1 Qiroosi Faarsike moyanjo kadeexxe siretixxe wogga'n Duuchchi Woddik Gootti Qiroosika yaada ke'isseexxi isi moyaammake boga duuchcha'n lallabemashshanna kunninni lallabi kinni borreesseme uggemaashsha assise; tinninna kaddeechchi Ermiyaasike afo'o'ni haaso'emeemmak Mageniink hiyyichchi muuxemo'aatemman.✝

2 Faarsik moyanji Qiroosi lallabe'e hiyyee qici, «Duuchchi Woddiki Gootti iimik Mageni buttatixxa mootumma duuchcha ane'ni uwwe'eeni; Yihudiinke boga'ni hexxeexxe Iyyerusaalemi'ninna isi'a galma iijaaronna'a anee'e ajaje'een.✝ 3 Ha'no giddo isike manjo kade'eek duuchchiingenni Mageni welti hedhowwaali; isi Yihudiinke bogi giddo hexxeexxe Iyyerusaalemi'a, alalle mareexxi ookko hedhaake Duuchchi Woddike Gootta, Isira'eelike Magenka galma ijaarowwaali. 4 Hedhe hedheenxe bakka'n gataak hoone bogik manni duuchchinna Iyyerusaalemi hedheeke Mageniinke galmi'a uwwatee kadaashsha ififike yaadinni shiqishaaxxe uwwa gadhi darre lebeexxi birretika sibiljonna worqe, miyuwwakanna hore uwwa'n insa'nee'e gargaarowwaali» 5 Ookkoneechchi uduma Mageni yaada ke'isseeki Yihudiinkinna Biiniyaamike mannik akeekisanjuwwi, ittanni qeesetinna Leewwito duuchchi marteexxi Iyyerusaalemi giddo Duuchchi Woddike Gootti'a galma ijaarro'a qophpheefante. 6 Olla'i insa'neki duuchchi feedhi ifixxinni uwweexxe uwwa gadhi darre lebeexxi birretike sibiljika, worqetika miyuwwa, horuwwakanna wele la'o affeexxa uwwa duuchcha uwwiyyoti gargaarre. 7 Konnechchuwwa waalini moyanji Qiroosi, Naabukedenetsoori Iyyerusaalemi'n aadheexxi ifike magenuwwi mine'ni uggeemmaka Mageniinke minika woyyichcha miyuwwa fulche. 8 Faarsik moyanji Qiroosi myuwiinke minika sooreessa Mitridaaxu darre'ni woyyichchi mi'uwwi dageexxi Yihudaka galchallo Seesabisaari edo laakko'emaashsha asse. 9 Mi'uwwiinkinna konnechchinni butti'a hedheekeramman, 30 Worqetixxi qoruwwa, mitte kuma sibiljiinxa qoruwwa, 29 ferritte sibiljiinxa qoruwwa, 10 30 hubbuqqitte sibiljiinxa qoruwwa, 410 birretike sibiljixxa hubbuqqitte qoruwwa, mitte kuma wele mi'uwwa. 11 Duuchchingelchi mittenba onde kumanna shoole dhibba birretike sibiljiinkenna worqetike miyuwwamman; booji'emeek manni Baabilooni'n Iyyerusaalemi'a higaa wodda Seesabisaari konne duuchchiinga miya aadhe fule.