1 Yoona tenneera labbaaxxa heddo dhugaa kulaara duumanchiishsha qaraqara no'oke'n hexxeechchinni no'o'ni ba'ote kaddaaxxa yaane duuchcha, sholla qicinni takaaldeexxi no'oo abidaaxxa cubbo fuggussinennexxi no'o edo hedheeka gongichcho ossunteti gongino. 2 No'oxxe amanaka ke'issallonna muuxallo kade'eek Yessuusi'n ille no'oxxa uggudhino; isi ifi edo heexxeexxe gammashshoxxee eettene fannisenshaka salphinne mayiinshanna laakko'ebaang fannotixxe rakko'ninna reyo'n ossati, Mageniinxe mootteke midda'n ofo'leen. 3 Yoona ifi gophineexxi godoba kultitinabaashsha cubbaalyetenaa'n iso'n gelteexxa tennee labbaaxxa xaa'na'ni osseeka isoo hedde.

4 Ha'noo cubboti welti wo'laancho abixxati munde ha'nooxxa dundinaa qico'n ta'anna gareertinbaan. 5 Mageni ha'noo isixxe oose kaddineemma qicinni ha'noo'ni haaso'eeka jajjabeessaka hiyyichcho deetine'een

«Anke belto Goottiinxa mura shollishshoxxee;

atee xixaa woddanna kodoba kultitoxxe.

6 Tinninna kaddaachchi Gootti eeyaake xixaan;

belto ifikishsha uudaakanna mura woxisaan.»

7 Magen ha'noo ifixxe ooseshsha uude'een isike xixichchika gorsa ossitine adhdhe. Isinni anni xixabaak belti ayyete? 8 Oosse kadeek duuchchi adhdhitaaka xixichcho ha'noo adhdha gophphinoole ha'noo baanake malee'e seeriixxe oosebaan. 9 Konne irra no'oo duuchchiing xixaaka maaliinka annuwwa anfeennan; insa'neenna ulfeessina'ennan. Eega hedhoti hedhaatee hafuuruwwiinke anna no'okee hittaa caala ajajemati gonphannota? 10 No'ok annuwwi insa'ne'ni eloxxe fakkaatexxi leelitee qicinni heenoxxe yanna'aa no'oo xinxa'nemman; yaane kinni Mageni no'oo isixxa woyyumma qoodemmannoke kandannoshsha no'oxxe la'o'aa no'oo mura woxisaan. 11 Mura woxa eettene yanna'ni yaadisaa malee'e gammachchiissaxxe fakkaatabaan; uduma kinni isoo barateeke manni'a nage'i wo'meexxa qullumatixxe gumma insa'ne'aa afissaani.

12 Tennexxee shaqqiteexxa ha'nooxxa anguwwanna gophpheeka ha'nooka gulubo jabeesse! 13 Hokkoleek fayyaashate malee caala fitiriki hiyyabaashsha lekka ha'nooxxee eloka ora giise.

14 Manji duuchchinni welti nage'iki hedhatee dandeetineexxa duuchcha aasse; woyyoletenna kadde; woyyummabelo ayyinna Gootta uuda dande'abaan. 15 Ha'noonaa'n ayyinna Mageniinke badhaadhi isonaa'n xe'yabaashsha xexxe'atte! Iittanni qararanji hiddi lateexxi ha'noo rakkisabaashsha, heddo manna battoossabaashsha xexxe'atte. 16 Mitte yannaxxe it'aa hiyyeexxi angafumma ifixxa gurgudheemmake Eesawushsha ayyinna yabaabultike adabike manjo yookaani Mageno ulfeessabaake kade afemabashsha xexxe'atte! 17 Udumii'n Eesa eettene eebba dhaalo'a haseexxa yanna hoyyemmeexxa egendine'een; isi eebbatanna indiddoti jaaba qico halsoolna midde langaxxa alfa dande'ebaan.

18 Ha'noo eettene angati abidema dande'amaxxe yookaan gubattaammaxxe Siinaxxa kooba geltinebaan; eettene hurrebaa'a, eettene dukkanabaa'a, eettene hobonbaltebaa'a, 19 malagatiink hafuur yookaan haaso'ema'neek hiyyichchi laqenshabaa geltinebaan; konne hiyyichcho laqeek manninna, «Ta'inni udmi'a weli haaso'i lebemeexxi haaso'emoqqe» hineexxi kadhante. 20 Tinni kaddeechchi «Hore midde eettene kooba tuqeexxe kaddoole kinjik cancaqemeexxi shiyemowwaal» hiyyaake hiyyichchika ajaja ba'edha dandennebaan. 21 Ookko leellita'emmaxxi yaane lumoshsha sodachchiisaaxxe kaddeemmaxxee Muuse midde, «Sodaatte culphisennen» hiyye.

22 Ha'noo kinni Tsiiyoonnixxe koobabaa, iimixxe Iyyerusaalemibaa, ookkone hedhoke Mageniinke qachchibaa dagine'een; gammashshoti bukki hiteexxi laakkosi tennete hiyyendabaaxxe ergannabaa shiqqine'een. 23 Summi insa'nek iima borreessemeeke angafa oose kaddeexxe amaynetixxe bukkibaa, duuchchiinge'ni muraake kadeeke Magniba, wo'munte alfe'eke qullichcha hafuuruwwibaa shiqineen. 24 Haaroxxe kako'a oddichchake kadeeke Yessuusibaa iittanni Aabelixxe munde mannii'n woyya hiyyemaaka hiyyichcho haaso'ammake eettene fiffixendeexxe mundebaa shiqqine'een.

25 Isoo ookkone haaso'a'neeka gibinabaashsha xexxe'atte; iikki buttate'n hedheexxi insa'nee xexxe'achchiisammaka ginbee wodda gantebaachchinni no'oo iikki iimi'ni dageek no'oo xexxe'achchiisa'n isinaa'ni bayyantonnole hittata fulchedha dandeennannota? 26 Eettene yanna hafuuri isiki sheke sheke asseek buttatemman; «Ta'a kinni butta calla kaddebaang iimuwwatanna mitte yanna lebe sheke sheke assannon» hiyye addachchiise'een. 27 Tinni «Mittele lebennexxi» hiyyemeeki hiyyichchi leellishaachi iikki lele'mabaakiir jabaate hedhaashsha sheke sheke hiyyaakiir kunniirinna dademeechchuwwi fugussemaakeraan.

28 Tennexxee hara lele'mitabaaxxa mootumma adhdhina'enexxee Mageno galatenfato; iittanni gammachchiisake orinninna soda'atinna ulfeesat isoo magenoonfanto. 29 Tinninna Mageni no'ok eettene balleessitammaxxe giirashsha kadeemmaxxeeten.