1 Konneechchi uduma Filisixeemik manni Isira'el'i lola sanfe; Isira'eeliki ardinna edi'ni ke'e baaje; insa'ne giddi'ni heddi Gilibo'axxe kooba'n reye. 2 Filisixeemik manninna Sa'ooliinna oose isixxa shorrine; Sa'oolixxa oose Yoonataani'i, Aminadaabinna Melikishu'a shinne; 3 Sa'ool lolakee duuloke'e fuleba bagedi eebbe; gabeti lolammak manninna iso'o gane madeesse.

4 Sa'oolinna lola ajajammaka, «Kunni shoggoruwwi ane'e geebe geeraraabaashsha wolanticho aaxe ane'e shiyi» hiyye.

Lola ajajamaki kinn yo'osha sodaatemmaxxee assebaan; tennexxee Sa'ooli ifinge wolaantichchi hana ibe reye. 5 Lola ajajamakinna Sa'oolixxa reyo uudexxi; isinna wolaantichchi hana ibe reye. 6 Tennexxee Sa'oolinna sasiinxi labbaxxi oose isixxi rerte: mini hadi isik duuchchi reye mude.

7 Wolo'o giddo hedhemmak Isira'eelik manni duuchchi sannachchi baajexxa, Sa'oolinna oose isixxi rerteexxa calla uundexxi qachcha waalle baqante; Filisixeemik manninna dageexxi qachchuwwa abixxe.

8 Soodimaroke'n Filisixeemik manni rensha dulo'a daga wodda Sa'oolinna oose isixxi Gilibo'axxe kooba'n inbe'naa anfe. 9 Sa'ooli dulle, umokanna kunte, loliinka miya aa'neechchi uduma, mageniwwa insa'nekeena ardake'e tenne odo kullaashsha Filisixeemike boga duuchcha'n erganjuwwa insa'neka erga'ni. 10 Okko'ni Sa'oolinaa'ni adhdhineeka loliinka miya fakkuwwa mageneefantammake insa'neke magenuwwike mini giddo uggine; umokanna Daagoni hinaake magenuwike galmi giddo fanninse.

11 Yaabeeshi Gele'adi giddo hedhammak ardi duuchchi Filisixeemito Sa'ooli'ni fuggo asseexxa uundexxe yanna'ni, 12 Jajjabi manni mareexxi Sa'oolikanna oose isixxika rensha Iyyabusi'a aa'ne dangeexxi Yaabuushi'i hedheeke lumoke qilxi hunda rensha insa'neka moonge. Okkoona torbaane barra agabo goddo honse.

13 Sa'ooli ekedha haaseessammaka manna qodhdhati Duuchchi Woddik Gootta ajajema gopheemmaxxe'e Duuchchi Woddike Gootti Sa'ool'i reyaashsha asse. 14 Isi Duuchchi Woddika Goottanna qo'la gopheemmaxxee, Duuchchi Woddik Gootti iso'o shiye. Moottumattanna Isseyike belto Daawwiti'a sa'isse uwwe.✝