1 Isira'eelito duuchcha Kebirooni'i hedheeke Daawwitiba daggeexxi iso'o hite qici, «No'o atinni mitte maalanna mitte munden. 2 Edi baro'n Sa'ooli moyanjo kadeemma wodda; Isira'eel'i bagedinba akeekattak atendemman. Duuchchi Woddik Gootti atik Mageni, ‹Ate'e anke Isira'elik ardik moyanjo kadde'e allalisanjokenna akeekisanjoke› kaddaton hiyye'emman» hiyye.

3 Isira'eelixxi geedhe duuchcha moyanjo Kebiroonibaa dagge; Daawwitinna Kebirooni'i Duuchchi Woddike Gootti edo insa'nenni welti kako aage. Duuchchi Woddik Goottinna Saamu'eeli darre'n haaso'emashanni insa'nenna Duuchchi Woddike Goottgik hiyyichchishsha Isira'eeli'ni moyanjo kadaashsha Daawwiti'i hariirree.

4 Moyanji Daawwitinna Isira'eelk ardi duuchchi Iyyaabusite hinaaxxa Iyyerusaalemi lolle. Okkonna hexxa'nexxi Yaabushito,✝ 5 Iyyaabusito Daawwiti'i, «Ittanna konnoo'o e'yitabexxon» hine. Daawwit kinn Tsiyoonixxa kollo abixxe. Ookkoneechchi uduma iiti bakka Daawwitik qachcha hiyyende.

6 Daawwitinna, «Iyyaabusito edisse lolaak manji sannachchiinke ajajallo kadaan» hiyye. Tennexxee Tsiruyak belti Iyyo'aabi edise dage. Isinna sannachuwwinke ajajallo kade.

7 Ookko'n Daawwiti ifika galduma kolloti giddo giissedhe. Iiti bakkanna «Daawwitike Qachcha» hiyyeme. 8 Daawwitinna Miloo'ni safeexxi gaangeesse qachchake'e dalla'a ijaare. Iyyo'aabinna gateemmabaa'n ke'isse qachcha ijaare. 9 Dada Duuchcha Ajajake Duuchchi Woddik Gootti isinni welti hedhemmaxxee Daawwiti barra barra'ninni itti jabaata'ni me'e.

10 Daawwitik jabak mannik akeekisanjuwwi konneechchinn butti'a hedheeran. Insa'nenna Duuchchi Woddik Gootti insa'ne'n haaso'e addachchiisemmashsha isixxi mootumma butta duuchcha'ni ba'lattaashsha wele Isira'eelike manninn welti kande mootumma isixxe'e jabaka gargaarsa assine. 11 Daawwitik jajjabbi mannik summinna konneechchin butti'a hedheekeeran.

Hakoomichchi Yashobi'ami bagediink jalqabuwwike akeekisanjomman; isinna bagedo ke'isseexxi sase dhibba manjo okkonni shiye.

12 Iso'ni itti aaneki sase jajjabuwwi giddi'n mitti Ahoohike gosak mini hadik Doodike belto Ali'aazaariten. 13 Isinna Filisixeemik manni lolake'e bukki hiyyemma wodda Fesedemi'i Daawwitinn welti mitteba hedhemman. Ookko'n Isira'eelito so'i wo'meeke fichchi giddi'n Filisixeemik loliink manni edii'n baaje. 14 Kaddomalee fichchinxe oddo'n booncho abixxinemmaxxee Filisixeemika manna shinne. Duuchchi Woddik Gootinna middite insa'ne'a uwwe.

15 Filisixeemik loliinke manni giddii'n mitte kuta Raafayimixxe dhooqa'n bukki hite'naa, sase tomme akeekisanjuwwa giddi'n sasi Daawwiti'i afatee Adolamike gongomi bira hedheeke kinjiba adadde mare. 16 Ookkone wodda Daawwiti ettene kolloba hedhemman. Filisixeemik sannachixxi mitte kuta Beetelihemi hexxemman. 17 Daawwitinna wode'e halseexxi, «Beetelihemike dalla'ixxe hula bira hexxeexxe balenaa'ni ha'wannoka wode'e ayyete ani'a uwwaa!» hiyye. 18 Iite wodda sasiingi gooti loliink manni Filsixeemike mannika sannachcha enqe sa'eexxi Beetelihemixxe hula bira hexxeexxe balenaa'n wode'e ikkile Daawwiti'a iyyedang. Isi kinni ha'wa gibeexxi Duuchchi Woddike Gootti edo dune. 19 Okko'ninna, «Tenne assatenaa'n Mageni ane'e gargaro; tenne hedho insa'nexxe'n mudhine me'ineexxa konne mannixxa munde ha'watishatebaa?» hiyye. Tenne idagate'e hedho insa'nexxe'ni mudhine'emmaxxe'e, Daawwiti ha'wa gibe.

Tenne'e asseeki sase hunnaameessa mannan.

20 Iyyo'aabik dayyi Abisa sasingike akeekisanjomman. Isinna lola ke'isseexxi sase dhibba manna shiye; tennenaa'n kexxeexxa sasingiishshanna gurra fule. 21 Sasi giddi'n* umo kadanna gophoole midde, lame anga lumoka ulfinna alfe; insa'neke ajajallo kade.

22 Qebisi'eli'ni dageekinna lumoxxa huje huje'ek Yodahek belti Bennayaasi jabake loliinke manjomman. Isinna lame gurra fuleeka Mo'aabika manna shiye. Mitte yanna kaade bogake'n ibbeexxa barra baletiba mareexxi neenqa shiye. 23 Higgenni ejjuma onde ciqile, kadaaka Gibtsaawichcho mitte shiye; Gibtsawichchi suqeeka fuutta miriqqinammalchishsha hedheecho abixoolena Benayaasi kinn qoonne abixxe iso'o adhe; Gibtsaawichiinxe anganaa'ni bagedo mucuqe aadhe isinge bagedinninni shiye. 24 Tinni Yodahek belti Bennayaasi leellisheexxi jannumma: Isinna ookkone sase* worbi mannishanni gurra fule.

25 Sase tomme manni irra isi jabaka ulfinna alfe: kaddomalee sasi giddi'n mitti hedhemmabaan; Daawwitinna iso'o ulfeesinammake minike ajajallo asse.

26 Hunnameeyyetinna konneechchin butti'a hedheeran;

Iyyo'aabik dayyi Asaheel,

Beetelihemi ilemeemmake Doodik belti Elihanani,

27 Haroora ileme'ek Saamiti, Felonaaxxi ileme'ek Selesi,

28 Teequhe ileme'ek Isikaki belti,

Iraasi, Anaatooti ilemeek Abi'eezeri,

29 Huusha ilemeek Seebekayi,

Ahooha ilemeek Elayi,

30 Nexoofa ilemeek Maharay,

Nexofa ileme'ek Ba'innak belti Heleedi,

31 Biiniyamike firanaa'ni Gibi'ake bogik manji

Riibayik belti Itayi, Pire'atona ileme'ek Bennayaasi,

32 Ga'ashi hexxeexxe dhooqa bira ilemeek Hurayi,

Areba ilemeek Abi'eel,

33 Baahuriima ilemeek Azimoot,

Se'aliboo ileme'ek Eliyaahiba,

34 Giizoni ilemeeke Hasheemixxa oose

Haraar ileme'eke Shaageka belto Yoonataani'i,

35 Haraar ilemeeke Saakoorika belto Ahi'aami,

Uurik belti Elifaal

36 Mikerata ileme'ek Heferi,

Filona ileme'ek Akiya

37 Qermelosi ilemeek Hatsiiro,

Eezibayik belti Ne'irayi

38 Naatanek dayyi Iyyu'eeli

Hagiirk belti Mibihar,

39 Amooni ilemeek Tseleqi,

Tsiriyak belti Iyyo'aabik loli boonchik ajajalli

Bi'eero ilemeek Neharayi,

40 Yitira ilemeek Iirasi,

Yitira ilemeek Geerebi,

41 Keexxichcho Ooriyo,

Ahilayik Heetti Zabadi

42 Roobeeli'a ilemeek Yeshizak belti Adiina,

isinna Roobeelitoteenna welti hedhemmakeeri'a

sase tomme manike akeekisanjomman.

43 Ma'ikak belti Hanani,

Mitina ilemeek Iyyosaafixi

44 Asitaaro ileme'ek Oozeya, Aro'eraxxe dhooqa'ni ilemeeke Hotaamixxi oose Shaamanna Yi'i'eeli

45 Shimeriki belti Yidi'eeli

dayyi isikinna Teeda ilemeek Yoha,

46 Mahawwa ilemeek Eli'eeli,

Elina'amixxi oose Yirebayinna Yooshawiya,

Mo'aaba ilemeek Yitima

47 Eeli'eli, Oobedinanna Mitsoba ilemeek Ya'isi'elitemmaaran.