1 Tinni yaanuwwa muuxxendeechchi uduma akeekisanjuwwi aniba dangeexxi: «Qeesetinna, Leewwito Isira'eelike ardinni welti olla'ake'in hedheeka Kenaanike, Hiititootike, Ferizaawike, Iyyaabusike, Amoonike Mo'aabike, Gibtsekenna Amoorake ardixxe battummanaa'ni ifi foonebaan. 2 Dubaarte insa'nexxa ifi'a aa'ne'e ifixxe labbaxxe oose'ninna aadhi'lsineexxi woyyitte sanne buttatike ardni welti manke'eeni; tenne balleesa'a umoke kade'eemmak ja'laabuwwakenna akeekisanjuwwaken» hiyye.

3 Aninna tenne laqennexxa yanna yaaddoti seemma anxa daddarenne; umo anikika ordichchonna areeda corennexxi jabaxxe yaaddonni butta ofo'lenne. 4 Boji'otenaa'n illee iima higeeki manni elobaaxxa assatenaa'n kexxeexxinni Isira'eelike Magenika haaso'a laqeexxi alayyik culphiseek duuchchi qarqara anike'ni bukki hiyye; aninna galgalik tolchi tolchemaaxxe yanna qico'ni yo'oshsha alayye ookkonni ofo'lenne.

5 Ookkoneechchi uduma galgalik tolchi tolchemamma wodda, daddarendeemmaxxa seemma odo'wenneshshanni yaaddoti ofo'lennenabaa'ni ke'ennexxi guluffate'e Duuchchi Woddika Gootta anika Mageno 6 hiyya'ni soodatene qici, «Koo anike Mageno, cubbo no'oxxi no'oke umi iimi darre kadde'een, balleesa no'oxxinna iimi qico'ni gelte'eeni; ee anike Mageno atibaa alba qokki hiyya shookenne; yo'oshshanna sodaatenne. 7 Edike noke annuwwike baronaa'n ta'i qico'ni balleessa no'oxxi jabaxxen; cubbo no'oxxenaa'n kexxeexxinni telchonna kadeeshanni no'o, no'oke moyanjuwwinninna no'oxxe qeesoleninni alagiinke moyanjuwwixxe anga'ni sa'issemme uwwemennexxi wolaantichchake'ni, booji'emate'ni, saamemate'ninna shookoke'n inbeenneni.

8 «Ta'a kinni Duuchchi Woddiki Gootti Mageni no'oki hafa no'o'o gatiso'a galmi ifik giddo jabaxxa bakka no'o'a uwwiyyoti shiixxoxxa yanna qattammannoshsha, no'o'a arijoomeeni; tennexxee Mageni no'oki ille no'oxxi ifa uuddo'a asse'een; garbummande'n he'nee'naan heenoxxa yanna no'o'o hafuura adhise. 9 Garboolleyyetenna kandonole Magen no'oki kinni garbummate'n he'nonna'a no'o'o waalebaani; yaane kinni Faarsike moyanjuwwi edo arjumma ifixxa no'o'ni leellishe; no'oke Mageni mine haaroba ijaarrannoshshanna ole isixxa qammalchinonna'a haaroxxa hedho no'a uwwe; Yihuda giddonna Iyyerusaalemi giddo gollantannoka dalla'a no'o'a uwwe.

10 «Ta'a kinni, ee, no'oke Mageno, ta'anni udumi'a maa hinannota? Ajajuwwa atikanna shollinshennaxxe'e; 11 shollinsheennexxi atixxe wabeeko darree'n haasotta'ni, ‹Dhaaldino'a e'yitina'neek bogi giddo hedhemmake ardixxe battummanni batto'edheen; kasakenaa'ninna kasini qico'ni insa'neexxi diqqachchiisaaxxi hujenna battumma bogake'n wo'mite'een. 12 Tennexxee dubarra ha'nooka insa'neexxe labbaxxe oose'n heerunsiissinoqqe; ha'noonna insa'neexxa dubarte ha'nooxxe labbaxxe oose'n aadhissinoqqe'e; jajjabake kaddinaashshanna bogiinxa elolla yaane ittino'a, oosuwwa ha'nooxxeenna duuchchi woddika geego dhaalchissino'a insa'nenni welti ha'noonna jaalondinoqqe'e› hitettexxi uute'etake ajajan.✝

13 «Tinni duuchchi no'o'n gelteechchi no'oxxe fuggoxxe hujexxeenna bira saxxeexxe no'oxxe balleessaxxe buutonniten; no'oke Magenoo ati kinni no'oxxe balleessaxxe bira sa'neshsha no'o'o xixebexxon; yaane kinni hafe no'o'o gatissetten. 14 Eega ajajuwwa atika langaxxa qaxxaammura'neexxi iitta hexxeexxa diqachchiissaxxa yaane hujaake arduwwin welt aadha heerumik afema hasissaaxxeeta? Atita hafe gatabaa qico'ni yookaan mitti manjinna gatabaa qico'ni mufattettexxi no'o'o balleessa gophphattotaa? 15 Duuchchi Woddike Gootta Isira'eelike Magenoo ati qullichchaken, no'onna telchixxe barra'n gennennexxi hedhoti he'nennen; kunse ati edo no'oxxe cubbonninni shinqe'enen; no'oxxe balleesana'n kexxeexxa kinni ati edo uurra dande'ak ayyinna hedheba'a» hiyye.