneechchi uduma insa'ne ciincatika tolcha Duuchchi Woddike Goottike galmibaa aa'ne dange. 16 Ookkoneechchi uduma Magenk manji Muuse uwweeke seershshanni galmi giddo insa'ne'a uwwemeeke booncho'ni uurrite; leewwitonna tolchiinxa munde qeesetee shiqisse. Qeesenna Leewwito munde tolchimalchoke'ni fixxe. 17 Ya'i giddi'n heddi manni seeriinsha ifi ca'a assedha gopheemaxxee sa'atike ayyani'a kaddaaxxa gedhebiinka buruusuwwa gorra'atee insa'ne'a eettii uwwendeemmabaan. Tennexxee Leewwito insa'nexxe bakka'ni gedhebiinka buruusuwwa gorra'ati Duuchchi Woddike Gootti'a shiqisse.

18 Higgeeni Efireemike, Minaasek, Yisakoorikinna Zabilonike boganaa'ni dageeranaa'ni heddi manni ifi ca'a assebaakenna kaddoole borreessemeeke ajaji gadho sa'atike ayyaanixxa ita inde. Hiziqiyaasi kinni hiyye soodatee qici, «Eloke Duuchchi Woddik Gootta insa'ne'a gattowwaal hiyyi; 19 edike annuwwa insa'nekike Duuchchi Woddike Gootta Mageno! Kunni manni aadatishsha ifi ca'a assedha gophoolenna midde mitte godobinni atee magenoofata'neekeeran. Tennexxee insa'nee atixxe ellenni gattowwaal hiyyi!» hiyya'ni soodate. 20 Duuchchi Woddik Goottinna Hiziqiyaasixxa soodachcho laqeexxi ardakee gattowwaal hiyye.

21 Leewwitonna qeese Duuchchi Woddike Gootti'a faarsinammake miyuwwinni qoqqobemme barra barra'ni Duuchchi Woddike Gootti'a faarsina'ni Iyyerusaalemi giddo hexxemaxxi Isira'eelito kebbootika ayyaana lumoxxe gammashshonni torbaane barra ulfeessine.

22 Hiziqiyaasinna Duuchchi Woddike Gootti'a ergatenshatixxa qalbeeffachcho affemaxxa leewwito duuchcha jajjabeessaaka haaso'a haaso'e. Insa'nenna torbaaniixa barra insa'ne'a uwwemeeka qoobbo inda'ninna mittoomiinka tolcha shiqinsha'ni edike annuwwika Duuchchi Woddika Gootta Mageno galateefante.

23 Ya'i duuchchinna weli duuka torbaane barra ayyaana higgeenni ulfeessatee weli aange. Tennexxee ayyaana torbaane barra'a higgeenni lumoxxe gammashshonn ulfeessine. 24 Yihudiink moyanji Hiziqiyaasi mitte kuma jibichcha, torbaane dhibba gedhebonna re'e ya'a fuleeke manni'a uwwe. Ja'laabuwwikinna ittanni mitte kuma jiboota, tomme kuma gedhebiinxa korbeeyyenna re'e uune. Hara yo'oxxi qeesenna ifi woyyoonsite. 25 Tennexxee duuchching Yihudiinke bogik ardi, qeesenna leewwito, Isira'eelike boganaa'ni bukki hiyyeek ya'i duuchchi, iittanni Isira'eelike boganaa'ni dageek wele bogik manninna Yihudiinke boga'ni hedha'neek wele bogik manni yo'oshsha gammade. 26 Isira'eelike moyanjo, Daawwitike belto Solomoonike baronaa'ni saffe iita hedheeke ayyaani Iyyerusaalem giddo ulfeessema gopheemmaxxee Iyyerusaalemi lumoxxi gammashsha kadde. 27 Ookko'ninna qeesenna leewwito kexxe uurriteexxi Duuchchi Woddike Goottika arda eebbissaashsha soodatte. Duuchchi Woddik Goottinna woyyichcha galduma ifike'ni iima hedhee soodachcho insa'nexxa laqe.