1 Daawwiti Isira'eelixxi akeekisano duuchcha Iyyerusaalemi'i bukki hitaashsha ajaje; tennexxee mini miniki sooreessuwwi mootummatixxa huje hujammak ajajalluwwi kuma manjo ajajammaar, dhibba manjo ajajammara, moyanjiinkanna oose isixxika horantemmachcho lalo, gedhebo duuchcha towatammara, ittanni mootummatike minika ja'laabuwwa, goottuwwa loliinka manna duuchcha ye'e.

2 Okko'ni moyanji Daawwit uurreexxi insa'ne'e hiyyee qic: «Anke dayyuwwa koo anke arda; ballo ani hiyyaannexxa laqqe. Duuchchi Woddike Goottik kakotiki taabooti hedhaa boonchonna no'oki Mageniinxe lekkaka hadhisanjo ijaaratee hede herregeennan. 3 Mageni kinn ane'e hiyyee qic, ‹Loliink manjo kaddettaxxeenna munde dundeettaxxee, ati summa ankenni mine ijaartabexxon› hiyye.

4 «Yaane kinn Isira'eelik Duuchchi Woddik Gootti Mageni Isira'eli'ni duuchchi woddi'a mowaashsha mini hado anke'n duuchchanaa'ni ane'e fi'leen; akeekisanjo kadaashsha Yihudana fi'le; Yihudake mininaa'n anka mini hado file; anikanninne oose giddi'ni kinn Isira'eeli duuchcha ani moyeeke kadona'a eeye. 5 Duuchchi Woddik Gootti heddo oose ani'a uwween; labbaxxe oose anxe duuchchanaa'ni Duuchchi Woddike Goottixxe moote'ni ofo'le Isira'eeli duuchcha'ni mowaashsha kinn belto anka Solomoon'i fi'leen. 6 Hiyyee qic: ‹Isi belto anke kadaashsha aninna anna isike kaddannoshsha fileennaxxee mine ankanna baxxe anxa giissaak atike belto Solomooniten. 7 Isi ta'a assammashsha duuchcha ajaja ankanna seeruwwa anke'n itti jabaate muuxoole, mootumma isixxa duuchchi woddi'a ti'ni hite hexxaashshsa assannon.›✝

8 «Yoona ta'anna konne eloka boga dhaaldino'anna oosuwwa ha'nooxxe'e dhaalchisinaashsha, Duuchchi Woddike Goottika ajaja duuchcha xexxe'achchoti ulfesitinaashsha Isira'eelike ardi edo duuchcha, Magenike ya'i edonna Mageni laqaa'nani ha'noo ajajaannen.

9 «Atinna anke belto Solomoon; Mageni qalbe duuchcha memmekise afammaxxeenna yaada duuchcha ege'neemmaxxee, atike annika Mageno ege'ni; mitte godobinnina eloke yaadinn isi'a ergatemi. Iso'o hassottole ati'a afemaan; waaldottole kinn Isinna ate'e duuchchi woddi'a waalan. 10 Galma ijaartota'a Duuchchi Woddik Gootti atee fi'leexxa ta'anna qaabbat; jabaatte huji.»

11 Okkoo'ni Daawwit galmika buttixxi fawo, kinjii mine, miselcho masse'naaka mine, qeerraaka kinjinka minenna giddaxxa kuta ittanni cubbotixxa gattowwaal alfinaaka booncho leelishaaka kaarta Solomoon'a uwwe. 12 Heggeni woyyichchi Hafuur qalbe isixxe'n uggemmak Duuchchi Woddike Goottike galmixxa baxxe, qarqarke'n hexxeexxa kuta duuchcha, Mageniinke galmike misengeechcho masse'naaka minenna hegeri'a leelishaaka kaarta duuchcha iso'ni uwwe; 13 Ittanni qeesoletikanna leewwitotika hujetika qoobbo, Duuchchi Woddike Goottike mini giddo ergatemme hunjaaxxa hujenna ergatenshatee la'ote insa'ne'a kadaaka miyuwwi duuchchi'a akeette uwwe. 14 Gargarte hexxeexe ergatensha'a kaddaaxxa worqetika miya duuchcha miketi, gargar gargar hexxexxe yaane'a hosaaka birretika sibiljo duuchchixxa mike uwweexxi ege'nishe. 15 Mitti mittinxi torbaniinxi dhanko uutammaxxe la'oshshann worqetixxa dhankonna cunnuchchuwwakeenna kadaaka mitte mittengee worqe miketi, birre sibilji'a kaddaaxxa dhankotanna cunnuchchuwwa birreti sibiljo mike uwwe. 16 Mitti mittinge qullite kebbo uggatee elaaka worqeti beera, wele beeruwwa giissinaaka sibiljo birre mikeexxi uwwe. 17 Ittanni hubbuqanjo qore'a, manqorqorakee, hasisaaka ca'itte worqe; mitti mittinge sibiljo birrexxe qore'a hasisaaka sibiljo birre mike uwwe. 18 Hixaana guphphinaaba tolcha kadaaka ca'itte worqexxi jifo ittanni keeluwwa farri assine Duuchchi Woddike Goottika kakotika taaboota buqqaaxxa worqeti hujendeexxe kurubeele gaaruwwa fakke leelishaaka kaarta iso'ni uwwe.

19 Daawwitinna, «Tinni duuchcha ane'ni hedheeke Duuchchi Woddike Goottik Hafuur leellishanna duuchchiinxa yaane hitta hujannoxxa borreessenne; hujetixxa karranna ege'nonaa ani'a qalbefachcho uwwe» hiyye.

20 Higgeenni Daawwit belto ifika Solomooni'i hiyyee qic, «Yoona ke'i jabaati, hujetanna safi. Sodaattoxxe, godoba gurtoxxe: Duuchchi Woddik Gootti anki Mageni atinini hedheen: isinna galmi ijaareme muuxemaaxxee ate'e waalabaan; hunabaan. 21 Magenike galmixxe huje duuchchi'a hasissaaxxa qeesolenna leewwito dhaanbennen. Gargarti hexxeexxa ogetixxe hujexxa ege'na afeeki hujalluwwi manni duuchchi ifixxe eeyanni ate'e gargartaan. Ja'laabuwwinna ardi duuchchi ati'a ajajemaan» hiyye.