1 Daawwiti mootummatik mine'n ti'nate ofo'lemma wodda, wabeeka Naataanii'i, «Yoona ani birbirsik ijaarreke mini giddo hedhannon: Duuchchi Woddike Goottik kakotik taabooti kinni duunkaani giddo hedha'neen» hiyye.

2 Naataaninna Daawwiti'a, «Mageni atinn welti hedhemmaxxee heddetexxa duuchcha assi» hiyye.

3 Eettene hashsha Magenik hiyyichchi Daawwitiba'a Naataanibaa dageexxi hiyye qic:

4 «Anke garbichcho Daawwiti'ni marte hitatto qic, ‹Duuchchi Woddik Gootti hiyya'ne qic: Ani hedhanoka mine hujjaattek atetebaan. 5 Isira'eel'i Gibtse'n fulchennexxe barranaa'n telchi qico'n, duunkaaninaa'ni wele duunkaanibaa, mitte galdumiinxe bakkanaa'ni weletibaa me'annoshshate malee'e mini giddo hedhabe'noni. 6 Isira'eelike ardinn welti me'ennoke booncho duuchcha'n, arda anka heqqinaashsha ajajennexxe sooreessuwwa insa'nexxeranaa'n mitte mittenga, «Abbo maye'e birbirsiinke haqichchinn mine ani'a ijaara gophphine hiyyennexxi yannaar hexxe?» ›

7 «Yoona ta'atenna kaddole garbichcho anke Daawwiti'a hite kuldatto qic, ‹Dada Duuchcha Ajajak Duuchchi Woddik Gootti hiyya'ne qici; arda anka Isira'eel'i moote galchittota'a gedhebo allaldatakenna hordofatabaa'ni aadhe ke'isennen. 8 Marteteba duuchcha atenaa'n gargar higebe'non; naapha atika duuchcha ati edi'n balleessennen: ta'anna summa atika buttate'n hedheke lumolli mannike summishshanni saandaashsha assannon. 9 Anke arda Isira'eelikee galdumi booncho uwwannon; ifika galdumi boonchonna alfinaashshanna ta'in udumi'a lele'minabaashsha insa'ne'e assannon. Konneechchi edo manni fuggoxxa assemmashsha ta'a yoona insa'ne miincabaan. 10 Konneechchi edo anke arda Isira'eeli sooreessuwwa filenne wodda miicemmashsha telcho assinabaan; naapha insa'neka duuchcha salphisannon.

« ‹Duuchchi Woddik Gootti mine ijaaranexxa ate'n farri asse'e haaso'annon: 11 Bari atik geye'naa edike atike annuwiba'a me'itatto wodda, oose atixxi giddi'n mitte mootonsannon; mootumma isixxanna jabeessannon. 12 Mine ani'a ijaara'nek isoten; aninna mootumma isixxa duuchchi woddi'a jabeessannon. 13 Aninna annake isi'a kadannon; isinna belto anke kadaan; jabaxxa anxa jaalala ati edi darre hedhemmakenaa'ni adhdhenneshsha isonaa'ni ijje aadhdhabe'non.✝ 14 Mine anke'ninna mootumma anxe'ni duuchchi woddi'a uggannon; mootummatinna duuchchi woddi'a lele'mitebaang hexxaan.› »

15 Naataaninna konne leelleeka hiyyichcho duuchcha Daawwiti'ni haaso'e.

16 Okko'ni moyanji Daawwiti aage, Duuchchi Woddike Gootti edo ofo'leexxi hiyye qic,

«Ee, Duuchchi Woddike Gootta Mageno; tenne yaane duuchcha ani'a assitota'a geyeneki ani ayyete? Anki mini hadi konne qiconna maacho? 17 Koo anke Mageno tinni ati edo woyi fulabaachcho kadeexxa egende garbichcho atikike minixxee dagaake qeerra barixxa higgenni ta'anna ane'e manni duuchchinaa'n hariiremeeke lumoochchishsha ulfateeke manjo assite uudiballo.

18 «Garbichcho atika ulfeesitetaxxee, Daawwiti konneechchi iima maa hiyyo'ate? Garbichch atikaqqa atinni egendeetten: 19 Koo Duuchchi Woddike Gootta atike garbichchixxe hitenna fedhii atixxishsha tenne jabaxxa yaane assitetten tenne jabaxxi lumollamma addatenshuwwa duuchcha itti ege'neddaashsha assi.

20 «Abbo atishsha hedheek ijje afemabaan; mansha no'oxxin lanqenneshshann Atee male'e weli Mageni hedhebaan. 21 Gibtseke boganaa'n anjire fulchitetteshshann atike arda Isira'eelishsha hedheek ayyete hedhe? Insa'ne Mageni buttate'ni hedheeke ardi duuchchi giddi'n ifi'anni anjire fi'leeke mannani: gosa gosake ardi edo lumollamma sodaachchissaaxxa yaanuwwa asseexxi mootoleeyyuwwo insa'ne edo fiissitetten. 22 Arda atika Isira'eelinna duuchchin woddi'a ifika arda assexeten; koo Duuchchi Woddike Gootta Atinna Mageno insa'neke kaddetten.

23 «Duuchchi Woddike Gootta ta'atenna kaddoole garbichcho atikixxenna mine isikixxe'e haasotettaka haaso'a duuchchi woddi'a lele'ma belo itti jabaatowwaal: haasotettaka haaso'anna muuxi: 24 Tinninna atik summi lele'ma belo itti jaabate hedhaashshanna duuchchi woddi'a lumoke kadaashshaten. Ookkoneechchi uduma mannikinna, ‹Dada Duuchcha Ajajaak Duuchchi Woddiki Gootti Isira'eelk Mageni dhugaandinn isi Isira'eelike Magenon!› hinaan; garbichchi atikik Daawwitik mini ati edo lele'ma belo itti jabaateeke kadaan.

25 «Koo anke Mageno, garbichcho atike'e mine ijaartatexxa kokeessiteeten; tennexxee garbichchi atibaa soodatate'e hunna alfeen. 26 Koo Duuchchi Woddike Gootta dhugaadinn ati Magenoken assatee konne eloka haaso'a haasotte garbichcho atikee kuldetten. 27 Ati edo duuchchi woddi'a lele'ma belo hedhaashsha atike garbichchika mine eebbissota'a fedhii atixxe kaddowwaal; Koo Duuchchi Woddike Gootta eebbissetek atete kaddettaxxee duuchchi woddi'a eebbisemowwaal.»