1 Iitti siretixxi kako magenooffachchotixxa aadanna buttatike Galma affe'eemman. 2 Lame kuta afe'eemmak duunkaani qixxeesemeemman; taakkaxxe kuta'n xassiink uggemalchi, beerikinna woyyitte kebbo hexxemman; kunni boonchinna «Woyyitte» hiyyemaan. 3 Ookkone langake seemmati goli udumi darre Woyyitte Woyyo hiyyendaaxxe kuta hexxemman. 4 Ookko giddo worqeti hixaank gubemalchinna, werqeti buqemeek kakotik taaboti hedhemman; kunni kakoti taaboti meenni ise giddo hedheexxi worqetixxi qore, kichcho fulchiteemmaxxi Aaroonixxi siqichchonna tommi ajajuwwi itti borreesemeemmak lami kinoti bidiruwwi giddo hedhemman. 5 Konne taaboti hana hedheeka cubbo biratika tuphanjo buqqaaxxi ulfinniinxi kirubeeluwwa hexxemman; yaane kinn ta'a tenne yaanuwwaxxe mitte mittende yaanexxee haaso'a dandeenabe'non.

6 Duuchchiinxi yaane konne qicinni qixxeessendeechchi uduma qeese ifixxa ergatensha muuxxo'a duuchchii wodda ookkone duunkaanixxe siretixxe kuta giddi'a e'yitaan. 7 Yaane kinni eettene giddixxe kutabaa e'yaak ookkone umo qeesichcho callammani; e'yaamakinna woggate'ni mittele calla kadaa wodda, ifike umixxe cubboxxeenna ardi dedhik hujeexxe cubboxxee shiqqaammaxxa munde abidebaak haranga e'yaammaba'a. 8 Iikki siretik duunkaani hedhee qico'n Woyyitte Woyyobaa iyyemaraak ori leellebaake kadeexxa Woyyichchi Hafuur leellishaan. 9 Tinninna ta'ake barri'a fakkeennake kadaa wodda ookko shiqqaammaxxi uwwaarinna tolchuwwi magenooffataamake ookkone mannixxa sammo haranga luqqi assa dande'eba'a. 10 Tinni yaannuwwa duuchchi iitti haaroxxi aada dagga qico'n assendaammaxxe itatixxenna ha'wiinxe, iittanni gargar gargar hedheek luqqi hiyyatixxe aaduwwa callamman.

11 Yaane kinni Kiristoosi ta'a hexxeexxe elolla yaannuwwa'a umo qeesichcho kadeexxi dagee wodda manjiinxi anga giisitebaake, ookkone tenne dadaake kadebaake duunkaani giddo e'ye. 12 E'yeekinna re'etixxanna jibootatixxa munde abideetebaan; yaane kinni duuchchi woddixxa wodo iyyedago'a ifixxa munde abixxeexxi mittele muxxamii qico'ni eettene Woyyite woyyobaa duuchchii woddi'a e'ye. 13 Gadhi darrek insa'nek bisi luqqi hiyyo'a ookkone batto'eeke mannike biso'n fixendaammaxxi re'etixxinna jibbootatixxi munde, iittanni re'etixxinna tolchakee gubendaammaxxe raadak bululi insa'nee luqqi asseechchinni 14 duuchchi woddike Hafuur darree'n ifi ci'mema beloke tolcha asseexxi Magenokee shiqisheeke Kiristoosixxi mundee hedhaaka Mageno magenoofantannoshsha no'oxxa sammo reyotibaa iyyemartaaxxe hujeenaa'n hittata caala luqqi assituta!

15 Tennexxee ye'emeemmaakiir ookkonee addachchiisa uwwendeemmaka duuchchi woddika qadaada adhdho'a Kiristoosi haaroxxe kakoke oddichchani; tinni kaddeechchi manni siretixxe kako hunda hedhemma wodda hujeemmaxxe cubbonaa'n leexxa fulo'a isi reyemmaxxeeten.

16 Karra dhaalchissaaxxi badino hexxoole, iikki badineemaki manjichchi reyeexxa kokeessa hassissaxxa ege'nedeexxen. 17 Tinni kaddaachchi badino abiddaak manjichchi reyoole callan; yaane kinni iikki badineek manjichchi lubboti hedhee qico'n iitti badino abiddaba'a. 18 Tennexxee siretixxi kako midde munde belo hujete'n hosseemmaxxebaan. 19 Muuse mitte mittenga seerinka ajaja arda duuchcha'n haaso'eechchi uduma jibootatiinxa munde woddi'ik, diimmoxxe gedhebiinxe ordaninna hissoophike shafinni welti aadheexxi ookkone seeriinke maxxafa'ninna ardake'n fifixxe. 20 Fifixxee qicinna, «Heqqexxino'a Mageni ha'noo ajajeexxi eettene kakoixxi munde tenneten» hiyyeeten. 21 Iittanni eettene duunkaane'ninna iseke magenonfachchotikenna ergatenshatike mi'uwwa duuchcha'n munde fifixe. 22 Dhugaaten, heenoxxe yaanne gadhi darre duuchchiinxi yaane mundeti luqqi hiyya hassissaaxxa Muusek seeri ajajaan; munde dunedebaaki cubbotixxi gattowwaali hexxebaan.

23 Yoona iimixxe yaannuwwake fakkeenna kadeemmachchiir duuchchi tenne aadanni luqqi hiyya hassisseexxen iimate'n hexxeexxi yaanuwwa kinni konnee caalaake tolchinni luqqi hitaan. 24 Kiristoosi ookkone dhugaatike duunkaanike fakkeenna kadeemakenna manjiinxe anganni hujemeemmake galmibaa e'yebaan; yaane kinni ta'a no'oxxee Mageni edo leellatee iima hedheeke galmibaa e'ye. 25 Ayidootiink umi qeesichchi ifixxe kaddebaaxxa munde abideexxi wogga wogga'ninni Woyyitte Woyyobaa e'yammashsha Kiristoosi heddole ifi tolcho'a iima e'yebaan. 26 Iittate kaddeele butta duuchcha dadendeexxe yannanaa'ni Kiristoos heddoe rakko adhdha hassissamman; ta'a kinni bariinke muuxama'n ifi tolchake asseexxi cubbo fuggusso'a mittele duuchchii woddi'a leelle'een. 27 Manji mittele reyo'a ookkoneechchi uduma murte adhdho'a murende'een. 28 Kiristoosi heddi mannixxa cubbo fuggusatee iittanni mittele tolchemeedheen; isinna langaxxa leellaanni; tinninna isoo heqedhaakeeri'a anjirensha iyyedagateete malee cubbo ba'edhateetebaan.