1 Ookkoneechchi uduma moyanji Daariyoosi Baabiloonike miyuwwike mini giddo massemeemmake maxaafuwwi giddo uudemashsha ajaja uwwe. 2 Yaane kinni Meedoonike awuraajji giddo Ahimta hiyyemaake qachcha'n mitte mirqisanj maxaafi afeme; isi giddo hiyyemne borreessemeemma qici;

Qallitee;

3 Moyanji Qiiroosi moyeexxe siretixxe wogga'n Iyyerusaalemi hedheeke Mageniinke galmixxee uwweek ajaji konneechchinni butti'a hedheeken: Tolchi shiqaaxxe bakka kadaashsha galmi qammalcheme ijaaremowwaal; booso isixxinna ke'isendowwaal; ejjuma isixxi jaane tomme ciqile, godobi isikinna jaane tomme ciqile kadowwaal. 4 Sase dala, lumollamma kinokenninna gubbo haqqeke mitte dalinni ijaaremowwaal; hasisaake maallaqi duuchchinna mootummatike mi'ike mininaa'n uwwemowwaal. 5 Iittanni Naabukedenetsoori Iyyerusaalemike galmi giddii'n aadheexxi Baabilooni iyyemareemmak Mageniinke minik worqetikinna birretike sibiljik miyuwwi Iyyerusaalemi edi wodda hedhamaaxxe bakka'n galmi giddi'a illee iima hiissinowwaal; Mageniinke mini giddonna massemowwaal. 6 Ta'anna Eefiraaxisi wido bogiinke galchallo kadde'ettek Tentinayi, Seteribuzinayinna ha'no ookkone awuraaji giddo hexxineek insa'neexxi gamo duuchchi ookkoo'ni bayyatte. 7 Ookko Mageniinke galmixxe huje'n giddo makendinoqqe'e; konnee Mageniinka mine Yihudake bogik galchallinna Ayihudiink akeekisanjuwwi edixxe isixxe bakka'n hiissine ijaarrowwaal. 8 Ittanni kinni Ayihudiinki akeekisanjuwwi konnee Mageniinka mine ijaarraa wodda insa'nee gargaartino'a ha'no'o ajajeennen; tinninna huje uurritabaashsha hasisaaka maallaqa duuchcha Eefiraaxisi widii'n afemaake mootummatike minixxe iribotike maallaqanaa'n uwwemowwaal. 9 Iimike Mageni'a ciincatike tolcha kadaashsha hasisaachchi duuchchi: jiboota, gedhebiinxa korbeeyyenna gedhebiinka buruusuwwa insa'ne'a uwwe; ittanni dinne, maxine, woyinetixxa bookanna zayite Iyyerusaalemi hexxeexxi qeese laqqaaxxe qixxe'n hoyyemabelo barra barra'ninni insa'ne'a uwwemowwaal. 10 Tinni kadiyyo hasisseechchi iimika Mageno gammachiisaaka tolcha shiqinsho'anna moyanjokeenna isixxe labbaxxe ooseke fayya'a soodanto'aten. 11 Ittanni kinni konnee ajaja jijjiiraak fedheeki manji hedheexxe kaddoole isike minik utuphi gonshemeena'a ookkone utupha'n fannisemaashsha, isixxe balleesaxxeenna mini isiki diigemeexxi kora hunemaaxxe bakka kadaashsha ajaje'ennen. 12 Konnee ajaja jijjiiro'a Iyyerusaalemi hedheeka galma diigo'a hobbi hiyyaaka hoone moyanjo yookaani arda, summi ifik ookko hedheeshsha assemmak Mageni iso'o balleesso'o. Ani Daariyoosi kunni ajaji wo'ma qicinni muxxemaashsha ajaje'ennen.

13 Ookkoneechchi uduma moyanji Daariyoosi ajajemmashaani Eefiraaxisi wido bogiinke galchallo kade'emmak Tentinayi, Seterbuzinayinna insa'neexxe gamok manni huje si'ik muxxendaashsha assine. 14 Tennexxee Ayihudiinki akeekisanjuwwi wabeekichcho Haagekenna Odoke belto wabeeka Zekkariyasike wabeekummatike haaso'inni jabaanteexxi huje me'inse; galmiinka ijaarsanna Isira'eelike Mageniinke ajajishshanna ittanni Faarsika moyanjuwwa Qiiroosi, Daariyoosinna Arixxekisiisi uunemmake ajajishshanni ijaarre birre.✝ 15 Galmiinki ijaarsinna moyanji Daariyoosi moyeexxe jiyaxxe wogga'n Adaari hiyyemaake agenjixxe sakkaxxe barra'ni muuxeme. 16 Ookkoneechchi uduma Isira'eeliki ardi, qeese, Leewwitotikinna booji'eme higeemmaki manni Mageniinke minnixxe eebbaka ayyaana gammadik ulfeessine.

17 Konne Mageniinke minxe eebake ayyaani'anna dhibba jiboota, lame dhibba gedhebiinxa korbeeyye, shoole dhibba gedhebiinka buruusa uune; Isira'eeli duuchchiingixxe cubboke tolchi'a kaddaaxxa tommenna lame re'etixxa korbeeyye, mitte mitte, Isra'elixxe gosake minixxe qixxe'n shiqinshe. 18 Muuseke maxaafa'ni borreessendemmashshanni Iyyerusaalemi hedheeke Mageniinke minxe ergatensha'a qeese insa'neeke qooddi qooddishshanni, Leewitotikinna ergatematike qorbi qorbinni qoonde.

19 Booji'eme higeemaki manni taakesoke agenjiinxe tommenna shoolgaxxe barra'n sa'atika ayyaana ulfeesse.✝ 20 Qeesetinna Leewwito ifi ca'a asse'ne; seeriinxe aadashsha duuchchingi ca'a hiyye'emmani. Leewwitotikinna sa'atike ayyaanika buruusa booji'eme higeemmake manni duuuchchi'a, ifika dayyuwwa qeestinna umo ifikee dulde. 21 Tennexxee booji'eme higeemmaki Isira'elik manni, Duuchchi Woddika Gootta Isira'eelika Mageno magenooffato'a mageno ege'nebaake olla'inke mannixxe battoomanaa'n ifi gargar hiisseexxi welti inde 22 Duuchchi Woddiki Gootti insa'ne gammandaashsha assemmaxxe kebbotika ayyaana torbaane barra gammadik ulfeessine tinninna Mageni Asoorike moyanjika godoba shaqqisheexxi, Duuchchi Woddika Gootta Isira'eelike Magenika mine ijaarraasha asseemmaxxeeteni.