1 Daawwitinna kuma loliinka manna akeekammarinninna dhibba manna akeekammake loliinke sooreessuwwinni welti mari'ate. 2 Ookko'ninna boga Isira'eelike'n ya'a fuleeke arda'n hiyye qic: «Yoona yaane ha'no'ni eloxxe fakkaate leellitoolenna Duuchchi Woddike Gootta no'oke Magenika eloke yaada kadoole, Isira'eelike boga duuchcha'ni hedha'neeke shiqonna kado bayyanna hedheeke no'oke dayyuwwi'a ittanni ifi ifike qachcha'ninna bobba'a'ni hexxa'neexxi Qeesolenna Leewwito daggeexxi no'on welti bukki hitaasha insa'neba'a erga'no. 3 Sa'ooli galchamma baro'ni hansabo'nogi hedhemmaka Duuchchi Woddike Gootta no'oke Magenika kakotika taaboota hiissine ifiba'a idango.» 4 Ardikinna yaada konne gammande adhdhinemmaxxee ya'a fuleeki duuchchinna kaddun assinannon hiyye.

5 Tennexxee Daawwit Mageniinka kakotika taaboota Qiriyatiyi'aarimii'n iyyedagatee Gibtseke galaana Shihori'ni safe Hamaatike gorsumi qico'n qorbeeka Isira'eelika arda duuchcha bukki asse.✝ 6 Daawwitinna Isira'eelik ardi duuchchi Kirubeli'n hana ofo'leeka summi isikinna iso'ni ye'emeeka Duuchchi Woddike Gootti Magenika kakotika taabota ookkoo'ni iyyedangaashsha Yihuda hexxeexxe Qiriyatiyi'aarimi hinammake Ba'aalike magenuwibaa me'we.✝

7 Mageniinka kakotika taaboota Aminadaabike minenaa'n haaroxxe gaare'n hana uggine aa'ne dange; fadhadiinxa gaare oofamakiir Oozanna Ahiyyotemman. 8 Daawwitinna Isira'eelik ardi duuchchi Mageni edo giitarakanna kiraara, masinqotanna suusu'le, okolekanna, wontenna magalata konneechchuwwi yaaddo belo ayyaana faarsina'n gammashot ayyaneefantaamman.

9 Kidooni midha uxxinamaba genne wodda sangoole insa'ne'e takaldemaxxe'e, Ooza kakotika taabota kipho'a anga ke'isse. 10 Ooza kakotika taabota angati kisemaxxe'e Duuchchi Woddik Gootti mufate isinna hirba okkone'n qooma abideme; tennena'n kexxeexxa eetene bakka'n Mageni edo reye.

11 Duuchchi Woddike Gootixxi mufe dedhange'n Oozani'i takke hiyyitemaxxee Daawwiti yaade; ookkone booncho telchi qico'n Oozaxxe enqeshsha hine ye'naan.

12 Ettene barra Daawwit Mageno sodaatemmaxxee, «Eega Magenika kakotika taaboota hitta aniba'a idaga dande'anno?» hiyye. 13 Tennexxee kakotika taaboota Daawwitike qachchiba'a aadhe dagati mannii'ni Gaati hedheke Abidaarake miniba'a aadhe marre. 14 Mageniink kakotik taabootinna Abidaarake mine'n mini hadinni welti sase agenjo ture; Duuchchi Woddik Goottinna Abidaarraka mini hadonna horateechcho duuchcha eebbise.✝