1 Daawwit cime hunna gopha'ni dage wodda, belto ifika Solomooni'i Isira'eeli'ni mootonse.✝

2 Ittanni Isira'eelika akeekisanjuwwa, qeesoletanna Leewwito duuchcha mitteba bukki asse. 3 Sase tomme wogganna okkoneechchi iima hexxeexxi labbaxxi oose duuchcha laakko'ende; madadiing sase tommenna saddeeta kumamman. 4 Daawwitinna hiyyee qic, «Konneer giddii'ni lame tommenna shooli kumi Duuchchi Woddike Goottike minixxa huje towantowwaal; jaani kumi kinn ja'laabuwwakenna hayyoolete kanduni; 5 Shool kumi dalla'a heqqowwaal; shool kumi kinn tennexxeenni hiyye qophpheessennake meellatike miyinni Duuchchi Woddika Gootta saandowwaal» hiyye.

6 Daawwitinna Leewwixxe ooseeshsha sase kuta'n Gershooni'i, Qe'atinna, Meeraari'n dhaabe.

7 Gershoonito

La'idaninna Seme'i.

8 La'idanik angaf belt

Yihi'eeli; Zeetaminna Iyyu'eeli, hinaaxxa sase labbaxxa oose afeemman.

9 Seemeni oose:

Selomit, Hazi'elinna Haran; mitteba sase labbaxxe oosemman.

Kunniiri La'idanike mini hadik sooreessuwwan.

10 Seme'ixxi oose

Yahaati, Ziiza, Ye'ushi, Beeriya,

kunni shooli Seme'ixxe labbaxxe oosen.

11 Siretik Yahaati, langak Ziizateman;

Ye'ushinna Beeriya kinni heddo labbaxxa oose i'linemmabaan;

tennexxee laakkossake'n insa'ne hujetixxe sultonni

mitte mini hadishsha fakkaanteeten.

12 Qe'aata;

Inberime, Yisi'are, Kebiroone

Uzi'eeli'i, mitteba shoole labbaxxa oose afeen.

13 Inberemixxi labbaxxi oose,

Aarooni, Muuse.

Aarooni qullesemo'a foyeme; isinna sanne isixxi duuchchi woddi'a woyyo kadeechcho qullonsinaashsha Duuchchi Woddike Gootti edo tolcha shiqinssaashsha, Isi edo ergatemmaashshanna isike summinni duuchchi woddi'a eebisemmaashsha foyemme.✝ 14 Mageni manjiki Muusexxi labbaxxi oosenna Leewwitotixxe gosake mini hado kadde laakko'ende.

15 Muusexxi labbaxxi oose, Gershoomi, Eli'eezer.

16 Gershoomixxi sannuwwa;

angaf Suba'eel.

17 Eli'eezer sannuwwa;

siretik Ri'abiyatemman. Eli'eezer wele labbaxxa oose afemmabaan; Ri'abiyaxxi labbaxxi oose kinn hara yo'oxxemman.

18 Yisi'arixxi labbaxxi oose;

siretik Seloomiti.

19 Kebiroonexxi labbaxxi oose;

siretik Yiriya, itti aanak Amareya, sakkaki Yahazi'eeli, sholgak Yiqami'amitemman.

20 Uzii'elixxi labbaxxi oose;

siretik Miika, itti aanak Yushiyateramman.

21 Meeraarixxi labbaxxi oose;

Mahili, Muushi.

Mooholixxi labbaxxi oose;

Ali'aazaarinna Qiisiteramman.

22 Ali'aazaar labbaka belto i'lebaang reye;

oose isixxinna meyyaxxe callamman;

insa'neena annike dayyo Qiisixxi labbaxxi oose aaxxe.

23 Muushixxi labbaxxi oose;

Mahili, Eedere, Yiremoti mitteba saseken.

24 Yoona kunni aante aantetinna mini minik kulema'neer Leewwixxe sannuwwa kandaa wodda; mitti mitting ifi ifike summinn borreessemeen. Lame tomme wogga geyeek yookaan ookkoneechchi iima hedheek mitti mitting Leewwixxi sanne Duuchchi Woddike Goottike galmi giddo ergateemaamman. 25 Daawwiti, «Isira'eeli Duuchchi Woddik Gootti Mageni arda isikee nage'a uwween; Iyyerusaalemi'i duuchchi wodda hedho'a dage'en; 26 Leewwito ta'in udumi'a duunkaana yookaan mageneefachchotixxe aada'a ergatemaaka miyuwwa duuchcha insa'ne duka hasisabaan» hiyye.✝

27 Daawwit muuxamake'n uwweexxe aadashshann lame wogganna okkoneechchi iima hexxeexxi Leewwito duuchcha lakko'ende.

28 Leewwitotixxi huje Duuchchi Woddike Goottike galmi diddo Aaroonixxe sanne'a ergatemat qarqara, galmiinka dalla'axxa baxxenna kutuwwa xexxe'achcho assa; qullo'eeka miyuwwa duuchcha ca'assatenna Mageniinke mine'ni hexxeexxa wele hujuwwa duuchcha hujatemman. 29 Ittanni Duuchchi Woddike Gootti'a uwwatee kadde beerake'n shiqqaaxxa kebbonna umiinxe midhaxxe uwwaxxa bulle, gamami belo; ra'isina'nexxa kebbo ra'isina'neek, qushshina'neek, ra'isina'neekanna saffarraakanna kado minkaaka duuchcha maganne a'line towanta'nekir insa'neteeran. 30 Barra barra'ninn gorsanna hashsha Duuchchi Woddika Gootta galateeffatateenna sirbatee edo inbaamman; 31 Ittanni sanbatange'ni, agenjoke'n fulche'na'neeke ayyaana'ninna seera fulchineeke ayyaanuwwa duuchcha'n muunxaamman; insa'ne'a murre uunemmak laakkossishshann uwwendeexxe aadashann duuchchi wodda Duuchchi Woddike Gootti'a ergatemmaamman.

32 Tennexxee Leewwito afenshatike duunkaani'aanna eettene woyyitte baka'aa iittanni dayyuwwa insa'nexxe Aaroonixxe sannuwwa hunda he'nee Duuchchi Woddike Goottike galmi'a anfeexxa annomixxa sooreessumma muunxaamman.✝