1 Torbaki agenji geyee wodda, Isira'eelik ardi ifi ifinge qachcha'ni hedha'neege'ni, iikki ardi mitte manjishsha kade Iyyerusaalemi bukki hiyye. 2 Ookkoneechchi uduma Iyyooseedeqiki belti Iyyaasunna isik firi qeese ittanni Selaatiyaatiki belti Zerubaabeelinna isik hujetik jaaluwwi, Mageniinka manjo Muuseke seera'ni borreesendemmashsha ciincatika tolichcha shiqishatee, Isira'eelike Magenika tolchimalichcho giissa sanfe.✝ 3 Qarqara insa'neeke'ni hedheeka arda sodaantoolenna tolchimalichcho edinxe isixxe booso'ninni giissine; tolchimalichchoke'ninna gorsanna galgala shiqaaka cincatika tolcha Duuchchi Woddike Gootti'a shiqinshe.✝ 4 Ookkoneechchi uduma barra barra'nde'e ajajendemmashshanni geyaake laakkoossi qico ciincatika tolcha shiqishati fooqiinka ayyaana boreessememmashshanni ulfeessine.✝ 5 Ookkoneechchi uduma duuhchchin wodda shiqaammaka ciincatika tolcha, reefi baate fuldamma woddika tolcha, woyyichcha Duuchchi Woddike Goottike ayyaana'n shiqaammaka tolchanna fedhi ifixxen Duuchchi Woddike Gootti'a uwwemaammaka tolcha shiqinshe.✝ 6 Duuchchi Woddike Goottike galmiki ijaarsi safema gophe'eexxe kaddoolenna torbake agenjixxe siretixxe barra'n Duuchchi Woddike Gootti'a ciincatika tolcha shiqinshe.

7 Ookkoneechchi uduma insa'ne kino boce giissaammakeri'anna mine ijaaraammake manni'a maallaqa uune; Faarsika moyanjo Xiiroosike ajajishshanni birbirsiinka haqqichchuwwa Libaanoosinaa'n Iyyophexxe abbaayya hana insa'ne'a iyyedago'a Siidoonakenna Qiroosike manni'a ita, ha'wokanna zayite uune. 8 Iyyerusaalemi hedheeke Mageniinke miniba'a genneexxe langaxxe woggake langake agenjo'n, Selaatiyaaliki belti Zerubaabeelinna, Iyyooseedeqik belti Iyyaasu ittanni weli gateek insa'neeki dayyuwwi qeesenna Leewito, booji'otenaa'ni Iyyerussaalemi'a illee iima higeeki duuchchi sanfe, Leewwitonna lame tomme woggana'ni sanfeexxi ookkoneechchi iimi darree hedheeka Duuchchi Woddike Goottika mini hujinsaashsha insa'nee towataashsha fille. 9 Iyyaasunna isixxi labbaxxi oosenna isik dayyuwwi Yohoodayaxxi horte Qadimi'eelinna isixxi labbaxxi oose, Henadaadixxi labbaxxi oosenna insa'neexxi dayyuwwa Leewwito duuchchi Mageniinka mine ijaaraaka manna towatatee mitteba afemme. 10 Mine ijaaramaki manni Duuchchi Woddike Goottike galmiinxa booso ke'issine baro, qeese qeesumatixxa seemma oddo'wite'e malagata anga abixxiteexxi, Leewwichcho Asaafixxi labbaxxi oose kinni qiqillisa anga abixxiteexxi, Isira'eelika moyanjo, Daawwitixxe akeetteshshanni Duuchchi Woddika Gootta saadiyyotee bakka abixxite.✝ 11 Saadinotinna galatiki, «Duuchchi Woddik Gootti eloke kadeemmaxxee, isi Isira'eeli'a afe'eexxi jaalalanna duuchchi woddixxen» hina'ni Duuchchi Woddika Gootta faarsine; Mageniinke minixxi booso ke'isendemmaxxee ardi duuchchinna hafuura gikki asseexxi ililisa'n Duuchchi Woddika Gootta galateeffate.✝ 12 Edi woddika galma uddemmaxxi heddo qeese geedhe, Leewwitotikinna mini mini hadiki akeekisanjuwwi konne galmixxi booso ke'isende'na'a uundeexxa yanna haafura gikki assineexxi oo'ne; weli kinni gammada'n ililise. 13 Ardiinxi raare hara bira saxxeexe kaddeemmaxxe'e gammashshotixxa ililleette oodhishatixxe hunbaashanaa'n gargar hiissa dande'eek manji hedhemmabaan.