1 Isira'elika angafa belto, Roobelixxa oose: Roobel angafa belto kadoolenna anniinxa ma'na battosemaxxe'e, angafummatik seeri Isira'eelika belto, Yooseefixxe oose'a uwwemeen. Tennenaa'ni kexxeexxa isi ila ilatike laakkossike maxaafi giddo angafummati lakko'emebaan.

2 Yihuda ifike dayyuwwi irra jabakemman; gadoomi dageek isinaa'nite kaddolenna angafuntetik seer sa'iseme uwwemeek Yoosefi'ateman.✝

3 Isira'eelike angafa beltixx, Roobelixxi labbaxxi oose:

Heenooki, Faalusa, Atsirooninna, Kermiten.

4 Iyyu'eelixxi horte: belti isik Shemaya, belt isik Gogi, belti isik Semiya,

5 Belti isik Miika, belti isik Raayanna belt isik Bi'eeli.

6 Teligelitelifelisoori, Asoorik moyanji booji'emmak isik belti Be'era.✝

7 Insa'nek mini mini hadik gosa gosak ilatik laakkossi borreessemeemma qic konneechchinni butti'a hedheeshshaten:

gosatike mini hadik akeekisanjo kadeek Iyyu'eeli, Zakaaryaasi,

8 Iyyu'eelik belti, Shema'ik belti, Azaaziki belti Bela'itemman; kunni duuchchi hedhaamak Aro'eeri'ninna ookko'ne middi darree'ni Naabawwi qico'n iittanni Be'aalimetsooni qico'n hedheeke boga'n ofo'le.

9 Hori insa'nek Gele'adike boga'ni bira sa'emaxxee boroti darree'n Efiraaxisike galaanibaa'ni qiilla gammoojjeke kasiqico'ni hedheeka boga abixxine.

10 Saa'ooli galchamake baro'n anga ifixxenni lolleexxi injifantemmaxxe Haggaaritoti welti lolemmeexxi Gele'adike bogi giddo duuchcha he'namaka boga abixxine.

11 Gaadik gosak manninna insa'ne'n aanexxi Selikiqico'n hedheeke Baasaanike boga'n ofolle.

12 Takaaki akeekisisanji Iyyu'eeli, langak Safasini, okko'n Yaa'inayinna Sefaaxxi Baasaani'i ofolle.

13 Insa'nek firuwwinna ifi ifike mini haduwwinni konneechchin butti'a hedheekeeran:

Mika'eeli, Mesulaam, Saaba, Yoraay, Yaa'ikaninna, Zi'anna, Obediten; duuchching mitteba torbaanekemman.

14 Insa'nenna Buuzike belti, Yarohaak belti, Iyesayik belti, Mika'eeliki belti, Gele'adik belti, Idayik belti, Uurk belti, Yaahido Huurik belti, Ibihayi'eeixxe oosemman.

15 Insa'neke mini haduwwik akeekisaji Akii Gunik aka'i, Abidi'eelike beltomman.

16 Gadito Gele'adike boga'ni, Baasaani'ninna qarqarake'n hedhemmake shiixxaramma qachchuwwa'n, ittanni Saaroni giddo horiinxe bobaxxe bakka duuchcha'ninna ooko'ni edi'anna sa'neexxi ofolle.

17 Kunnir duuchchi ilatik laakkossi borreessememmake maxaafa'n borreessemeek Yihudaka moyanjo Iyyo'ataamikenna Isira'eelika moyanjo Iyyoribi'amike galchatike baro'niten.

18 Roobelik, Gaadikinna gamisi Minaaseke gosake mini shoole tomme shoole kumanna torbaane dhibbanna jaane tommi loola dande'aak manna anfeemman; insa'nenna wontenna wolaanticha abixxa, gabe darba dande'aak jabak lolik muxxe fuleemmaran. 19 Insa'nenna Haggaarito, Yixuurito, Naafesitotanna Naadabito lolle. 20 Insa'nenna loliinxa yanna bagedinbaa'n Mageniba'a raareemaxxee lolake'ni insa'ne'e gargaare; Haggaaritotinna loliba'ik jaaluwwa insa'neke duuchcha'n sa'isse insa'ne'e uwwe; iso'o addantemmaxxee soodachcho insa'nexxanna laqe. 21 Agaritotika hore onde tomme kuma gaaluwwa, lame dhibbanna onde tomme kuma gedhebonna lame kumma harre boojine; ittanni mitte dhibba kuma manjonna boojine. 22 Loli Mageniinke kademaxxee wel heddi manni shiyeme. Booji'enshatixxe yanna qico'n bogi anga insa'nexxe'n hedhemman.

23 Gamisa Minaaseke gosatik minik ardixxe horteki laakkossi yo'okemman: insa'nenna Ba'aaliherimooni; Oli'armoni'el qico'ni hedheeke Baasaanike boga'ni ofolle; tinninna Saaner Haremoni'elixxe kooba qico'nte.

24 Mini mini hadiki akeekisanjuwinna konneechchinn butti'a hedheekeeran; Efeer, Yishi'i, Eli'eel, Aziri'eeli, Eermiyaasi, Yaahidi'eeli, Iyyedi'e, kunni jannuwwi loliink mannanna ifi ifike mini mininik hadike akeekisansuwwamman.

25 Kaddomalee ifi ifike annuwiinke Mageni'a addatemebaan; Mageni bogakenaa'ninna insa'ne edii'n ardi mageneefantammaka magenuwwa shorreemaka hinge mageneefante yababuleen. 26 Tennexxee Isira'eelik Mageni Asoorika mayanjo Fohanika hafuura dammasseexxi Roobelika, Gaadikanna Minaasexxa horte gamisa booji'e adhdhaashsha asse. Kunninna Halahibaa, Heboorba, Haraana'a, Goozanake galaanik gabalaba'a insa'ne'e sa'isse; insa'nenna telchi qico'n okko'o he'neen.✝