1 Muusek seeri, edi'a daggaaxxe elola yaanuwwake gaaddisa malee eettene yaanuwwake dhugaatike bisobaan. Tennexxee wogga woggande'n duuchchii wodda cita belo higge higgeenni shiqaammak iikki tolchuwwi ookkonee magenooffachchotee dagaamak manna wo'make assa haranga dande'ebaan. 2 Iikki seeri insa'nee silaan luqqi assa dandedheele tolcha shiqashsha waala gonphammata? Iittanni magenooffachchotee dagama manni mittele duuchchi wodi'a luqqi hinammaxxee sa'mo insa'nexxe'n cubbaaleessumma insa'ne'n silaat laqendammabaan. 3 Yaane kinni kunni tolchuwwi wogga wogga'ninni cubbo qalli assaamakeeran; 4 Tinninna kaddeechchi jibootiinxinna re'etixxi munde cubbo fugussa dande'a gophphammaxxeeten.

5 Tennexxee Kiristoosi butta duuchibaa dagee wodda hiyyeemma qici,

«Tolchakanna uwwa ati hassebexxo,

manjunte kinni ani'a qixxeessiteete.

6 Ciincatike tocha'ninna cubbotee shiqaake tolcha'n

gammaddebexxon.

7 Eettene yanna ‹Anxee mirqemalcho maxaafa'n borreessendemmashsha

Ee, Mageno kunse fedhii atixxa assonnaa dageennen› hiyyenne.»

8 Tinniiri assendaashsha seeri kunni ajajeexxe kaddoolenna isi kinni sirende'n «Tolchakanna uwwa, ciincatika tolchanna cubbotixxee shiqaaka tolcha hassabexxo, iso'ninna gammadebexxo» hiyyaan. 9 Lebeexxi, «Kunse ani fedhii atixxa assonnaa dageennen» hiyye; langaka tolcha ti'ni asso'a siretika tolcha hoyye. 10 Tenne fedhiinni Yessuusi Kiristoosike maal darree'n mittele duuchchii woddi'a ookkone shiqeeke tolchinni woyyoommeennen.

11 Mitti mittiniing qeesichchi barra barra'n uurreexxi ergatemaan; haranga cubbo fugussa dande'abaaka ookkonee tolchuwwa duuchchii wodda shiqishaan. 12 Kiristoosi kinni mitte tolcha duuchchii woddi'a shiqisheexxi Mageniinke midda'n offo'ledheen. 13 Eettene yannanaa'ni isik naaphiir isixxe lekkake hadhisanjo kadaa qico heqqaan. 14 Tinninna kaddeechchi ookkone mitte tolchinni ookkone woyyomaakaara duuchchii woddi'a insa'ne mitte ci'ma beloke manna asse'een.

15 Woyyichchi Hafuurinna tennee yaanexxee no'aa dhugaa kula'neen; sirete'n hiyya'nee qici,

16 «Ookkoneechchi uduma insa'ne'a aagannoxxi kako konneechchi butta hexxeen:

hiyya'nee'n Gootti:

Anka seera insa'neexxe qalbe uggannon;

insa'nexxe sammo'ninna isoo borreessannon.»

17 Higeenni,

«Cubbo insa'neexxanna xaqaro insa'neexxa

langaxxa qalli hiyyabe'no» hiyyaan.

18 Kunniir gottowwaal hiyyemmeechchi uduma ta'anni edi'a cubbotee shiqaak tolche hedheba'a.

19 Yoona anke dayyuwwa Yessuusixxe mundenni Woyyitte Woyyobaa e'yatee riffii'i anfebe'no. 20 Kunninna ookkonne golo darree'ni, kunninna maala isik darree'n no'aa banemmake haarokenna hedhaake orinniten. 21 Mageniinke mine'n baalloonsemeeka lumoka qeesichcho anfe'eennen. 22 Tennexxee fuggoxxe sammonaa'n luqqi hiyyatee no'oxxa qalbe fiffilxine'e, no'oka biso ca'ichcha wodi'inni anshe'ne'e, qajeelto qalbenninna dhugaatixxe amananni Mageniinbaa shinqo. 23 Ookkonee addachchiisatika hiyyichcho no'aa uwweek xuurameesake kademmaxxee eettenee amannennexxi haasonnaannexxa adde duune abixxino. 24 Jaalalateenna eloxxe huje'a damanqannoshsha weli weli uundo. 25 Duuchchiing welti afemma'n weli weli jajaabeesino malee'e mitti mitti manni assammashsha bukki hiyya no'oxxa waallonnoqqe'e; tenne mannii'n Goottiinke daggixxi barra shiqqa'n daggeexxa uuddina'n tennee caalla asse.

26 Dhugaatixxa ege'na alfinneennechchi uduma egenna'n cubbo hunjoonole ta'anni edi'a weli cubbotee kadaak tolchi hedhabaan. 27 Ta'a gataachchi kinni sodaachchissaaxxe murtenna Mageniinka naapha ittaaxxa sodachchisaaxxa giira heqedha callan. 28 Muuseka seera tuffateek huuni manjinna lami yookaan sasi manji iso'n dhugaa kuloole isi mararte belo shiyemaan. 29 Mageniinka Belto tuffateek, isenni woyyomeexxa eettene kakotixxa munde batte yaaneshsha laakko'eek, badhaadhiinka Hafuuranna yowweek hittata caala mura woxxa isi'a hassisaachcho ha'no'ni labba? 30 «Halo fula anxen, ani bado hiissannon» hiyyeeka isoo egeneennen; iittanni «Gootti ifike arda'n muraan» hiyyaan. 31 Hedhaake Magenixxe anga'n iba hara sodaachchissaaxxen.

32 Ifi ha'no'a xabeechchi uduma rakko giddo jabaxxe cichchanni ti'ni hitine uurritinemmaka ookkonee edika baro qalli hiyye. 33 Mitte mitte yanna manjii edo yowwedine'een; shorendine'een; wele wodda kinni iitta hexxeexxi rakko insa'ne geltemmake manninni welti mitteba rakko adhdhitine'een. 34 Ha'nooke uminni ha'no caaldaaxxanna duuchchii woddi'a hexxaaxxa karra iimma affine'eeke kaddineexxe egedineemmaxxee usuremeekeeri'a marartine; ha'noxxi karranna saamendaa wodda gammashshot adhdhitine.

35 Tennexxee hira lumoka affe'eexxa ha'noxxa addata mee hunne. 36 Mageniinxa fedhii assitineexxi isika ookkonee addachchiisatika hiyyichcho adhdhitino'a osssat heqedha hassissaan. 37 Tinninna kaddaachchi heenoxxe yanna uduma

«Isi iikki dagaak dagaan;

hekkinna hiyyabaan.

38 Qullichchi kinni amanati hedhaan;

udumaa shishiqqeexxe kaddoole

Ani iso'n gammadabeno.»

39 No'o kinni ookkone amaneexxi anjiremeeke mannike manna malee'e udumi'a shishiqqeexxi ba'eemmake mannike mannabaan.