1 Kakotika taaboota adhdhineexxi Daawwiti qophpheseeke duunkaani giddo uggine; okkoneechchi uduma bukki assineeka ciincesinaaka tolchanna mittomiinka tolcha Magenoke shiqinse. 2 Daawwiti ciincatika tolchanna mittominka tolcha tolcheechchi uduma, arda Duuchchi Woddike Goottike summinn eebise. 3 Okko'ni Isira'eel duuchchi'a labbakenna miyyakee mitte mitte gunjo, mitte mitte kebbo, kukkutemeeka maalanna kebbenseexxa zebiibe uwwe.

4 Duuchchi Woddike Goottike kakotike taaboti edo ergatemmaashshanna Isira'eelike Duuchchi Woddike Gootti Mageniba'a soodachcho galatakanna sirba sirbinaashsha leewwito giddi'ni manna file. 5 Akeekisanjikinna Asaafitemman; iso'ni itti aane Zekkariyasi fileme; ookko'ninna Yi'i'eeli, Semiramot, Yihi'eeli, Metitiya, Eli'aabi, Bennayaasi, Oobidi'edoomi, Y'i'el, filemme; insa'nenna masinqotinna, kiraarik faarsinaamman; Asaafi kinn suusu'le ufuufaashsha fileme. 6 Ittanni qeesichchi Bennayanna Yahazi'eeli duuchchin wodda Megenike kakotike taabooti edo malagata ufuunfaashsha filemme.

7 Ettene barra Daawwiti sirte'n Asaafinaanna hujetike ifike jaaluwwi'a tenne Duuchchi Woddike Goottixxa galatiinxa faaro uwwe.

8 Duuchchi Woddike Gootti'a galata shiqishshe; summa isikanna ye'we;

gosa gosake ardi'a assemmaxxa duuchcha kulle;

9 Isi'a faarse; sirbakanna isi'a shiqisse

mambe'a isika duuchchanna haaso'we

10 Woyyichcha summa isikena gammadde;

Duuchchi Woddika Gootta harsaaki duuchchi

qalbe mittenni ilillisowwaal

11 Duuchchi Woddike Goottixxa jabaxxa hunna isixxa uudde

duuchchin wodda isoo'o hasse;

12 Isi hujeexxa manbe'iinxa hujuwwa;

beessisuwwakanna uwweexxa murte qaabbatte;

13 Ha'noo garboleeyye Isira'eelixxe sanne;

ha'no filendineexxa Ya'iqoobixxe oose.

14 Isi Duuchchi Woddike Gootta Mageno no'oken

murte isixxinna boga duuchcha'niten.

15 Kako isixxa duuchchi woddi qico'n

ajajemaka hiyyichcho ifikanna kuma ilaqico'ni hedaani.

16 Abirihaami'a aagemmaxxa kako

Yisihaaqi'a afo'o sa'emaxxa.✝

17 Tenneena Ya'iqoobi'a seera uggeexxi jabeesse;

Isira'eeli'anna duuchchi woddixxa kako uggeexxi hiyye qic;

18 «Dhaaldatek geego atike kadaashsha;

kananika boga ati'a uwwannon» hiyye.✝

19 Laakkossi insa'nek shiixxedhe'naanni;

ittann heno'mine keesummumma he'nenan.

20 Mitte gosa gosake ardanaa'ni wele gosake ardiba'a;

mitte mootummanaa'ni wele mootummabaa doonsa kiyya hine.

21 Ayinna insa'ne'e miico'a eeti'i uwwebaan;

insa'nexxe'e moyanjuwwa xixe hiyye qici:

22 «Ani hariirenneka tuqqinoqqe'e;

anxe wabeeko'ni fuggoxxa assitinoqqe'e»✝

23 Butta duuchcha Duuchchi Woddike Gooti'a faarsite;

wodo isixanna barra barra'ninn odeesitee.

24 Ulfinna isika gosa gosake ardi'a haasonne

hujemmaka mambe'a arda duuchcha'ni kulle.

25 Duuchchi Woddik Gootti lumoken

galati isikinna heddoken;

magenuwwi duuchchi iima darre sodatemiyyo hasisaaken.

26 Ardi duuchchik magenuwwi fakkuwwaten;

Duuchchi Woddik Gootti kinn iimuwwa dade.

27 Isi edo ulfininna gaachchanni,

jabeeninna gammadi isi galammaba hedheen.

28 Gosa gosake arda Duuchchi Woddike Gootti'a uwwe;

ulfinanna hunna Duuchchi Woddike Gootti'a idagge.

29 Isike summi'a hasisaka ulfinna Duuchchi Woddike Gootti'a uwwe;

uwwa aaxineexxi isi'a shiqisse;

gaachchannik wo'meeke Duuchchi Woddike Goottike woyyumma'a kumbu hiyye.

30 Bogi duuchchi isi edo shekesheke hiyyowwaal;

buttatinna jabaqicin kaasendeen; le'mitabaan.

31 Iimuwwa gammadowwaal; butta ilillissowwaal

gosa gosake ardixxe oddo'n, «Duuchchi Woddik Gootti moween!» hinowwaal.

32 Abbaayyanna giddo hedheechchi duuchchi shekeshek hiyyowwaal;

diiduwwikinna giddo hedheechchi duuchchi ilillisowwaal.

33 Okkone wodda gongomiinxi haqqe Duuchchi Woddike Gootti edo gammaddaan;

gammadik faarsinaan

boga duuchcha'n murte muro'a dagaan.

34 Duuchchi Woddiki Gootti arjaken galateefatte;

jaalala isixxi duuchchin woddi'a itti jabaattee hexxaan.✝

35 «Koo anjiralo no'oke Mageno no'o wodi;

Woyyichcha atike summi'a galata shiqinsannoshsha,

Atike galatinni ulfaantannoshsha no'o bukki assi

gosa gosake ardinaa'n no'o anjir» hitine raarre.

36 Barokenaa'ni barin qico'ni,

Isira'eelik Duuchchi Woddik Gootti Mageni'a saadino kaddowwaal.

Okko'ni ardi duuchchi «Ameen» iitanni, «Duuchchi Woddik Gootti saademowwaal!» hine.

37 Daawwitinna barra barra'a mitte mittenge'e dhaabendemmashshann duuchchin wodda ergatemmashsha Asafiinna isinni welti hujammakaara okkone Duuchchi Woddike Goottike kakotike taabooti edo insa'ne'e waale. 38 Ittanni Obedi'edominna jaani tomminna saddeetiing hujetik darabuwwi duuchchi welti ergatemmaashsha ookkonni insa'ne'e waale. Edotaamik belti Oobedi'edoominna Hoosa kinjinka dalla'a heqqate'ni ke'ne.

39 Daawwiti qeesichcho Saadooqinna hujetika darabuwwa insa'neka qeesole Geba'ooni'i hedheeke seemmat giissineeke Duuchchi Woddike Goottike duunkaani edo insa'nee waale. 40 Waala isixxinna Isira'eeli'a uwwemeeke ajajishshanna Duuchchi Woddik Goottike seeriinke maxaafa'n borreessememmashshann tolchi booncho'ni ciincesatee shiqaak tolchi gorsanna hashsha yanna yanna'ninni shiqinsaashshaten. 41 Iittanni «Isixxi jaalala duuchchi woddi'aten» hina'n shiqinsaashsha Hemaaninna Edotaam iittanni filemeenna summi insa'nek borresemeek welikinna insa'nenni welti hedhemman. 42 Malagatiinkanna suusu'letika ittann galatiinxa faaro faarsinaa'na la'ofata'nek weli miyi'a sooreessuwwi Hemaaninna Edotaamitemman; Edotaamixxi oose hula heqqitaashsha okko'o insa'nee dhaanbeemman.

43 Okko'n ardikinna ke'eexxi mitti mitting ifi ifike miniba'a me'e; Daawwitinna mini hado ifika eebbiso'a ifike miniba'a hige.✝