1 Durriisi Isira'eeli'ni ke'exxi Daawwiti Isira'eelika arda laakko'ashsha tirtirse. 2 Daawwitinna Iyyo'aabinna sannachchiinka ajajaluwwa, «Bersaabehi'ni Daaniqico'ni hedheeka Isira'eelika arda martineexxi laakko'e; ookkoo'ni me'e kadeexxa ege'nonaa ane'ni kulle» hiyye.

3 Iyyo'aabi kinn, «Duuchchi Woddik Gootti Isira'eelika sannachchuwwa ta'a hedhee qici irra dhibba anga dachcha'ik bira sa'issowwal; koo moyanjo anke goota; duuchching anke gootike garbabaa? Eega tinni itta kadoole anke goota tenne assa isi'a maye'e hasisse? Mayikete Isira'eeli'ni cubbo idaga'negeechchi?» hiyye.

4 Kaddomalee moyanjiink hiyyichchi Iyyo'abi'i injifate; tennexxee Iyyo'abi fule: Isira'eelike boga duuchcha'ni mammaremeechchi uduma Iyyerusaalemi'a hige. 5 Iyyo'aabinna lolinke mannika laakkossa Daawwiti'a shiqise; kunnirinna Isira'eelike boga duuchcha'ni mitti miloonenna mitte dhibba kuma manna; Yihuda'n kinn shoole dhibbanna torbaane tomme kuma kandaa wodda madadi insa'nek wolaantichcho abixxa dande'a'nera callamman.

6 Iyyo'aabi kinn moyanjiinka ajaja giba'emake kademaxxe Leewwitonna Biiniyamito mannik welt laakko'ebaa. 7 Kunni ajaji Mageni darre'n gibemeekemman; tennexxee Isi Isira'eeli'i gane.

8 Okko'ni Daawwit Mageno, «Tenne assati ani ate'e balleesennen; lumoxx cubbo hujeenaxxee ane'e garbichcha atikixxa cubbo gondoortota'a ate'e soodataannen!» hiyye.

9 Duuchchi Woddik Goottinna Daawwitika wabeeka kade'eka Gaadi'i hiyyee qic: 10 «Daawwiti'ni marte hitato qici, ‹Duuchchi Woddik Gootti atee hiyya'neexxi, yoona sase yaada ati'a shiqiseennen; konnenaa'n ate'n geessiseeshshanni ate'ni mitte fi'li› hiyya'nen» hite kuli.

11 Tennexxee Gaadinna Daawwitibaa mareexxi iso'o hiyyeqic: «Duuchchi Woddik Gootti iso'n hiyya'nee ‹Amo yoona mitte fi'li; 12 Sase woggak solo'i yookin sase agenjo naapha atikixxe anga'ni iba yookin sase barra Duuchchi Woddike Goottixxi wolaantichchi, bala buttate'n ibe'na Duuchchi Woddik Gootik erganj Isira'eel duuchcha balleeso'an?› ergiteettek maa hiyye hiissanoxxa calla ani'a hiissichcho uwwi» hiyye.

13 Daawwitinna Gaadi'i, «Yo'oshsha rakkatennen mararte isixxi lumoxxe kaddemaxxe'e manjiinxe anga'ni iba hasaabo'non; Duuchchi Woddike Goottixxe anga'ni ibennexxa woyyan» hiyye.

14 Tennexxee Duuchchi Woddik Gootti Isira'eeli'n bala ibise; Isira'eeli giddii'n torbaane tommi kumi manji mude. 15 Iittanni Mageni Iyyerussaalemi'i ballesinaashsha iimika erganjo erge; iimik erganjinna balleeso'a hiyyamale Duuchchi Woddik Gootti uudexxi gelta'neexxe ba'nexxee yaade; arda balleesemmaka iimika erganjonna, «Ta'a yoona gelte'een anga atixxa hoyyedhi» hiyye. Ookkone wodda iimik erganjinna Iyyaabusichcho Oriinaxxe aldumme bira uurremman.

16 Daawwitinna iimiki erganji iimatixxenna buttatixxe oddo'ni uure'na afe: iimik erganjinna Iyyerusaalemi'ni gonofakenaa'ni luqqinse fulchineeka wolaantichcha anga abixeemman; Ookko'n Daawwitinna geedhe dooniyya odo'winemmashshann albiki buttinake'n wabbi hine.

17 Daawwiti Mageno, «Lolamak manni laakko'ashsha ajajennek antebaa? Cubbo hujenneki ballesanjikinna anenden: kunni ardi mitti mitte balleesa hujekebaan; eega insa'ne maa assine? Koo Duuchchi Woddike Gootta Mageno anga atixxi ane'ninna anke annike mine'ni hexxo malee'e, bala ardake'n ibisoxxe» hiyye.

18 Ookko'ninna iimik erganji Daawwiti dageexxi Iyyaabusichcho Oriinaxxe aldume'ni mareexxi Duuchchi Woddike Gootti'a tolchimalcho hujaashsha Gaadi iso'ni haaso'o'a ajaje. 19 Daawwitinna Duuchchi Woddike Goottika ajaja Gaadi iso'ni haaso'emashann muuxo'a fule.

20 Oriina dinne uxxate'ni hedhe udumaa wirri hiyye iimika erganjo afe; isinni hedhemmak shoole labbaxxi oosenna sho'onde. 21 Oriinanna Daawwiti isiba'a shiqa'ni dageexxa uudexxi aldumme giddii'n fuleexxi ulfesate butta wabbiye anga iimi'a ke'ise.

22 Daawwitinna isoo, «Ardake'n ibbeexxi bala baxxaashsha Duuchchi Woddike Gootti'a tolchimalcho giissonna'a aldumme atixxa hi'lonna'a ane'ni gurgur; addichcha maallaqa ani ati'a uwwannon» hiyye.

23 Oriinanna Daawwitii'i, «Koo moyanjo ittanni tolanga aaxxe eetettexxa assedhi; tolchi booncho'n ciincatee qotiluwwa, giiratixxe heqqe'a uxxisanjuwwa, dinne kinn midhatixxe uwwa kaddaashshanna duuchchingeechcho ati'a uwwannon» hiyye.

24 Moyanji Daawwit kinni Oriinaa'a, «Tinni kaddabaan; hasisaachcho duuchcha ani isi'a uwwannon; atixxa karra, ani daffe elo'ebe'nochcho Duuchchi Woddike Gootti'a ciincesatike tolcha asse shiqisha hasaabe'non» hiyye.

25 Tennexxee Daawwit Oriinaxxe aldumme boonchika hira jaane dhibba worqetika kutemalchuwwa uwwe. 26 Daawwitinna okko'o Duuchchi Woddike Gootti'a tolchiinka booncho qophpheesseexxi ciincatika tolchanna mittominka tolcha shiqise. Duuchchi Woddika Goottanna ye'edhe; Duuchchi Woddik Goottinna ciincatiki tolchi shiqa'ne booncho'ni isi'a iimi'n giirati hiisse.

27 Okko'ni Duuchchi Woddik Gootti iimike erganji'a wolaanticho gonofi giddi'a hiissedhe hiyyeexxi haaso'e; erganjikinna giddi'aani hiissedhe. 28 Ookkone wodda Daawwiti, Duuchchi Woddik Gootti Iyyaabusichcho Oriinake wildumme'ni hiissichcho uwweexxa uudeexxi, ettene bakka'ninni tolcha shiqise. 29 Muuse qiilla gammoojje'ni Duuchchi Woddik Goottika galdumiika duunkaana hujemmakinna ciincatike tolchika booncho giissemmak Geba'oonixxe gooro iimamman. 30 Daawwit iimike erganjika wolaantichcho sodaatemmaxxee okko'a mareexxi Duuchchi Woddika Gootta laqedha dande'ebaan.