1 Tennexxee lanqenexxe yaanenaa'ni deenennexxi inbabe'noshsha eettenne lanqennexxe yaanexxee caala xexxe'ata no'oo hassissaan. 2 Tinninna kaddaachchi iimike erganji darree'n haaso'eemeek hiyyichchi dhugaatike kadeexxenninna konne hiyyichcho qaxxaamuranna konne hiyyichcho ajajema gopha hassissaaxxe mura woxxiseexxenni, 3 no'ota iitta hexxeexxa lumoxxa anjirensha gagga'mi hinoonnole hittata baanje fula dandeennannota? Tennee anjirensha sirete'n ifike uminni Gootti lallabe; isonaa'ni laqeek manninna tenneenni no'aa kokeesse. 4 Magenikinna beesisuwwik masotinna gargar gargar hedheeke mambe'uwwinni iittanni ifixxe fedhiinni uwweendeexxe Woyyichchi Hafuurixxe uwwaarinni tennee yaanuwwaniinxee dhugaa kule'een.

5 Tennee isexxee haasonna'ennexxa, daggaaxxa butta duuchcha Mageni erganna galchitaashsha assebaan. 6 Yaane kinni mitti wele bakka'n Woyyichchi maxaafi giddo:

«Ati isoo heddotaa manji maachcho?

isi'a xexxe'attota'a manjiink belti maachcho?

7 Ergannatenaa'n isoo heeno qico* shiixishshetten;

ulfinniinkanna galatiinka kallachcha iso'n uggitetten.

8 Duuchchiinxa yaane lekka isixxi hunda isi'a hirendaashsha assitette.»

Mageni duuchchiinxa yaane isi hunda hirendashsha assaa wodda, isi'a hirendaashsha assebaak gatteexxi yaane mittechchinna hedhebaan; kaddo malee ta'a duuchchiingechchi isi'a hiremee'naa uundabe'no. 9 Yaane kinni Mageniinke badhaadhinni manji duuchchixxee reyo maqo'a ergannatenaa'n heeno qico heeno'maashsha assemeemmak Yessuusi, reyotixxa rakko adhdheemmaxxee ta'a ulfinniinkinna galatiink kallachchi iso'n uggeme'naa uundaannon.

10 Duuchchiinxi yaane isinninna isi'a dadendeek Mageni, heddo oose ulfinniinbaa iyyedago'a insa'nexxe anjirenshake ke'insanjo Kiristoosii'i rakkoti geyeeke kadaashsha issoo assa hassisseemman. 11 Manjo woyyonsaakinna iikki woyyoomaammaki manni duuchchiing mitte annixxe oosen; tennexxee Yessuusi insa'nee «Dayyuwwaa» hiyyeexxi ye'atee shookabaan. 12 Tennexxee woyyichchi maxaafi giddo

«Summa atika anke dayyuwwa'n kulannoni;

Mageniinxe tuuta giddonna atika galata faaroti faarsannon» hiyyaan.

13 Iittanni,

«Ani adde anxa iso'ni uggudhannon.»

higgeenni

«Kunse, aninna Mageni ani'a uwweexxi oose!» hiyyaan.

14 Tennexxee tinni oose maalakanna munde afe'eeke manna kandeemmashshanni Yessuusinna insa'neshshanni manjok kade; tenneenna asseechchi ifixxe reyonni ookkonee reyoti hana baallooma afe'eeka dabiloosii'i balleeso'aten. 15 Iittanni insa'neke hedhoti baro duuchcha'n reyotixxe soda'axxe garbuma'ni usuremeemmakaara leexa fulcho'aten. 16 Isi dageechchi erganna qarqaro'aate kaddebaak Abirihaamixxa horte qarqaaro'aate kaddeexxa ege'nendeexxen. 17 Tennexxee duuchchiinxe yaanenni dayyuwwa ifika faakaata isi'a hassissaxxe kadde; tenneenna asseechchi mararaakenna xuurameessa umo qeesichcho kadeexxi Magenokee ergatemo'aanna ardiinxa cubbo biro'aatemman. 18 Isi ifinge uminninni hega uudemeemmaxxa yanna rakko adhdheemmaxxee hega uudemaaka duuchcha gargaara dande'aan.