1 Moynaji Abiya edike ifike annuwishshanni lummedhe; Daawwitike qachcha'n moyanjuwwiinke hirreesa'ni moonge; belti isiki Aasa isixxe bakka'n moye. Aasa moyemmake baro'n tomme wogga qico'n nage'i afeme.

2 Aasa Duuchchi Woddike Gootta isike Mageni edo eloxxanna qajeelto yaane asse. 3 Isinna alagiinke magenuwwika tolchimalchuwwanna tullichchuwwa hanna hexxeemmaxxa magenoofachchotixxa bakkaara balleese; mageneefachchotika kinotika utuphuwwa diige. Asheerate hinaaxxe meyyaxxike mageni'a uurrinseexxa haqqichchixxa fakkuwwa kukkute hune. 4 Isinna Duuchchi Woddika Gootta edike insa'neke annuwwika Mageno halsinaashsha, seerakanna ajajuwwa muunxaasha Yihudiinka arda ajaje. 5 Isinna mitte mittenge Yihudiinke qachchuwwa tullichchuwwi hana magenoofachchotika boonchuwwanna hixaana gunbaaka tolchimalchuwwa balleesse; mootumma isixxinna isi galchammake baro'ni nage'a alfite. 6 Bogake'n nage'i birasa'emaxxee Yihudake kinjiinke dalla'ika qachchuwwa ijaare. Duuchchi Woddiki Gootti nage'ik hedhaasha asseemaxxee baro isike'n isoo loleeki mittikinna hedhemmabaan.

7 Aasanna Yihudiinke ardi'a hiyyee qici, «Konne qachchuwwa ijaaro; xellephpho, cufanakanna danqarisanjo afeeka dalla'uwwa qariqarake'n giisinno. Duuchchi Woddika Gootta Mageno no'oka halsinennaxxee bogi ta'anna no'oken, no'onna isoo halsineennen; isinna duuchchinni darrenaa'n no'o hafuura adhdhiseen» hunjeexxi duuchchanna insa'ne'a kadde.

8 Aasa lumolamma wontenna bagedo abixxeeka sase dhibba kuma Yihudiinka loliinka manna iittanni shiixxaramma wontenna mogido abixxeeka lame dhibbanna saddeeta tomme kuma Biiniyaamika loliinka manna afeemman; kunni duuchchi jajjaba loliinke mannamman.

9 Zerahi hiyyemaak Tophiyiinki manji mitte miliyoone loliinka mannanna sase dhibba loliinka sarageelluwwa adhdheexxi Yihuda'a lolo'a Meeriisa qico'n dage. 10 Aasanna isoo lolo'a fule; Mersha bira hexxeexxe Tsefataxxe dhooqa'n lolakee booncho abixxine.

11 Eettene yanna'n Aasa Duuchchi Woddike Gootta ifike Magenibaa hiyye soodatee qici, «Ee Duuchchi Woddike Goottaa gophaleeyye hunnameeyyetenaa'n gargaraaki atishsha hedheeki ayyinna hedhebaan; ee Duuchchi Woddike Gootta no'oke Magenoo ate'n addantennaxxena konne heddi loliinke manninni atike summinni lola inbaannen; ee Duuchchi Woddike Goottaa no'oki Mageni ateten; manji atee injifataakebaani.»

12 Duuchchi Woddiki Gootti Tophiyiinka loliinka manna Aasanna Yihudiinke manni edo gane. Tophphiyiinki mannina baaje. 13 Aasanna isiki loliinki mann Giraari qico'n shorinshe. Tennexxee hiddi Tophiyiink manni* konne qicini Tophphiyiinki manni Duuchchi Woddike Gootti edonna isike loliinke mann edo munde. Yihudiinki manninna yo'oshsha bira saxxeexxa booji'o booji'e adhdhe. 14 Giraari qarqara hedheeke qachchuwwa duuchcha'n Duuchchi Woddiki Gootti yo'oka alayyo ibiseemmaxxee qachcha duuchcha bakka balleesine; yo'oxxa booji'onna boojine. 15 Iittanni hore alaldammaxxa alalisano lole miineexxi yo'oka gedhebo, re'enna gaaluwwa boojinee Iyyerusaalemi'a hinge.