1 Okkoneechcchi uduma Amoonitotik moyanji Na'oosi reye; belti isikinna bakka isixxe'n mowe. 2 Daawwitinna, «Anni isik ani'a eloxxa asseemmashshann ege'li aninna Na'oosike belto Hanooni'a eloxxa yaane asso» hiyye hede. Tennexxee Daawwiti anniinxe reyoxxee yaaddo iso'o jajjabeessate'e Hanoonibaa erganjuwwa erge.

Daawwitk manninna yaaddo ege'nishatee Hanooni hedha'ne boonchibaa Amoonitotike bogibaa dangee wodda, 3 Amoonitotixxi hayyoole; Hanooni'ni, «Daawwiti yaaddo ege'nishatee manna atiba'a ergadheechi anna atika ulfeesete ate'n labbe'e? Manni atiba'a dageechchi boga dooyye abixxatetebaa?» hine. 4 Tennexxee Hanoon Daawwitika manna abixxeexxi areeda haade; seema insa'nexxanna dollik butti'a hexxeexxa seemma daddare daddareexxi shorre.

5 Insa'nenna hadi'a higate'e shoonke; Daawwiti kaddeexxa yaane duuchcha laqeexxi erganjuwwa erge. Moyanjikinna, «Areedi ha'nook nophphaa qico'n Iyyaarkonni turtine okkoneechchi uduma higgine dagginaan» hiyye.

6 Amoonito angadinn Daawwiti naapha assineexxa ifi'ann hende uundeexxi, Hanoonenna Amoonawwito Mesiphexomiya'a, Aramime'akana'anna Suuba'a gaaruwatanna fadhado qolchisaake jaane tomme kuma kiilo kadaaka sibljo birre ergine; 7 Ookko'n sase tommenna lame kuma gaaruwatanna fadhado qolchisakara ittanni Me'akanike moyanji'anna isika loliinka manni'a maallaqa uuneexxi heqqinse; insa'nenna dangeexxi Medaba hinaaba bukkine wodda, Amoonito kinn ifi ifike qachchuwinaa'n bukki hineexxi lolakee fulle.

8 Daawwit tenne laqeexxi Iyyo'aabinenna madada loliinka sannachcha erge. 9 Amoonitotinna daggeexxi qachchinbaa e'yinamamxxe hula'ni lolake'e dalle; gargaarsakee dageeki moyanjuwwi qofinn diidake'n hedhemman.

10 Iyyo'aabinna edi udumii'n loli hedheexxanna buqemaaxxa uudeexxi; Isira'eeli giddo adhe ege'nemeeka jajjaba manna fi'leexxi Soorito lollaasha ka'lishe. 11 Gateek manninna isika dayya Abisa hunda hedheexxi Amoonito lollaashsha ka'lishe. 12 Iyo'abinna hiyyee qic, «Soorito itti ane'n jabaatole ati ane'e gargaartatton; Amoonito ate'ni itti jabaatoole kinn ani ate'e gargaarannon. 13 Yoona jabaatte no'oke ardixxenna no'oke Magenike qachixxe jabante lollo; Magenikinna eeyyeexxa assowwal» hiyye.

14 Ookko'ni Iyyo'aabinna isinni welti hedhemmak loliink manni Soorito lolatee edi'a fiinga'n me'ine; Soorawitonna insa'ne edii'n baanje. 15 Amoonito Soorito baajjeexxa affeexxi insa'nenna dayyo Abisaani edi'ni baanjeexxi qachchi giddi'a e'yine; tennexxee Iyyo'aabi Iyyerusaalemi'a hige.

16 Soorito Isira'eeli injifateexxa calla affeexxi erganjuwwa ergine Efiraxisike galaani wido hexxeexxa Soorawito daggaashsha erginse; konneeranna akeeka'ner Hadaadi'ezerike sannachchik ajajalollo Shoofakiten.

17 Daawwiti tenne laqeeshshann Isira'eelika arda duuchcha bukki asseexxi Yordaanoosika galaana foofe; edi'a sammi hiyye me'eexxi lola welti ibaka booncho abixxe; Daawwitinn Sooritoti lola ibatee heqqaka manna dala giisse; insa'nenna isinni lola inbe. 18 Kaddomalee Isira'eeli edi'ni ke'ne baanje; Daawwitinna torbaane kuma fadhadiinxa gaaruwanna butta lolaaka shoole tomme kumma manna shiye. Iittanni Shoobaak hiyyemaaka Sooritotike begediinki ajajallinna konne lola'n reye.

19 Hadaadi'ezerixxe galcha hunda hexxeexxi hayyoole Isira'eeli'ni injifatendeexxa uundeexxi Daawwitinn nage'ik he'no'a isi'a ergatemme ke'ne.

Tennexxee Soorito tenne barranaa'n saffe Amoonito gargaratee eeti hiyye'ne.