1 Tenne yaanuwwa uduma Faarsik moyanji Arixxeekisiissi moyeeke baro'ni Izira Serayake belto kadaa wodda, Saraya Azaariyaasike belton, Azaariyaasi Hilqiyaasiyake belton Hilqiyaasi Seloomekiki, 2 Seloome Saadooqike belton, Saadooqi Ahixoobike belton, Ahixoob Amaariyake belton, 3 Amareya Azaariyaasike belton, Azaariyaaasi Merayotike belton Merayooti Zera'iyake belton, 4 Zerahiyya Uuzike belton, Uuzi Buqike belton, 5 Buqi Abishu'ake belton, Abisu'a Finhaasike belton, Finhaasi Ali'aazaarike belton, Ali'aazaar Aarooni qeesete umike belton, 6 Izira kunni Baabilooni'ni dage. Isinna Duuchchi Woddiki Gootti Isira'eelik Mageni Muuse'ni uwweemmaka seera quncu asse'e ege'nemmake seerinnke barsiisanjomman; Duuchchi Woddike Gootta ifike Magenixxi hunna iso'ni hexxemmaxxe isi laqechcho duuchcha moyanji uwwe. 7 Iittanni mitti mitti Isira'eelike mannanaa'ni qeesoletenaa'ni, Leewwitotenaa'n, Faarsaaleyyetenaa'n, hulatike heqqanjuwwa'ninna galmi giddo ergatemammak Arixxeekisiissi mootummatike baro'ni torbakee agenjo'ni Iyyerusaalemi dange. 8 Izira Moyanji Arixxeqisiissi moyeexxe torbaxxe woggake ondike agenjo'ni Iyyerusaalemi geye. 9 Jabaxxi Mageno ifikixxi hunna iso'n hexxemmaxxe Baabiloonii'n siretike agenjixxe taakkaxxe barra'ni ke'eexxi ondike agenjixxe takkaxxe barra'ni Iyyerusaalemi geye. 10 Izira Duuchchi Woddike Goottika seera qote qo'nisati ajajematinna seeriinxa aaduwwanna ajajuwwa Isira'eelike arda'n barsiisati hedho ifixxa uwwe'emman.

11 Duuchchi Woddiki Gootti Isira'eeli'a uwweemmake seerinninna ajajin muxxe kade'eke, qeesichchi'aanna barachchiisanjo Izira'aa, moyanji Arixxeekisiissi uwweemmaxxe borroxxi koppe,

12 Moyanjo Arixekisiisinaa'ni, iimike Magenike seerike barsiisanjo kade'eeke Iziraa'a qeesichchi'a

Nage'i ati'a kadowwaal.

13 Anxe mootumma giddo hedheek Isira'eelik ardi, qeesetinna, Leewwitotanna mitteba atinni welti Iyyerusaalemi'a me'a hasa'neek fedheek Isra'eelawichchi me'a dande'aaxxa ani konnee ajaja uwwe'ennen. 14 Ati anga atixxe'n hedheeke atike Magenika seera uuddaaxxen, Yihudanna Iyyerusaalemi giddo hexxeexxa yaane hubbattotta'a moyanji ani anke torbaane mari'etke manninni ate'e erge'ennen. 15 Tinni hexxeeshsha hexxee'na'a Iyyerusaalem hedha'neeke Isira'eelike Mageni'a ani moyanjikinna ank gorsalluwwi fedhi no'oxxen uunenneka birretika sbiljonna worqe aaxxe me'i. 16 Ittanni Baabiloonike awuraajjinaa'ni aaxxetteke birretika sibiljonna worqe duuchcha, ardikinna qeese Iyyerusaalemi hedha'neeke ifike Mageni'a fedhi ifixxenni uuneexxa uwwa duuchchanna aaxxe me'i. 17 Konne maallaqinni jiboota, gedheebinxa korbeeyyenna gedhebiinka buruusuwwa, welti tolchendaaxxe midhatixxe uwwuwwanninna ha'watixxa uwwuwwa mitteba hirtaattexxa mee dedhi; konneechchuwwanna Iyyerusaalemi hedheeke ha'nooke Mageni galma'n giddo hedheeke tolcha'n shiqishshatton. 18 Ookkoo'ni gattaaxxa worqenna birretika sibiljo ha'nooke Magenixxe fedheshsha atinna atik dayyuwwi Ayihudi, ha'no'o eeyyissaaxxe yaanexxe huje'ni hosisse. 19 Mageni atikike galmi giddo hujete'n hoso'a ate'n uwwemeeka miya duuchcha Iyyerusaalemi hedheeke atike Mageni edo shiqishi. 20 Ittanni Mageni atikike galmi'a uutotta'a hasisaachchco duuchcha moyanjiinke maxaafinke minena'ni adhdha dandeettattoni. 21 Ani moyanji Arixxekisiisi Eefiraaxisi wido hedheeke miyiinke minike ja'laabuwwi duuchchi'a, iimike Magenike seerik barsiisanji, qeesichchi Izira ha'noo laqaachcho duuchcha rakkine uutinaashsha ajajeennen. 22 Sase kumanna shoole dhibba kiiloo qico birreti sibiljo, tomme kuma kiiloo qico dinne, lame kuma liitire qico woyinetika bulbulo, lame kuma liitire qico ejersiinxa zayitenna hasissaa qicixxa maxine isi'a uwwe. 23 Iimiki Mageni ajajeexxa duuchcha, iiimike Magenike galmi'a jabaxxe xexxe'achchonni muuxema hasiissaani; mayeeta Mageniinxi mufe moynjoke'ninna isixxe oose'n gelta? 24 Ittanni kinni ha'no'o qeesete'n, Leewwitote'n, faarsaaleeyete'ni, hulatike heqqanjuwwa'ni, galmi gidike ergaanjuwwa'n, yookaan konne Mageniinke minike wele erganjuwwa'n qaraxxa irbotanna wele uwwuwwa insa'ne'n ibisatika baallooma affinebaaxxa tenne ege'ne. 25 Ati kinni koo Izira Mageni atiki ati'a uwweemmake beekkumishshanni Efiraaxisi wido hedheeke ardi duuchchi'a atike Mageniinka seera ege'neeka hayyichchuwwanna galchalluwwa arda akeeko'a hariir; seera ege'nebaak manji hedhoole ati iso'o barsiisi. 26 Atike Mageniinke seeri'anna moyanjokee ajajemabaak huuni manjinna reyo yookaani bogake'naa'n shorrensha, yookaan karratixxi boji'ensha yookaan usurri iso'n geyaan. 27 Iyyerusaalemi hedheeki Mageniinki mini iitta ulfeessemaashsha yaada konne'e moyanjoke'n uggeeki Duuchchi Woddiki Gootti no'oke annuwwik Mageni isi saademowwaali. 28 Ittanni moyanjoke'ni, moyanjiki mari'etike manna'n jajjabbi Ja'laabuwwi duuchchi edo elle alfannoshsha asseki Duuchchi Woddiki Gootti galateffatemowwaal; Duuchchi Woddika Gootta anike Magenxi hunna ane'ni hexxemmaxxe, aninni welti me'o'a Isira'eeli giddii'ni akeekisano bukki assonna'a hunna alfenne.