1 Daawwitinna ifike summinni ye'emeeke qachchiba ifi'a mine ijaadhdhe: Mageniinka kakotika taaboota ofo'lishaaka booncho qophphesseexxi duunkaana ote. 2 Ookkoneechchi uduma Daawwit, «Mageniinka kakotika taaboota dunkaashshanna duuchchi woddi'a isi edo ergatemaashsha Duuchchi Woddik Gootti fileeke leewwito malee, weli ayyinna Mageniinka kakotika taaboota dukoqqe'e» hiyye ajaje.✝

3 Daawwiti Duuchchi Woddike Goottika kakotika taaboota qophpheesemmake boonchibaa idangaashsha Isira'eelika arda duuchcha Iyyerusaalemi'i bukki asse. 4 Aaroonixxa sannuwwanna leewwito duuchcha mitteba bukki asse:

5 Qe'atixxe sannuwanaa'n,

akeekisanjo Uuri'eelinna ifixxe sannuwwana'n mitte dhibbanna lame tomme manna;

6 Meeraarixxe sannuwanaa'n,

akeekisanjo Asanayaninna ifixxe aanteka lame dhibba manna;

7 Gershoonixxe sannuwwanaa'n,

akeekisanjo Iyyu'eelininna ifixxe aanteka mitte dhibbanna sase tomme manna;

8 Elitsafaanixxe sannuwwanaa'ni,

akeekisanjo Shemaniyena ifixxe aanteka lame dhibba manna;

9 Kebiroonixxe sannuwwanaa'n,

akeekisanjo Eeli'eel ifixxe aanteka saddeeta tomme manni'aa tukkeeseme dage;

10 Uurixxe sannuwwanaa'n

akeekisanjo Aminaddaabineninna ifixxe aanteka mitte dhibbanna tommenna lame manna.

11 Ookkoneechchi uduma Daawwit qeese Saadooqinna Abiyataarii'i iittanni Uuri'eelii'i, Asayanii'i, Iyyu'eelinii'i, Shemayanii'i, Eli'eeliniinna Aminaddaabii'i madadiing mitteba jaane Leewwito dunkaane giddi'a a'yishe. 12 Hiyye qici, «Yoona ha'no leewwitotike mini hadike akeekisanuwwa kaddineemmaxxee, ha'noonna dayyuwwi ha'nooka Leewwito ifi qulloonsa; Okko'ninna Isira'eelike Duuchchi Woddike Gootike Magenika kakotika taaboota qophpheessemeeke boonchiba'a aaxxine dagge. 13 Duuchchi Woddike Gootti no'oke Magenixxi mufe no'o'ni ha'iteek ha'no leewwito edisine idaga gophphinemmaxxeete, No'otenna kandonnole asse hitine ajajinemmashshann maata assinanno hine iso'o qodhdhinebo'non» hiyye. 14 Tennexxee qeesoletinna leewwito Isira'eelike Duuchchi Woddike Gootti Magenika kakotika taaboota idagate'e ifi qullonsine. 15 Muuse Duuchchi Woddike Goottike hiyyichcho'ni ajajemmashshann leewwito Isika kakotika taaboota fanno giise'ne dulke'ne.✝

16 Daawwit meellatike miyin, masinqot, kiraarik, suusu'leti qoqqobemme gammadinka sirba sirbitaaxxa faarsaleeyye dayyuwwi insa'neki giddi'ni fi'lina'ni leewwitotike akeekisanjuwwa'n haasone.

17 Tennexxee leewwito Iyyu'eelika belto Hemaane fi'len: dayyuwwa insa'neke giddii'ni Berraakiyaka belto Aasafii'i, insa'neke dayyuwwinaa'ni Meeraarixxe sannenaa'ni Qisanika belto Eetani'i fi'line; 18 Insa'nenni welti dayyuwwi insa'nek aante aaniteti fileme; insa'nena Zakariyaasi, Yaa'izi'eeli, Semiramoot, Yihi'eeli, Uniine, Elyaabi, Bennayaasi, Me'iseyaan, Metitiya, Elifeelehu, Miqineya, higgeen hula heqqammar Oobedi'edoominna Yi'i'elitemmara.

19 Faarsaleeyye, Hemaani, Asafinna Eetaam bilbila sagetotike siblijika gikki assine laqinsaashsha filemme. 20 Zakkariyasi, Azi'eli, Semaramot, Yihi'eeli, Uuni, Eli'aabi, Me'iseyana, Bennayaasi, kinni Alamotike meelin masinqo ganaamman. 21 Iittanni Metiitiya, Elifeelehu, Miqiniya, Oobedi'edoomi, Yi'i'eeli, Azaziya, Beshiminiti, hinaake meellin kiraara gannaamman. 22 Faarsaaleeyyetik sooreessi leewwitotiinke akeeikisanjo Kenaniyateman: tenne sooreessumanna adhdheek faarotixxa uwwa afeemmaxxeeten.

23 Beraakiya, Eliqaanna Tsoodi'eedoominna Yuhiiya kakotike taabootixxe hula heqqinaamman; 24 Qeese Sebeniya, Iyyosaafixi, Natina'el, Amasayi, Zakaaryaasi, Bennayasina Eli'eezer Magenike kakotike taabooti edo malagata ufuufaamman. Oobedi'edoominna Yihiya kinni kakotike taabootixxa hula heqqinaamman.

25 Tennexxee Daawwit Isira'eelixxi geedhenna kuma manna akeekammak ajajalluwwi Duuchchi Woddike Goottika kakotika taaboota Oobedi'edoomike minenaa'n gammadik idango'a me'ine. 26 Mageniinka kakotika taabota dulkexeexxi leewwito Duuchchi Woddiki Gootti insa'nee gargaremmaxxe'e torbaane middonna torbaane korbeeyye tolchine. 27 Kakotika taaboota dukkeexxi leewwito duuchcha, faarsaaleeyyenna faarsaaleeyyetixxi sooreeyye Kenaaniya'n oddo'witemmaxxe bifashsha fuuta suunqe giissineexxa seemma Daawwitinna oddo'weemman; ittanni fuutta suunqe giissineexxa Efuudite hanashonna oddo'weemman. 28 Konne qicinn Isira'eelike boga duuchcha'n hedheek ardi qeexala'n malagatanna suusu'le ufuufa'ni bilbila qillinsa'n masinqotanna kiraara ganna'ni Duuchchi Woddike Goottika kakotika taaboota aa'ne dange.

29 Duuchchi Woddike Goottik kakotik taabooti Daawwitike qachchiba'a e'ya wodda Sa'oolixxi belto Melkooli masikobete'n hexxe uudde; moyanji Daawwiti gammadik sirba'naa uuddeexxi qalbeti iso'o tuffatte.