1 Ookkoneechchi uduma Mo'aabitonna Amoonito heenoxxe Mi'unawitonni welti Iyyosafixxii lolo'a dange.

2 Manni dageexxi Iyyosafixxi'n hiyyee qici, «Hara yo'oki loliinki mann atee lolo'a maxinetixxe* abbaayya wido hedheeke Edoomike* boganaa'n atibaa dageeni; kunniseteni Hasetsoni Tamari hiyyendammaxxa Ayyini gadi he'neen» hine. 3 Iyyosafixxinna yo'oshsha sodaatemmaxxee Duuchchi Woddika Gootta harse; Yihudiinki ardi duuchchi agabo goddo hosaashsha lasse. 4 Yihudiinki ardinna Duuchchi Woddiki Gootti insa'nee gargaaro'a; soodachchotee Yihudike qachchuwwa duuchchanaa'ni mitteba bukki hiyye.

5 Iyyosafixxinna Duuchchi Woddike Goottike galmibaa haarooke ba'linni edi darre Yihudikinna Iyyerusaalemiki ardi bukki hiyyeexxe oddo'n urreexxi; 6 Hiyyee qici:

«Annuwwi no'okike Duuchchi Woddike Gootta Mageno; ati iimate'n hexxaateke Magenoba? Ati gosa gosake ardixxa mootummuwwa duuchcha galchitateki ateten; hunnana jabeenni atixxe anga'n hedheen; ate morome dande'aki ayyinna hedhebaan. 7 No'oke Mageno; konne boga'n hedhemmaka manna arda atike Isira'eeli edi'n fulchite shorritettexxi; jaalo atike Abirihaamixxe horte'a duuchchi woddi'a uutetteki ateteba?✝ 8 Insa'nenna konne boga'n ofolleexxi; summi atikike ulfini'a galma ijaare; hinee qici, 9 ‹No'o mura woxisatee lola yookaan, dhukkubi yookaani solo'iinxi rakko no'o'n geltoole summi atiki ye'emeeke konne Galmi edo ati edo uurrine rakkotenaa'n no'o gargartotaa atiba'a raarrannen; atinna raare no'oxxa laqqe no'o anjirtatton› hine.

10 «Isira'eeli Gibtsee'n fuldee wodda konne mannika boga e'yine lollabaashsha assitetaxxee marree insa'ne birrebaangi waallemmaki Amooniki, Mo'aabikinna Seyiirixxe koobaki mann no'o lolo'a dageen.✝ 11 Kunseteni ati no'o'a geego uutettake boganaa'n no'o shorrine halo fullo'a dangeen. 12 No'oke Mageno; ati insa'ne'n murtabexxo? No'o'n duule dageeka konne yo'oka sanaachcha injifantannoxxa hunna anfebe'non; maa asinannoxxa egennebe'non; yaane kinni no'o gargartotaa atibaa uundaannen.»

13 Yihudiinki mann duuchchi aruwwa ifixxinn, oosuwwatinna shiixxaramma oosuwwanni welti Duuchchi Woddike Gootti edo uurrineemman.

14 Eettene yanna Aasafixxe horte kadeeke Leewwichcho Zakaaryaasi belto Yahazi'eeli'n Duuchchi Woddike Goottiki Hafuuri dage. Zakkariyaasi kunni Bennayaasike belto kadaa wodda, Bennayaasi Yi'i'eelii Maataaniyaken. Mataniyakemman.

15 Yazi'elinna hiyyee qici: «moyanjo Iyyossafixxi balloo! Ha'noonna Yihudiinkena Iyyerusaalemi hexxina'neeki duuchchi laqqe! Duuchchi Woddiki Gootti ha'no'a hiyya'nee qici; ‹Lola'neeki Magenoke malee ha'nootebaan; konne yo'oke sannachchi'a sodaattinoqqee; alaltinoqqe.✝ 16 Soodo adaddee martine insa'nee lolle! Insa'ne Tsitsika ora qabante alaallee dangaani; ha'noonna Yiru'eelixxe qiilla gammoojje giddo dhooqatike kasa'n insa'ne affinaan. 17 Konne lolanna loldinaaki ha'nootebaani; koo Yihudiinkenna Iyyerusaalemike manna; bakka bakka ha'nooxxa abixxe; jabaattine uurre; Duuchchi Woddiki Gootti injifachcho ha'no'a uwwaaxxa uuddinaan. Sodaattinoqqe; alaltinoqqe; soodonni fuldinee insa'ne lolle; Duuchchi Woddiki Gootti ha'noonni welti hedhaan› » hiyye.✝ 18 Iyyosafixxi albiki buttinake'n gombiseme; Yihudiinknna Iyyerusaalemki ardi duuchchi Duuchchi Woddike Gootti edo ibe sagade.

19 Qe'atixxenna Qorexxe horteexxe gamo kadeexxi heenooxxi Leewwitonna uurrteexxi hafuura gikki assteexxi Isira'eelika Duuchchi Woddika Gootta Mageno galateefate.

20 Ardi gorsa bariisa ke'exxi Teqo'ake qiilla gammoojje bogibaa me'e. Ookko'a me'atee ke'neeshshanni Iyyosafixxi uurreexxi insa'nee «Yihudiinkenna Iyyerusaalemike arda hiyyanexxa laqqe! Duuchchi Woddike Gootta ha'noke Mageno'n amanne; ti'ni hitinaan; wabeeko haasottaaxxanna amanne; yaane ha'no'a qajeldaan» hiyye. 21 Iyyosaafixi ardiki welti mari'ateechchi uduma ookkone sannachchi edo sa'eexxi me'ati

«Jaalala isixxi duuchchi woddixxe kaddemmaxxe Duuchchi Woddika Gootta galateefatte!» hiyya'n Duuchchi Woddike Goottixxe woyyumaxxeenna ulfinixee isoo saadaaka manna foye.

22 Faaro faarsatanna saadino sanfeeshshanni Duuchchi Woddiki Gootti Yihuda lola'emmake Amoonike, Mo'aabikenna Seyiirixxe koobake manna'n sho'omeeka bagedo iyyedage; insa'nenna injifatemme. 23 Tennexxee Amoonitonna Mo'aabito Seyiirixxe koobaka manna duuchcha balleesateenna biratee insa'ne'n ke'ne; Seyiirika manna birreechchi uduma insa'nenna mararte belo weli welinni birre.

24 Yihudiinki sannachchi eettene qiilla gammoojje leellishshaaxxe bakka'n hedheexxi ookkene bira sa'eeka sannachcha adaadde uuda woddda ookkone boga duuchcha'n renshi wo'mee'naa afe; mitti manjinna baaje fuleek hedhemmabaan. 25 Tennexxee Iyyosafixxinna isik loliinki manni booji'o adhdhatee ookko'a me'ine; heddo gargar gargar hedheeka miyuwwanna seemma, ba'edhatee dandeesisabaaka fiixeeka miyyuwwa alfine; eettene booji'otinna birasa'netenaa'n kexxeexxa sase barra qico bukki asse'ne. 26 Shoolgaxxe barra'n Eebbatixxe Dhooqa'n bukki hine; ookkone booncho'n Duuchchi Woddika Gootta galateefante; tennexxee ookkone boncho telchi qico'n Eebbatixxe Dhooqa hiyyemmeechchi tennexxeeten.

27 Ookkoneechchi uduma Duuchchi Woddiki Gootti ifika naapha injifante gammandaashsha assemaxxee Yihudiinkinna Iyyerusaalemiki mann duuchchi Iyyosafixxixxe akeettenni lumoxxe gammashshonni Iyyerusaalemi'a ille iima hinge.

28 Iyyerusaalemike qachcha'n e'yineeshshanni baganakanna, masinqo ganna'n malagatakanna ufuunfa'n Duuchchi Woddike Goottike galmibaa me'ine.

29 Duuchchi Woddiki Gootti Isira'eelika naapha hitta loleexxa laqeeke moyanjuwwa duuchcha'n Magenibaa'n soda'a insa'ne'n ibbe. 30 Isik Magen duuchchi darree'n hafuura adhdhisemmaxxee Iyyosafixixxi mootumma nage'iki hexxemman.

31 Iyyosafixxi Yihudiinke moyanjo kadee wodda wogga isixxi sase tommenna onde woggamman; isinna Iyyerusaalemi ofo'leexxi lame tommenna onde wogga moye; isixxi amanna Azuuba hiyyendaaxxe Shilihixxe beltomman. 32 Iyyosaafixi isi edi darre hedhemmake isika anna Aasanni Duuchchi Woddike Gootti edo eloxxa asse. 33 Kaddo malee tullichchuwwiinka magenoofachchotika boonchuwwa balleesse bireemmabaan; ardikinna ifike edike annuwwike Magenibaa ookkone qico'n mitte godobinni higemmabaan.

34 Iyyosafixxi moyemmake baro'n ke'itokenaa'n muuxamii qico'n hujendeexxa wele hujuwwa Hananiki belti Iyyu borreesseke Isira'eelike moyanjuwwiinke jirteke maxaafi giddo borreessende'een.

35 Ookkoneechchi uduma Yihudiinki moyanji Iyyosafixxi hara elobaxxa huje hujeke Isira'eelika moyanjo Akaaziyaasinni welti guddeexxi weli aagemman. 36 Insa'nenna Daddaliinka markabuwwanna hujinso'a weli aange; konnee markabuwwanna Tsiyooni Gabiri giissinse. 37 Maressa bogiki manji Doodiyaaki belti Eli'eezer Iyyosafixxi'n, «Akaaziyaasinni welti guddite weli aaggettaxxee Duuchchi Woddiki Gootti hujjetexxa duuchcha balleesaan» hiyye raaga raage; iikki markabuwwinna enqeme; daddaliinxe huje'anna me'a dandeeneba'a.*